من بە فرمێسکی ڕەنووی کوێستانی کورد پەروەردە بووم
کوڵمی ئاڵ و چاوی کاڵ و سینگی بەفرینم دەوێ
من تەشی ڕێسێکی وەک شیرنی (وەفایی)م بۆ چیە؟
کیژی وریای چاو کراوەی فێرە زانینم دەوێ
نایەڵن ئاسوودە دانیشم لە لاپاڵی چیام
قاسپە قاسپی خاسەکەو بێ ، گرمەیی مینم دەوێ؟
کەی ڕەوایە بمدەنە بەر گولە یا ڕاوم بنێن
گەر گوتم کوردم لە کوردستانی خۆم ژینم دەوێ
کورد مەگەر کوندە؟ کە هەر وێرانە بێ هێلانەکەی
نیشتیمانی ئاوەدانی جوانی ڕەنگینم دەوێ
زۆر بە ئاواتم کە کوردستانەکەم بێ کێشە بێ
ئاشتیخوازم، کوا وڵاتی پڕ ڕق و قینم دەوێ💕