سَديم

عندي شعور غريب للان ما لگيتله تفسير وهو انو اكو شخص مفقود من حياتي مادري منين اجة الشعور ومن ليمته بدأ بس احس اكو فراغ هيج فجاة اريد اروح احاجي شخص اني ماعرفه اصلا ولا ادري منو هو ولا اتذكر اني كلمته قبل حتى بس مجرد رغبه اني اروح احاجي 

غبت وراسي شگد ما انام يضل ثگيل وكلساع دايخه وبطني توجعني ولابدة عن ابوي لا يدري بيه غايبه واختي داومت غصبا عليها ويجوز امي حسبالها انه مداومه همين هسه شنو اضل بالفراش واكمل نوم لو اگوم اسويلي شغله

Two birds on a wire,
          One tries to fly away,
          And the other watches closely from the same wire,
          He says he wants to as well, but he is lying.
          

اتمنى ان تطير اجنحتك الى ابعد مكان ، حتى ولو كان بعيدا عني، ان تكون حرا تلامس نسمات الهواء وجهك وتداعب خصلات شعرك ، ان يطير قلبك قبل ان ترفرف اجنحتك ، ان تكون حرا وان تكون انت ، فانا احبك عندما تكون انت .
          _بقلمي

راح ينقلون مدرستنه لبنايه جديدة بنايه صينيه انوب الدوام من 8 لل1 يعني شوف الانتقاله احنه متعودين نداوم ثلاث ساعات ونرجع مكسرين هيج فجاة يسوون الدوام هلگد يجوز نموت قبل لا نخلص مدرسه 

المدرسين ذيج السنه يگولون علينه نفس الوجوه كل سنه نلگاجن نفس الوجوه عود يابه راح نرسب انوب احنه هاي السنه كلما يجي مدرس نصيح نفس الوجوه من گد ما لعبانه نفسنه ونريد يغيرونهم واحدهم يداوم باربع مدارس ولازگ النه لو شاغر ولاهيج مدرسين 

نفحه امل مفاجئة احس انو عندي امل قوي جدا وباذن الله استمر طول هاي السنه على نفس الامل نذرت هاي السنه للدراسه وماريد اي شي غيرها .

وما زالت الاحداث تتكرر معقول اگدر اطلع. اعدي كلشي وهو كلشي باقي على حاله وما متغير احس كلشي جاي يرجع لورة ماكو شي جاي يتقدم بالعكس حالتي تسوء اكثر واكثر 

شيء عجيب ان في كل مرة امر بيها بلحظات قله ايمان فكرة بداخلي تخلي عقلي يتراجع عن كل افكاره المعارضه للدين الا وهي الموت من واني طفله رغبتي بالموت و فضولي تجاهه كانت اكبر من الحياة بالنسبه الي والرادع الوحيد لفكرة الانتحار هو فقط وجود اله يكره هذا الشي وانو حياتنه و كلنه ملك له هو وليس ملك لانفسنا لذلك في كل مرة افكاري تقودني لطريق خاطئ كنت انتقل تلقائيا لفكرة الموت كون الحياة بلا هدف وهذا الشي يخلي عقلي يتراجع عن كل افكاره حتى يحمي نفسه .

اليوم اول يوم مدرسه و من گد ما متكرر المدرسات عادن نفس النكت حتى احس صابتني لعنه ودخلت بدوامه تكرار وراح ينعاد السادس الى الابد