user90405954
في حياتنا مش كل الناس جايين بيش يقعدوا… في ناس يجونا كأنهم قدر، كأنهم رسالة، يفتحوا فينا أبواب ما كناش نعرفوا حتى إنها موجودة، ويخلّونا نشوفوا روحنا بطريقة مختلفة. يعطونا درس… يمكن قاسي، يمكن موجع، يمكن يخلينا نطيح ألف مرة، لكن في كل مرة نوقف، نكونوا مش نفس الشخص اللي كنا قبل.
الغريب إننا احيانا نفهموا الدرس بعد ما يمشوا، بعد ما يخلّوا فراغ كبير، بعد ما نتعبوا من التفكير والسؤال: “ليش صار هكي؟”. وبعدها فجأة… كل شي يوضح. نعرفوا إنهم ما كانواش جايين بيش يكملوا معانا الطريق، كانوا مجرد محطة، مجرد تجربة، مجرد انعكاس لحاجة لازم نتعلموها.
والأقوى من إنك تتعلم الدرس… إنك توصل لمرحلة تقول فيها: “أنا مش نادم، لكن حتى لو رجعوا، ما نبيهمش في حياتي مرة ثانية.” مش كره، ولا قسوة… لكن وعي. لأنك عرفت قيمتك، وعرفت إن السلام اللي وصلتله توّا، أغلى من أي شخص ممكن يرجع يعكّر هدوءك.
في ناس وجودهم كان ضروري بيش يعلّمونا شنو ما نقبلوش، شنو ما نرضوش بيه، وشنو الحدود اللي لازم نحطوها. علّمونا إن القلب الطيب مش معناها نسمحوا بكل شي، وإن الحب مش معناها نتحملوا الألم.
وأجمل مرحلة توصلها… لما تتذكرهم بدون وجع، بدون حنين، بدون رغبة في الرجوع. مجرد ذكرى، درس، صفحة وتسكرِت. لأنك فهمت إن بعض الأبواب لو تفتحت مرة ثانية، مش حتعطينا فرصة جديدة… حتعطينا نفس الألم بطريقة مختلفة.
فخليهم يمشوا… وخلي الدرس يقعد. لأن الناس تمشي، لكن الوعي اللي يخلّوه فينا… هو اللي يبقى، وهو اللي يحمينا المر
Aua2345
@user90405954 اكيد كل كف يعلمك الحداقه وتاخد منه درس يفيدك القدام بالنسبه ليا ولا عمري فكرت نعطي شخص اكبر من حجمه ومعمريش تمسكت ب اشخاص ولا تعلقت فيهم الي بيمشي الباب يفوت جمل الانه في النهايه ي ح يخسرو الانه مستحيل يجو يلقو نفس الانسان مرتين الي مشي مع السلامه وسكري وراه الباب بلا رجعه
