بعد لتودي طيفك ليلي مابي شوگ
اجاني وباب جفني بوجهه سَديته
انه من الورد ضليت اضم الشوف
لان كلش يشبهك ما اشتميته 
بخيم صدري الزعل زعل هوَاي حروف
حجيت وماي وجهك ما ندليته
الك چنت التفت وادري انت ماموجود
اذا ببالك حرف من اسمي عديته
بعد ما التفت لو سِما بظهري أطيح
حسبالك گبل ؟ لا گلبي چويته
گمت اخذ نفس وبريتي ينزل غيم
واندليت علتي وجرحي كضيته
روح الهوا بظهرك والهويته يروح
مو بس شوفي عنك سمعي غضيته
گبل ليلك وخلگي اتسابگن بالطول
العلي ماكفه هسه بروحي كفيته
انه بخد النده تلگاني طايح ماي 
وصُوت النفس يصهل بأذني خليته
روح اترس فراغك بالبرود البيك
انه وجه الشمس بالملگه غطيته