Sali

عايزة ارسم

عايزة اتفسح في مشتل زهور كبييير شديد بصحبة بت ملمة بالزهور و كلما سألتها عن نوع معيّن منهم تجاوبني بكل رحابة و تحكي لي عنهم و معانيهم و ما إلى ذلك و نلف لحدي ما نتعب و بالاخير نختتم جولتنا في أخر اليوم بايسكريم فانيليا

"اعتدت امثل عدم اللامبالاة من كتر ما الناس كانوا بيستغربوا عليّ سعادتي و ردود افعالي، و لما قلت اموف اون و أعيش بطبيعية نسيت كيف كنت ببتسم و بستمتع بحياتي"

ليه الـ AI أول خيار بيختاروه الناس لمن يفكروا يعملوا تصميم شخصية، إعلان و لا غيره دا؟ دا غير أنهم شكلهم يع و محرج شديد 

أنا و فلانة اتلاقينا أول مرة من سنة تقريباً و كنا ساكنين في نفس الشارع و بنمشي المدرسة أيام الحرب و التدوين لسا شغالين بنفس الترحيل لكن ما حاولت يوم اتكلم معاها أو نعرف بعض هي حيوية و اجتماعية شديد و لأني ما كنت طايقة اي حاجة وقتها فكنت طول الوقت بكون ساكتة أو نايمة خاصة في الترحيل باعتبار أنه ياه عادي أصلاً كدا كدا نحنا ما اصحاب و لا ح ألاقي الوجوه ديل بعد ما امتحن الشهادة، يوم تكريمنا بالصدفة قعدت أنا و هي في نفس الطاولة و حالياً بنقرأ سوا في نفس الجامعة و طلع أبوها و بابا أصحاب و حالياً أنا و هي صديقات بنتسكع مع بعض و بنفطر مع بعض، ستل نفس البت الحيوية و البت الهادية بس اختلفت الظروف

احدي صديقاتي اللي بقعد جنبها معظم الوقت بتحب تعاين لي و أنا برسم بين المحاضرات، أمبارح طلبت تجرب ترسم في التاب وريتها بعض الاساسيات كانت مبهورة أنه في أزرار و خيارات كتيرة شديد و مدحت رسمي، كلما اتذكر الموقف ببتسم ما تخيلت أنه حبي للرسم يكون معدي كدا 

Study is not studying 

دايماً وقت ألقى تحفة كتابية أو فنية بحس أنه مفروض تلقائياً كدا كل أعمال صانعها ح تكون بنفس المستوى و إني ح اكون خسرانة لو ما اطلعت عليهم لكني مؤخراً ادركت أنه دا نوع من المثالية الزائدة عن حدها تقريباً (؟) -مدري ما عندي مصطلح يوصفها أحسن من كدا- و غير إنها بتخليني أضع آمال قد تكون وهمية لحاجات ما القيت عليها نظرة قبل كدا إنها بتستنزف طاقتي و تركيزي شديد، و شكل آخر للحاجة دي هو طريقة تعاملي مع هواياتي و رسمي عشان أيعقل عشان كدا بتطور بطئ شديد و بطول في الكتاب الواحد

الناس ديل بيكلفتونا ساي و لا بيتهيألي D:

شعور أنه ناس غرباء تشوف رسمي و تقول أنه حلو و بتاع بيزعج قلبي ما عارفة ليه