بسندانه المشتل جنت
ولا هو موسم مشترى 
لا گاع وسعة العد هلي
بس الـ  يدگ وازاني 
كتلك خضارك ينعشك 
لا گتلي ابو المشتل چذب 
رايد يقنع المشتري 
مو لله من داراني 
مو چلبت برداني 
مو گتلي اخذني لصحرتك 
هم ارحم من امچاني 
چا صوفرت وتبطرت 
ودگلي مايك مو عذب
من جبتك البستاني
لا يا هواي  شغيرك
من جنت اگلك راح اجي 
شفايتلك ابابك ولك
يم بابي تتلگاني 
مو چنة رمشين بجفن 
ما ننتظر ياهو اليجي لمن 
نسير بالدرب واحد يلاگي الثاني
وبحضاني من كد ما نمت 
ما اسلم اعلى اهلك بعد 
واللة خفت لا ننفضح 
چي عطرك بقمصاني 
واكفلك اكثر من هلك
مثل الجواز بعشرتك
واكفلك اني بغربتك 
بس انت مو حگاني 
لمن نرد من السفر 
وي التحبهم تلتهي 
وي الجنط تنساني 
بس اني ما عندي گلب 
باچر تعاود عل سفر 
محد يجي وياك وترد 
يم جنطتك تلكاني 
شكد رادوا انطي بعشرتك 
والله وصلت لمرحلة 
ما سولفت مو للبشر 
لا حتى يم حيطاني 
والله وصلت لمرحلة 
عرفوني مو يم الخمر
صبولي كأس 
وما كدر واحد يبوك الساني 
اسكت چنت مثل الطفل 
بس يم هلة يطلع الحچي 
ويستغرب من الوادم 
هيچ احفظ اسرارك چنت 
وانت اليگلك مرحبا 
تگله اكعد احچيلك بعد 
شتريد اسولف خادم 
شسويتلك ؟ حتى انسي 
الحاجيهن وي امي گبل 
من عدهن الگطلك حچي 
واكعد واحطلهن لحن 
خاف الحچاية تنشز
تهضمني يمي شمثگلك 
ويم غيري تضحك للهوى 
والمشكلة بگلبك يحط 
وين الحچاية التنغز 
لو نيتك معاتب صدك 
اكعد واخذ كل الحچي 
ما عندي سوك لحضرتك 
تلگط حچاية حچاية 
سولفلي بيمن قصرت 
شافوني ظلك مو بشر 
كد ما صرت تچاية 
كافي ارد اعيش مروتك 
علمني ما اشوفك ضوه 
كافي ارد اشوفن صورتي 
لا تطلع گبالي بعد 
من اوكف اعلى مراية
وك عشت الضياع بوحدتي 
ياخذني بچفوفه الهوى 
ويردني مثل الراية 
شفايتلك بگلبي وتفض 
وجعت فراگك بالعقل 
ما باچي الك واني ثمل 
باچي اعلى المصلاية
خليتني بعز الحرب 
وسعر الرصاصات بنفس 
ومن خلصتها المعركة 
من الفرحة شفتك طاير
مسوي احتفال برجعتي 
وبسلاحك مزرف السما 
ممنون منك بس جنت 
محتاجهن عل ساتر 
والله انت لا يم الوفى 
ولا تكعد وياك الكفو 
بس اليحب يكابر 
ما عندي غيرك وانتظر 
هالواحد انت وما دروا 
كتلوني من كالوا مشى 
وربك يعوضك باچر 
اليكتل العاجر مو ضنة
ام البنات المن تجي 
ودگلها اريدلي ولد 
هذا اليموت العاجر 
شفايتلي لو عركه غرب 
والله وارد نهد لهلة 
وجروحه ماخذها النزف 
من طرف واصل چازه