اني أحلم 
كلش أحلم
أحلم بدنيا جديدة..
بدنيا ما بيها تناسب لو مگابر لو هلاهل!..
دنيا بيها الوطن جاهل..
دنيا بيها السنبلة مفرعة عروس
ونامت بحضن المناجل..
دنيا ما بيها الحلم يذبح وريدة!..
ولا عيون تناطر الفرحة البعيدة..
ولا بنية التحلم بگذلة جديدة !..
دنيا بيها الموتى متخاف وسعيدة...
دنيا ما يذبحوني بيها 
ويحترگ عمري قصيدة!..
أحلم بدنيا جديدة..
بدنيا ما بيها خليفة !..
بدنيا ما بيها سقيفة!..
دنيا بيها الدين ضحكة و مو وظيفة..
دنيا ما بيها 
جوامع تنبي بروس الجهال
ولا عمايم تسّحگ حجول الشريفة..
احلم بدنيا نظيفة !..