بڕوانە, شاییە، چۆپییە، لەو ماڵە!
گوێ بگرە! زوڕنایە، دەهۆڵە، شمشاڵە!
زەرد و سوور تێكەڵ بوون، ژن و پیاو، هەرایە
لەو ناوە هەر هاڕەی هەیاسەی تۆ نایە!
سا تو خوا، خێراكە، با بڕۆین، دەست بگرین،
بەكامی دڵداری پێكەوە هەڵپەڕین!…
گوڵ نەبێ بۆ سەرم: ئاڵ چەپكێ، زەرد چەپكێ،
نایەم بۆ زەماوەن، نایەم بۆ هەڵپەركێ!
كچ لە ڕێی جوانیتا، كچ لە ڕێی جوانیتا،
كچ لە ڕێی نیو نیگای هاتوچۆێ كانیتا،
پایزە، گەڵای دار ڕژاوە، باغ ڕووتە،
گوڵ كوانێ گوڵ لێوی بەبزە پشكووتە!…
گوڵ نەبێ بۆ سەرم: زەرد چەپكێ، ئاڵ چەپكێ،
نایەم بۆ زەماوەن، نایەم بۆ هەڵپەڕكێ!
بتدایە دڵ بە من، بە هەموو مەعناوە،
دوو چەپكت ئەهانی لە باغچەی پاشاوە!
باغچەی پاشا لەوبەر ئاوە،
خێڵی دوشمن دەورەی داوە،
ئەڕۆم:ڕێگام لێ گیراوە،
ناڕۆم: چاوكاڵ لێم تۆراوە!
بە باغچەی پاشا دا ورد گەڕام، خوار و ژوور،
زەرد هەبوو، بۆم چنیت، چنگ نەكەوت گوڵی سوور،
نازانم ئەمجا دێیت بۆ شایی و هەڵپەڕكێ ؟
نایەم، گوڵ ماویەتی بۆ سەرم سوور چەپكێێ
(یاری فیشەکی لێ درا لەلایەن پاسەوانانی پاشاوە)
ناتەوێ ئەم زامی سەر دڵەم لەباتی ؟
هەی هاوار! تفەنگی دوشمنیش پێكاتی ؟
ڕاكشێ تاوێ سەر بنێرە سەر ڕانم،
با بگریم بۆ دڵێ، بۆ گوڵێ دۆڕانم!…
