كاتبة روائية مصرية مواليد 1987 من اعمالي الورقية ملاذ الحب ،بنات درويش ، فنجان قهوة و قريباً نار الياسمين      ليه فيه قراء كتير بيفضلوا الروايات الطويلة؟

في عصر السرعة اللي إحنا فيه، اللي ممكن قراءة بوست طويل بقى مهمة تقيلة للبعض، هتلاقي لسة فيه قراء كتير بتفضل المؤلفات القصصية الطويلة، سواء الممتدة ف سلاسل وأجزاء، أو الأعمال المنفردة ذات الحجم الكبير. 
طب ليه؟
بصفتي حد ينتمي للفئة دي، وإني برغم انشغالي ومسؤولياتي اللي بتزيد كل يوم إلا إني بردو مش قادرة أستسيغ الأعمال القصيرة بقدر استساغتي للطويلة فهقول إن السبب هو (التفاصيل) 
رواية طويلة، يعني طرح مفصل للشخصية، ماضيها ودوافعها، تأسيس قوي وتعايش طويل بيخلق ما بينا ألفة بتثري التجربة وتقربها أكتر م الواقع.
 رواية طويلة يعني رحلة أطول مع القصة وأجواءها، كأنك راكب قطر بيعدي على محطات جبلية مبهرة، فبدل ما تبقى قلقان إنك نازل كمان محطتين أنت بتبقى متطمن إنك موجود ف القطر لغاية آخر محطة، ومش هتنزل غير وأنت حرفيًا شبعان ومتخم م التجربة🩵.

هل ده معناه إن الأعمال القصيرة وحشة او ينقصها المتعة وحيوية التجربة؟
أكيد لاء، لكن زي ما قولت.. المسألة مسألة (شبع) مش أكتر..

فها؛ بتحبوا الروايات الطويلة ولا القصيرة؟ وإيه أسباب التعلق من وجهة نظركم؟