كنت حابة أتكلم عن العلاقات المحرمة أو اللي الناس بتسميها "ارتباط"...

المشكلة إن في ناس بقت شايفة الموضوع عادي، مع إنه من أكتر الحاجات اللي بتضيع الثقة وبتوجع القلب.

إزاي نعمل حاجة حرام، وفي نفس الوقت نستنى من ربنا الحلال؟
إزاي نطلب التوفيق وإحنا ماشيين في طريق غلط؟

أنا مش بقول الكلام ده عشان أهاجم حد، بس بجد...
لو كنتوا بتحبوا بعض بجد، مكنتش العلاقة هتكون بالطريقة دي.

لو هو بيحبك فعلًا، كان هيخبط على باب بيتك، مش يدخل من الشباك... ولا من ورا التليفون.
ولو أنت بتحبها بجد، مكنتش هتأذيها نفسيًا، ولا تديها أمل وفي الآخر تسيبها.

ربنا قال:
﴿وَلَا تُوَاعِدُوهُنَّ سِرًّا إِلَّا أَن تَقُولُوا قَوْلًا مَّعْرُوفًا﴾
وكمان قال:
﴿وَلَا تَقْرَبُوا الزِّنَا﴾

يعني مش بس الفعل، لكن حتى الطريق اللي ممكن يوصّله.

طيب ليه نختار الطريق الصعب ونسيب الحلال؟
ليه نخون ثقة أهلنا ونرجع نزعل لما كل حاجة تبوظ؟

تخيل معايا...
لو حد شغال وبيسرق صاحب الشغل، هل هيترقى؟ طبعًا لا.
نفس الفكرة... إزاي حد يخون ثقة أهل بنت، ويتوقع إنهم يوافقوا عليه؟

والكلام ده مش للبنات بس، ولا للولاد بس... ده لينا كلنا.

حتى لو بتصلوا مع بعض، أو بتحفظوا قرآن سوا...
لو العلاقة نفسها غلط، فالأصل غلط.

في الآخر...
ربنا عايز يجمعنا في الحلال، مش يفرقنا.
بس إحنا اللي بنختار الطريق.

أتمنى كلامي يكون وصل ❤️
السلام عليكم ورحمة الله وبركاته.