مرحبًا حلويني،
من أول لحظة بلّشت أكتب، من أربع سنين، كنت بعرف في داخلي إنّه في يوم رح أوصل لهاللحظة…
اللحظة اللي أوقف فيها وأقول: خلص.
يمكن ما كنت بعرف متى، ولا ليش، بس كنت متأكدة إنها رح تجي.
أربع سنين عشتها معكم، مو بس ككاتبة، بل كإنسانة شاركتكم مشاعرها، تعبها، وفرحها.
كتبت نصوص كانت جزء مني، وهربت إلها، ويمكن أنتم لقيتوا فيها شي يشبهكم.
كانت الكتابة مساحة دافئة جمعتنا، وذكريات رح تضل محفورة بقلبي.
شغفي بالكتابة كان مرتبط بشغفي بـ اكسو، وبـ سيبيك تحديدًا.
ومثل ما هي الحياة، وعندالإنسان، الشغف ما بيضل ثابت.
الاهتمامات بتتغيّر، والمشاعر بتخف، وبعض الأشياء بتكبر بيننا وبينها مسافة ما كنا متوقّعينها.
وبعد ما بطل السيبيك يجتمعوا، خفّ هذا الشغف عندي، وتحوّلت اهتماماتي لشيء آخر…
رغم إنّي لليوم بحب اكسو.
لهيك، ألغيت نشر كل رواياتي.
خصوصًا إنّ كتاباتي بالفترة الأخيرة صارت تميل للسواد، مثل الجنة المظلمة، ورواية ثانية للأسف ما شافت النور.
وهون وقفت مع نفسي، واعترفت بالحقيقة،
طاقتي عم تخلص، وشغفي عم ينطفئ، وما عاد عندي القدرة أكمّل بنفس الروح.
ممكن يومًا ما أرجع،
باسم جديد، أو فكرة جديدة، أو شغف مختلف…
وممكن لا.
بس إذا صار وشفتوا سيبيك،
تذكّروني.
لا تنسوني.
✨ When you see SeBaek, remember me ✨
