Talenbahrawy

أنا الكاتبة المجهولة، ويمكن الاسم ده اختارته لنفسي لأني مش بكتب علشان الشهرة، ولا علشان الناس تعرف أنا مين، ولا مستنية تصفيق من حد. أنا بكتب لمجرد إني بحب الكتابة، ولأنها الحاجة الوحيدة اللي قدرت أعبّر بيها عن حاجات كتير جوايا مقدرتش أقولها.
          	حياتي مكنتش سهلة، وشوفت فيها حاجات خلتني أكبر قبل وقتي، واتعلمت أعتمد على نفسي حتى في الوقت اللي كنت محتاجة فيه حد يسندني. والأصعب من التعب نفسه إنك تتعب وماتلاقيش حد من أهلك واقف جنبك، ولا حتى حد قريب منك يقولك: أنا معاكي.
          	لكن وسط كل ده، كان فيه واحدة زميلتي، وقفت جنبي بجد. يمكن هي مش من أهلي، لكن مواقفها معايا كانت أصدق من مواقف ناس كتير. شجعتني، ساندتني، وفضلت موجودة في وقت كان فيه الكل تقريبًا غايب.
          	وعشان كده أنا بكتب… مش علشان أبقى مشهورة، ولا علشان اسمي ينتشر، ولا علشان حد يعرف صاحب القلم مين. أنا بكتب لأن دي طريقتي في الحياة، يمكن أهرب بيها من وجعي، ويمكن أسيب بيها جزء مني في كل حكاية.
          	أنا الكاتبة المجهولة… ومش مهم تعرفوا أنا مين، المهم إنكم تحسوا بكلامي. 🖤