fatima_sss__

هل الواتباد تطبيق للقراءة ام للاعلانات 
          
          حتى الواحد يقرأ للمتعة مثل ما دكولون صار ما يكدر لان القصص صارت عباره عن تجاره براس القارىء يعني اني ما احب ادخل بقنوات الكاتبات فقط لمن اريد اعرف موعد التنزيل لو اسال عن حدث و اناقش الكاتبه في مواضيع حساسه داخل الروايه (و الغالب يم التغليس عنها) بس صار الموضوع بلا ملح من اجي اعلق على الروايه داخل تطبيق الواتباد يجون الجيوش الالكترونية المتعاونين مع الكاتبه حتى يعلنون عندها يقنعون القارئ بالدخول في كروبات توظيف الي من تسألين الكاتبه عن مصداقيه و امان هذا النوع من الكروبات (لان غالبيه الي ينضم هن مراهقات جاهلات او بنات بعازة العمل) يتم التغليس عن الموضوع و تستمر هذه الجيوش بموعد تنزل البارتات تدخل على البنات اليعلقن يقنعوهن بالانضمام و ترجع الكاتبه ورا فتره تروج لهذه الكروبات داخل قناتها (عدا الاعلانات الثانيه البلا ملح ) و من تتناقشين وياها عن القصه يتم التهميش او الاكتفاء بـ(هذه بالمستقبل نعرفه او القصه انتهت ) و الاجابه فقط عن الاسئله التخص الاعلانات التنشرها

الكاتبات العراقيات بطلن تستخدمن موضوع الاعتداءات (الجـ//نسيه) حتى بس ترفع من نسبه المشاهده للقصه و تزيد من التفاعل هذا المواضيع حساسه جدا و داشوف هوايه بنات بالتعليقات صار هذا الموضوع عادي عدهن لان بالنهايه الشخصيه/البطله راح تزوج شخص يحبها و يعيشون حياه ورديه و هذا ينفي الواقع تماماً ينفي حقيقه واقعنا المخزي اتجاه هذه الاعتداءات بحق النساء لهذا هذه المواضيع مو حشو تكتبيها بقصتج حتى تزيد من التفاعل و لا هي حدث يخلص من البطل يتزوج البطله 
          و شغله ثانيه اذا البارت يحتوي على هذا النوع من الاحداث لازم تحطن تنبيه ⚠️ و تحذير قبل البارت ما اعرف ليش تتغاضن عن هيج اشياء تهم الراحه النفسيه للقارئ البارحه بسبب هذا الشي  تعرضت لنوبه ذعر سببتلي خفقان شديد و تازمت حالتي لان و اني اقراء البارت ما كان اكو اي تحذير حتى اتجنب الصدمه 
          الكاتبات العراقيات ليش عدجن اهمال بهذا الموضوع مو كل الناس تتحمل هيج احداث و لا هي موضوع و حدث بسيط ينذكر حتى تعتبر القصه قويه

انتقاد للقراء 
          من تقرا شي حاول لا تنساق للاحداث بس لان هذا الفعل صدر من الشخصيه الرئيسيه و تعتبره هو فعل صحيح 
          جمال القصص و القراءه هي من تفهم الشخصيات و تحط العلامات على افعاله و ما تنجرف ويا مشاعرك فقط لان تحب هذا الشخصيه او كونها الشخصيه الاساسيه بالقصه يخليك ما تميز بين الافعال المقبوله و الغير مقبوله 
          لا تخلي حبك للشخصيه يعمي عينك عن الافعال السيئه 
          و اذا كنت تحت ال١٨ لاقتدي باي بطل/بطله و تتبنى افكارها او تحاول تتقمص شخصيتها  

انتقاد
          
          بعض الكاتبات يماطلن هوايه بالاحداث الجانبيه و الحوارات الثانويه "الروتين" فقط حتى تحط اهم حدث باخر فقرات البارت حتى تزيد الماشهدات و يبقى القارئ ينتضر البارت الجاي و هيج على طول القصه 
          هذه الحركه تقلل من امكانيه الكاتب و مهاراته تخلي داخل حلقه تمنعه من التطور بسبب هوس المشاهدات و الاهتمام بالارقام لا الجوده و النوع 

مراجعه عن روايه " الجاثمه نقطه العدم " للروائية اساور حسين 
          
          احداث الروايه فوضى و ترابط الاحداث بدون تنسيق في بارت واحد هوايه احداث و الانتقال من حدث للثاني بدون تمهيد و لا حتى تنسيق 
          بروايات اساور اكره العنف المذكور برواياتها و حتى الكلام الجارح هو القائم في اغلب الاحداث و السرد 
          
          في روايه الجاثمه حاولت انطي اساور فرصه الروايه عجبتني نوعاً ما التمست بيها شيء من الطور في السرد 
          
          لكن شخصيه "حلوه" احط تحتها خط احمر لكثره المشاكل في شخصيتها و تكوين و بنائها في الروايه
           الكاتبه كانت تحاول تبين هوس حلوه و حبها لكن ما توفقت الهوس كلنا نعرف هو مرض نفسي و طريقه طرحه بهذه الصيغه حاول يجمله و ينطي نوع من الاحساس بالقوه و التمرد اتوقع الكاتبه حبت تعيد شخصيه "علي الاكبر"  
          
          و شخصيه "ابو الحسن" احط تحتها الف خط احمر لكثر المشاكل التحتوي من اول طريقه ضهور اله لاخر مشهد انذكر بي و طريقه معاملته لحلوه اصنفها بانها الاسوء على تاريخ الواتباد 
          
          ما حبيت شلون الكاتبه نهت الاحداث و لا حتى المبرر الي انذكر عن سبب شخصيه حلوه و ابو الحسن البعض اكيد يؤمن بهذا الشي و ما احط عليه نقطه شك 
          لكن وضع اللوم على " السحر" تبرير لافعال الشخصيات بدون المراجعه على البيئه العايشين بيها طريقه تفكير الشخصيات نفسها قبل حتى لا نوصل لنقطه السحر كمثل لوم الامطار على اغراق المدن المبنيه بدون بنيه تحتيه و تأسيس

مراجعه عن روايه " ضغن الهرماس" للروائية ساره الحسن
          
          احداث الروايه رائعه ما شفت منها قبل تناسق و احداث و ربط بين الحوارات جيد و يجذب القارئ 
          
          اختيارها الرائع للقفلات هو الي ميزها من بين الكاتبات بالنسبه الي اشوف ساره هي الروائيه الوحيده التستحق القراءه و اتحمس ويا كل روايه جديده تنزل الها
          
          لكن للشاطر هفوات و اخطاء و جل من لا يخطا
          
          الي ما حبيته بروايه ضغن الهرماس هو طريقه ذكر قصه "عاتكه" صحيح الي انكتب عنها هو ما تناقل من باقي الشخصيات لكن هذا ما يسمح نقلل من المعاناة العاشتها في بيت جساس كانت تكدر الكاتبه تتجاوز احداثها وتعبرها لكونها قضيه حساسه جداً و ما مسموح لاي شخص بالحق يكتب ويملي بالحداث على حساب هيج قضايا حساسه
          
          طريقه طرحها للجدال الصار بين عاتكه و يسر خله عاتكه بموضوع الشرير بالقصه بعد ما كانت هي الطرف الاضعف والمستضعف بين الكل
          
          اتمنى من الكاتبه  بالمستقبل ما تطرق لهيج نوع من الاحداث لان هذا الموضوع بعيد عن كونه حساس فهو له تاثير كبير بالنفس ومهما كان السارد متقن عمله لا يمكن يكدر يتوفق بسرد هذه الحقيقة الضالمه و المؤلمه