ـ ‌رُوهَات .

My leg shaking makes me nervous   .ʼ 

الله يِدري بِكُلّشي
            يِدري بالتَّعب اللّي حابِسه بِداخلك وما گِلتَه لأحد
            وبالكلمات القاسية اللّي غِصِّيت بيها وكَسرت خاطرك
            يَعلَم بيك مِن جِنت تِتمنّى يِبقَون وِيّاك للأبد وخَذلوك
            ومِن چِنت تِظنّهم سَنَدك وتالي بَقيت وَحدك بِنصّ الطَّريق الله شايف أَحلامك اللّي ضاعَت فَجأة
            وطاقتك اللّي خَلصَت علىٰ ناس ما تِستاهِل يِدري شكد تِحاوِل تِبتسِم بِوَجه الكُل وأنتَ مِن جَوّه مُهشَّم وتِريد بَس تِنعَزِل بِغُرفتَك يِدري بِقوّتَك الوَهميّة گُدّامهم وبِضَعفك الحَقيقي بينك وبين نَفسك يِطمِّنك إنُّ هو يَعرِف نيّتَك الصّافية حتّى لو النّاس فَهِمتك غَلَط أو اتَّهَموك بِأشياء مو بيك لا تِشيل هَم الله يَعرِف ثِگَل الحِمل اللّي عَلى چِتفك ويَعرِف حُزنك وتَفاصيل مَأساتك والأهم مِن هذا كُلّه هوَ وَحده اللّي راح يِجبُرك 

كاعدة أِقره قُرآن فالفتَتني آية تِگول
            ﴿ذٰلِكَ بِأَنَّ اللهَ لَم يَكُ مُغَيِّرًا نِعمَةً أَنعَمَها عَلىٰ قَومٍ حَتّىٰ يُغَيِّروا ما بِأَنفُسِهِم وَأَنَّ اللهَ سَميعٌ عَليم﴾
            صَفَنت بيها شَوي وعِرفت إنَّ التَّغيير الحَقيقي ما يِبدي مِن الظُّروف يِبدي مِن داخِل الإنسان هواي مِن النّاس يِگولون لو الظُّروف تِتغيَّر أِتغيَّر بس هاي الآية تِگول العَكس تِغيَّر إنتَ أوّلًا حتّى تِتغيَّر الظُّروف يعني الإنسان مِثل المِفتاح إذا صَلَّح نَفسه أَفكاره ونيّتَه العالَم حَوله يِبدي يِتبدَّل تَدريجيًّا بالنِّهاية الإنسان إذا خَرِب داخِله ما تِنفَعه أَلف نِعمة بَرّه وإذا صَلَح داخِله حتّى القَليل يِصير بَرَكة

هُو فِعلًا راح يِجي اليوم اللّي أوصَل بيه لِحُلمي وتِضحَكلي الدُّنيا؟ راح يِنتهي هالتَّعب وهاي الصُّعوبات؟ وهاي الطَّريق المِليان عَثَرات وانتِكاسات؟ راح تِرجَع ابتِسامتي؟ ويِرجَع وَجهي اللّي مِليان حُزن يِورِد مِن جديد؟ زِين راح أِكدر أَبقى صامِد؟ وناسي راح يِبقَون وِيّاي؟ ومُستقبلي؟ شَوكت يِجي ذاك اليوم والوَقت اللّي تِنحَل بيه كُلّ هالمَشاكل؟ يا تُرى قَريب لو بَعده بَعيد؟ أَسئِلة هواي تِدور بِراسي بس فَجأة ومِن دون ما تِعرِف شصار يِنفِتَحلك باب أَمَل ويِزيدك حافِز حتّى تِگوم تُقاوِم
            وتِحِس إنَّك راح توصَل وراح تاخُذ اللّي بِخاطِرك وبالنِّهاية كُلّشي يِجي مِثل ما تُريد وكُلّ هذا بِفضل الله إنتَ بَس لا تِيأَس وأهلنا يِگولون مِنْ باب الكَوثر الفَرَج