koovjj
احب اعبر عن فرحتي ببلدي ومنتخبي، ومهما نكرت وكرهت ووصل بيه الحد من النُكران للحكومة والظلم والقمع والحروب الي مر بيها العراق والي تخليني اكره العراق كبلد، بس بعمري كُله ماراح اكره العراق كوطن، كانتماء، كثقافة، كتاريخ. هالاشياء محفورة بروحي وبتصرفاتي وبحبي لوطني، هذي اللحظة مال تأهُل راح تضل شي يسعدني لمدة طويلة، مو مهم شكد راح ناكل اهداف في المجموعات، مو مهم ان راح نطلع منها، فكرة ان هالجيل من الشباب الي يحاول يصنع عراق جديد بأمجاد جديدة هيه الفكرة الي تسعدني. مُجرد انهم يفكرون بفرحة الشعب ويكتبون التاريخ للعراق من جديدة فكرة اجمل منها ماكو وذكرة بعمري ماراح انساها وراح تضل مُصورة بذاكرتي للأبد، احب وطني واحب انتمائي اله واتمنى اشوف السعادة الدائمة مرسومة على وجوه العراقيين ابناء وطني بجميع اعراقهم ومُعتقداتهم لان حزنه هواي وكافي حزن مايليق بينه هالشي وان شاء الله السعادة والأمن والأمان يدُم على عِراقنا الحبيب ♡
