-عويشة.

-مازلت نحس فيه حلم ومش مصدقة، دموعي تنزل غصباً عني والله..

--الأوطان الكبيرة لاتهتز من الزلازل بل تهتز حين تسقط قممها، فالموت العظيم هو الإنكسار في مرآة الهوية، بِهِ يدرك الشعب أن مرحلة كاملة قد طويت، وأن عليهم السير في سراب التاريخ دون دليل..
          رحمة الله عليك..

-اكتشفت اني كنت عايشة في ظلام والله، ظلمة أحلك من ليلة في نهاية شهر قمري هذا وأنا وليدة ليلة 14!
          حاسة بشعور أني كنت مُغيّبة عن الواقع وعن حاجات واجدة ونموج في تيار الغم وخلاص؛ كنت غريقة في عمق المُحيط الهادي "وما يغركمش الهدوء في اسمه" وانتشلتني رحمة ربي من الغرق المميت هذا، سبحان من أنزل السكينة في قلبي وخلاني نعيش التسليم بمعناه الحرفي ونسلم أمري بكل هدوء ونرضى رضى كامل بعد ما أنار بصيرتي وكشفلي المستور، مش قادرة نعبر بالكلام عن شعوري والله؛ بس كل اللي نقدر نقوله أني نحس بـ"النور".

-المهم نكره الناس ونا شخص غير صالح للعيش في هذه البيئة والعالم الحديث، نا شخص نازل معاي اوبشن "أخلاق البوادي" والمبادئ في التعامل عندي "ادفع بالتي هي أحسن"، لا نحب نمسك لحد في شي لأني ماخلقنيش ربي عشان نضيّق عالبشر ونقعد ماسكتلهم على أبسط غلطة، ولا نحب كثرة زعل ونفضّل بعد حد يزعل مني بشي -انا حرفياً حنكون مش قصدي الموقف- يجي ويقول لي في ساعتها را انتِ درتي ودرتي ونا نوضّح الصورة وتنحل المشكلة، شخص ماتهونش عليه العِشرة ولا يهون عليه "العَيْش والمَيّة" ومايحبش يأذي حد والله، ردوني شي 60 سنة لاورا بالله لأن فعلاً الحقبة الزمنية هذي ما تناسبنيش!!

-وجي مش وجه ناس رايقة؛ اها واللهِ، يعني مثلاً توا رن علي رقم غريب وعاودت عليه عشان نعرف من، المهم طلعلي راجل تقول طالع من برامج الإذاعة الصباحية سكّان ورايق بكل ومايسكتش وزقب بجملة "ليّ الشرف اني حظيت بفرصة سماع صوتك" توا يا كذيذيب يا بلعوط ما ران عليّ تدور في أبلة فاطمة على قولتك مفروض الكلام هذا ماتقولاش لغيرها، المهم غرباوي نقني عرفته الرواق هذا ماعندناش اللي عندنا خلوقهم في حكة تن من قوة ماهو رايق ونا تافلة عليّ الحياة سكرت في وجه وهو مازال يُلقي عليّ في أصدق التحايا الطيبة ويشكُر الصدفة اللي جمعاته بشخص زيي -حد اللي قلته له غالط ياخوي، تمام، تمام-، المهم لسانه لسان مصرية يابتي عليك صبح انظر ايش عقابه مادام بدايته ناس رايقة هك!

-عواشي، حب قلبي ووجهتي الأولى دوماً، نفسي رورحي وشخصي، ودكتورة المستقبل إن شاء الله ..
          رسالة لك حتلقيها في المستقبل القريب والبعيد على حدٍ سواء .. حالياً قرينا في جامعة أحلامنا اللي دعينا بيها من سنين، ولكن للأسف لعل الظروف انقلبن ضدنا وفي احتمال انك حتنجبري تردي للبيضاء وفي احتمال آخر ان السنة هذي تريح عليك طايح في رايح بسبب ان منهج بنغازي والبيضاء مش نفسه ..
          لربما يتملكك اليأس يوماً ما بسبب الوضع هذا، ولكن تذكري انك تقري عشان هذا حلمنا اللي ياما تعبنا عشانه، ما تفقديش عزمك في بداية المشوار وعادي سنة نقروها ونجيبوا فيها ممتاز لعيون بابا اللي مش مستخسر فينا شي وياما دفع عشاننا وقال لنا ان اهم حاجة صحتك وعافيتك وتقري قرايتك، انتِ عارفة كويس بابا شن عانى الفترة اللي فاتت كلها صح؟ بابا يستاهل حاجة ولو بسيطة تفرحه بعد اللي شافه كله ياعويشة، لازم نحن نفرحوه ونكونوا قد ثقته فينا على حلم ياما حاربنا عشانه، ماترضيش بأقل من الممتاز؛ مش مهم السنة حتريح ولا حتقعد الأهم أنك حققتي جزء من حلمك وشفتي وعشتي التجربة بعينك عشان ما تقعدش في خاطرك، اجتهدي واقري وأسعي لعل وعسى ربك يجعل لك مخرج وتكملي هنا ولا يوافقوا على معادلتك في عمر المختار، نستنى منك في أخبار تسعدني ياعمري، عينك من روحك وبشريني شن درتي وشن صار معانا، استودعك اللهم نفسي وأهلي ومستقبلي فأنت الذي لا تضيع ودائعك، لنا لقاء في القريب العاجل، نحبك ❤️.

-يارب تحن عليّ وترحمني برحمتك ولو مصيري جنة اقبض روحي توا هذ نرقد ما يصبح عليّ صبح وكان مازلت ما صلحت بالجنة توب عليّ واغفرلي وارحمني برحمتك التي وسعت كل شيء، هي رحمة وحدة في الدنيا ومنعم علينا بيها فارحمني بالـ99 رحمة المحفوظات عندك يارب ..

-اللهم ياربي تفكني من الاحلام السود النود اللي نحلم فيهن.

-يمه قلبي شيي قلبي؟

-كان ما كليتش حوت توا مدرعن شيصير في.