Major

كل حد عنده سؤال بخصوص اي حدث يطرحه هنا، ولكن فيه أكتر من حاجه لاحظتها هجاوب عليها هنا علشان حاسه إنكم نسيتوا القصة كانت بتدور عن ايه ومين وشخصياتهم اتكونت ازاي،
          	
          	1- فضل:
          	ارجعوا من بداية الأحداث وأعرفوا شخصية فضل كويس عاملة ازاي، اناني، كاره لصقر لأكتر من سبب مش بس أنه كان سبب في إن مختار يفقد هويته كأكرم، بيختار نفسه قبل أي حد بدليل أنه خلع نفسه من حوار سيف، وضحّى بكمين كامل علشان انتقام شخصي، هو حرفيًا حاليًا كلب ومحطوط حوالين بوقه لجام من رافع، ليه؟ رافع عارفه وعارف كرهه للمكان اللي بيجبره يعيش فيه، فلما ينفّس عن نفسه بكلمتين؟ يضايقهم؟ يفرّغ غِلّه؟ ده أمر طبيعي ورافع عارف، ده واحد مبيخرجش من البيت تقريبًا غير مع رافع عايش معاه 24 ساعة ولو خرج عن المسار أظن كلكم عارفين رافع ودماغه التعبانة وأنه أكتر من مرة عفا عنه وسامحه عشان بيحبه.
          	2- الجزء الأول والتاني:
          	أنا كنت عارفة إني لما أقسمهم هيحصل مقارنة بينهم وده طبيعي، الأول عبارة عن opening فرش كامل للأحداث ومين ومعانا علشان التاني يكون الclosure بإتقان. فأكيد التاني مش هيكون بنفس rhythm الأول مع العلم إنه السبيشل متصل ولو كنت قدرت أخلصه مرة واحدة كان هينزل بنفس السرد القصصي.
          	3- صقر:
          	عانى من مخاوف واضحة وصريحة وهو أنه أو حد من أهله يُجرم ويقتل يوسف، كان خايف من نفسه فبعد عنه، وخايف عليه من أهله فعاملهم رعب عشان محدش يقرّب منه وسايب واحد محدش يعرف عنه حاجه اسمه ديب يحميه -مش يراقبه-، لما فجأة كل مخاوفه تتجمع في ليلة واحدة قدام عينيه كل العنطظة الكدابة والهري بتاع ده قتل وعمل هيقع من قدام عينه، فقد سيطرته على خوفه في اللحظة اللي كان رايح يقابله ويعرّفه، لكن كالعادة معرفش حتى دي يسيطر عليها ويوسف كان عنده علم مسبق 
          	4- يوسف:
          	هيفتكر؟ لأ، شيء مش سهل، أغلب اللي بيحصله هو ديجافو، أحلام مش متصّلة، وكل ده في وجود صقر بينعدم، اختارت أنه ميفتكرش لأن بؤمن أن لكل شخص عقابه سواء أحنا شوفناه أو لأ، من أول شخصية لآخر شخصية عملت فعل سوء في حق نفسها أو في غيرها أتردّ عليها عملها، ده استقرار كوني، لكل فعل جزائه ومش شرط نشوفه بعنينا. 
          	
          	القصة متكاملة، مفيش تفصيلة متروكة، اللي حابب يسأل ياريت هنا علشان أنا واخدة راحة خلال الصيف أعذروني ذهنيًا مجهدة