heaven_20
الله يرحمك يا حبيبتي ويجعل مثواكي الجنة والله ينتقم من اللي كان السبب من ساعة ما مشيتي وأنا حاسة إن في حاجة كبير اتكسرت جوايا كأن الدنيا بقت كئيبة وضلمت في وشي فراقك وجع في القلب، وجع ملوش وصف كل حاجة حواليا بقت مضلمة دنيتي ملهاش طعم ولا لون من غيرك أنا لحد دلوقتي مش مستوعبة غيابك بفتكر إنك هتكلميني أو هتظهري فجأة ونكمل كلامنا زي أي يوم بس الحقيقة بترجعني تاني لوجع كبير إنك مش هنا، وإن في حاجات كتير كانت لسه بينا ومكملتش إنتي كنتي حاجة جميلة في حياتي صحبتي وأختي، وحبيبتي كنتي طيبة بزيادة وحنينة أوي عليا وعلى كل الناس هقولك حاجة أنا متأكدة لو كنتي معايا دلوقتي وسمعتي الكلام ده، كنتي هتخجلي وتضحكي وتضربيني كعادتك أنا مكنتش بعتبرك صحبتي وبس من كتر ما كنتي بتخافي عليا وتزعلي عليا، كنت بعتبرك أمي قلبك كان طيب أوي ودافي وعارفة إنك كنتي بتزعلي لما كنت بقولك طيبة وكنتي فاكرة إني بتريق أو أقصد حاجة وحشة لا والله أنا عمري ما قصدت غير إنك أنضف وأحن قلب شوفته بعتبر نفسي أني محظوظة انك صحبتي كنتي دايما شايلة هم اللي حواليكي وبتحاولي تساعدي الكل حتى وإنتي شايلة جواكي وجع كبير و محتاجه إللي يطمنك محدش كان شايفه غير اللي بيحبك بجد أنا عارفة إنك كنتي بتتعبي وتحزني من غير ما تبيني ده كنتِ بتخبي دموعك بضحكة ورا كلمة أنا كويسة بس عندي صداع شوية مع إنك مكنتيش كويسة ولا حاجة يمكن أنا كنت شايفة ده وحاسة بيه بس الحقيقة إني ماقربتش منك كفاية وماسألتش زي ما كان لازم أسأل أنا فعلا ماكنتش أستحق صاحبة زيك سامحيني سامحيني على كل مرة كنتي محتاجة تتكلمي فيها وسكتي وأنا ما حاولتش أفتحلك باب تتكلمي سامحيني إني سيبتك لوحدك في أوقات كنتي محتاجه فيها حد جنبك يطمنك سامحيني على كل مره سيبتك تقولي إنك تمام وأنا صدقت مع إن كان المفروض أفهم أكتر وسامحيني أكتر على آخر لحظة بينا اللحظة اللي إديتيني فيها تلفونك ومشيتي و أنا سيبتك تمشي من غير ما أتمسك بيكي، من غير ما أجري وراكي من غير ما أقولك استني أو حتى أحاول أطمن عليكي بجد اللحظة دي عمرها ما غابت عن بالي ولا هتغيب أبدا هتفضل وجع في القلب و ذكرى سودا في قلبي إنتي كنتي أحن وأجدع مني بكتير كنتي دايما بتسأليني أنا كويسة ولا لأ، وبتحاولي تخففي عني حتى وإنتي موجوعة
heaven_20
@ heaven_20 وأنا للأسف ماقدرتش ده زي ما إنتي كنتي بتقدريه حقك عليا على كل لحظة عدت وإنتي محتاجة حد جنبك وأنا ماكنتش موجودة بالشكل الكافي حقك عليا على كل كلمة تطمنك ماقلتهاش وكل حضن كنتي محتاجاه و ملقتنيش وكل اهتمام كان لازم أديهولك وأنا قصرت صدقيني أنا ندمانة ندمانة على تقصيري معاكي وعلى إني ماكنتش صديقة العمر اللي تستاهليها زي ما كنتي دايما بتقوليلي وحشتيني وحشتيني أوي ، وحشتني ضحكتك صوتك هزارك معايا حتى قمصك مني حتى سكوتك وحشني رغم إن الكلمة تقيلة على لساني وقلبي وعقلي بس خبر وفاتك سايب جرح كبير جوايا، جرح مش هيروح أبدا بس رغم كل الوجع والحزن اللي أنا فيهم أنا مطمنة إنك دلوقتي في مكان أحسن وأرحم مكان مفيهوش تعب ولا حزن مكان كله راحة وسلام ربنا يرحمك ويغفرلك ويجعل كل اللي شوفتيه في حياتك من أي حد سبب في راحتك دلوقتي، ويبدلك كل وجعك و حزنك اللي شوفتي في الدنيا سكينة و راحه ونور في جنة الرحمان هفضل أدعيلك دايما في كل صلاة عمرك ما هتغيبي عن بالي، و ديما هفتكر كل لحظة حلوة بينا وكل ذكرى هتفضل عايشة جوايا مهما الوقت عدى عمري ما هنساكي ولو في حاجة واحدة نفسي توصلك فهي إني آسفة آسفة بجد وياريتني كنت أقدر أرجع الزمن وأكون ليكي صديقة العمر اللي تستاهليها مع الأسف مينفعش لحد ما ربنا يجمعني بيكي و نتقابل تاني بإذن الله ربنا يرحمك ويغفرلك يا رب
