user34659606
ظل قائم يسحبني من طرف عبائتي، وأنا أمشي وراه بخطوات مترددة، كل شوي أباوع وراي حتى أتأكد محد انتبه علينا.
— قائم وين تاخذني؟
ما رد.
— قائم! أحچي وياك!
وقف فجأة، لفيت عليه واصطدمت بيه تقريباً، رفع إيده بإشارة إليّ أسكت.
— وطي صوتج جُنى.
عصبت وگلت:
— ليش؟ شنو السالفة؟ من الصبح وأنت تتصرف تصرفات غريبة!
باوع بعيوني ثواني، وبعدين باوع للمكان وراه.
— إذا تريدين تعرفين، تعالي وياي بدون أسئلة.
— لا طبعاً! شنو أني حتى أروح وياك لمكان ما أعرفه؟
ابتسم ابتسامة صغيرة، بس عيونه ظلت جديّة.
— إذا جان قصدي أضرج، جان ما خليتج تمشين برجليج.
ضليت ساكتة.
كلامه ما طمّنّي… بالعكس، زاد خوفي.
مشى مرة ثانية، وأنا رغم كل شي مشيت وراه.
وصلنا لممر جانبي بعيد عن الناس، وهناك شفت باب حديد قديم نص مفتوح.
قائم دفع الباب ودخل، وبقى واقف ينتظرني.
— ادخلي.
— مستحيل.
— جُنى...
— لا تناديني بهالنبرة، شبيك أنت؟
تنهد وقرب خطوة.
— لأن خبير مو جاي لهنا صدفة.
تجمدت بمكاني.
— شنو يعني؟
قبل لا يجاوب، سمعنا صوت خطوات جاية من نهاية الممر.
قائم بسرعة رجعني وراه، ووقف حاجز بيني وبين الباب.
دخل رجال جبر وهو يحچي بالتلفون، وبعده مباشرةً ظهر خبير.
وقفت أباوع عليهم وأنا مو مستوعبة.
قائم همس:
— هسه عرفتي ليش جبتج؟
هزيت راسي بالنفي.
— لا...
وبنفس اللحظة، سمعنا خبير يكول لرجال جبر:
— لا تخليها تعرف أي شي قبل ما نوصل.
اتسعت عيوني.
رجعت باوعت لقائم، وهمست:
— "ها"؟
قائم ظل ساكت.
— قائم شنو يقصدون؟ منو هي؟
ظل ساكت ثواني، وبعدين گال:
— مو منو هي...
سكت لحظة، وباوع إليّ بنظرة غريبة.
— يقصدون منو إنتِ.
انحبس نفسي.
— شنو يعني منو أني؟
قرب قائم مني وهمس:
— جُنى... أكو شي بحياتج إنتِ ما تعرفينه، وهم يعرفوه.
وقبل لا ألحق أسأله، انفتح الباب خلفنا بقوة.
التفتنا كلنا.
كان كافل واقف هناك، وملامحه لأول مرة ما بيها أي مزاح.
— قائم... تأخرت.
قائم باوع له بحدة.
— شصار؟
كافل أخذ نفس عميق، وباوع إليّ مباشرةً.
— عرفوا مكانها.
تراجعت خطوة.
— منو عرف مكاني؟!
كافل ما جاوب.
أما قائم، فمسكني من طرف عبائتي مرة ثانية، بس هالمرة صوته كان مختلف تماماً:
— جُنى، من هسه لا تبتعدين عني خطوة.
— ليش؟
رفع عينه عليّ وقال:
— لأن اللي جاي... مو زيارة عادية.
fatima_66660
@ user34659606 سرد مالتج يجنن والله ندمجت اذا ناويه دخلين مجال الكتابه فاحب اكلج استمري