تعارف...


انته ياهو؟
انه ذاك الفرهدو ضحكاتي جي عشت طيب گلب.

عمرك اشكد؟
بجنسيتي ميلادي زغير! بوجهي ضيم شكد جبير
عمري ما محسوب باعداد السنين
عمري تايه بين حسابات الليالي
ابين شوغات الوتين 
انه شاب وما عشت طيش الشباب 
كاضي ايامي حزن.. 

عنوانك؟ 
وين ما صحلي وجع افرش ونام 
بكل قصيده ابياتها تسولف حزن
وين ما تلجملي صوره بيهه اسكن.. 

امنيتك؟ 
ارد المك انته وغريضات عمري 
بجنطه احزاني واسافر
هاي امنيتي الوحيده شكد بعيده
جنهه توم بعين عاجر.. 

كلمه للعراق:
يعراق نسجدلك وفه والجبين ارصاص يحوي
وعاشگينك عاشگينك هندسك بالروح يضوي.. 

لاكي نفسك؟
تايه انه منين ما اكلبهه حيره 
مثل شعره وضاعت بلفه ضفيره.. 

عرف الحب؟ 
جذبه صدكهه الفقير وعاش بيهه 
ومن قست بيهه الظروف
وانكشف وهم الحبيب
شاع چذبه وعود سموهه النصيب.. 

شنو الحيره؟ 
الحيره من تنطر بشر مو مالتك..

والغربه؟
الغربه مو غربه وطن!
الغربه من تنزف حزن
واطشرك اهموم الزمن، وما تلكه ليلمك حضن..

صديقك الوفي؟ 
 الحزن والوحده والهم
هنه ذني الصاحبني..

انته وينك؟ 
انه ذاك الكتاب المترب اعله الرف.. 

خايف؟ 
مثل خوف الطفل من يدخل اول صف.. 

زين شسمك؟
اسمي تقراه من اموتن من تجي تزور الگبر.. 

نصيحهه الي؟ 
شيل روحك لا تنطر يشيلك بشر.. 

اختصار الحياه؟ 
كلهه ايام ونودع ماتضل بس الصور..