roua1901

حياش الناس والهزوة 
          	
          	نستغرب في اللي يتعاملو على إنهم غير.. 
          	
          	حياشهم غير .. نسبهم غير .. 
          	
          	صغارهم غير ومتخيلين انهم إستثناء وانهم ديما بخير ..
          	
          	نتكلم بالتحديد( عالناس الهزاية) 
          	
          	راهو في كل حوش في حاجة ناقصة وقلة راحة في نقطة معينة 
          	
          	لكن الرضا والصبر هما اللي يمشو في الحياة 
          	
          	النقص وقلة الراحة متوزعة على كل حوش …
          	
          	الحوش اللي مافيشي موت وفقد ،فيه مريض 
          	
          	وفي حوش  فيه مراهق مدهش اماليه، وفي الطايش اللي مشهدر بأهله 
          	
          	وفي ديار تبكي فيها المطلقة وماحدش يندري عليها …
          	
          	وناس عندهم أرملة تجري وماتدري على صغارها
          	
          	  وفي البو الواعر وفي البو اللي مايصلحش وفي البو اللي مهناش أصلاً.
          	
          	 وفي الام اللي تفرق في المعاملة وفي الام القاسية 
          	
          	وفي الام الظالمة وفي الام المظلومة 
          	
          	وفي الخوت اللي مايرحموش وفي الخوات المضطهدات
          	
          	 وفي الخوت اللي وضعهم سيء لا خدمة لا قدمة وحالهم يبكي 
          	
          	كل باب وراه سر .. وكل حوش فيه ابتلاء شكل 
          	
          	لان حياشنا حياش دنيا ..حياش مؤقتة ولو كانت ملك .. 
          	
          	لان المستقر في الجنة ..
          	
          	لذلك لما تسمعي مشكلة عن فلانة والا العيلة الفولانية صارلهم شي ..
          	
          	ردددددي بالك منها النفخة هاديكا بتع احني ماعندناش هكي واحني خير منهم .. 
          	
          	هزوتك على بنات الناس حتوليلك ..حتلقي من هازي على بنتك .. 
          	و  اللي هازية عليها لانها بلا دار نوم مرات مرتاحة اكثر منك يالي ترقدي في دار وراجلك في دار تانية …
          	
          	وولدك صح ما يحششش لكن مرات يدير في بلاوي احرف .. وغيرها وغيرها
          	
          	و لو بتقارني روحك بغيرك  تلقي حالك انتي اللي يبكي 
          	
          	ردي بالك تتخيلي روحك في معزل والا ربي مدايرك دون الناس ..
          	
          	وراهي الناس تحس !! 
          	
          	تحس بشبحاتك لمناديرهم وتقعميزتك اللي مش مرتاحة 
          	
          	وطاستك الي ماكملتيهاش تأففاً ..وجيتك اللي فوق من النفس 
          	
          	لذلك تواضعي واغلبيها النفس الدنيئة اللي واهماتك انك احسن من غيرك .. 
          	
          	وراهو في فرق بين صالح ومستور ..و بين الفلوس لما تبدأ رزق أو ابتلاء
          	
          	وراك تراب يمشي على تراب حوشك وعيلتك وصغارك وفلوسك وجمالك وكل شي عندك فاني ..فردي بالك
          	
          	تواضعو لما تخشو حياة غيركم 
          	
          	خشو حياش الناس غاضين البصر 
          	
          	وقبل ما تعفسو عتبتهم نظفو قلوبكم واطفوه جهاز التقييم اللي يخدم ٢٤/٧ .. تقول رقابة 
          	
          	خشو باش توسعو الخاطر وتقولو الكلمة الباهية ..
          	
          	وتخلو اثر طيب ..