yashironine
امس كان آخر يوم لي في ثانية ثانوي ، كان يوم حلو و ما نتوقعش اني ننساه ولا الشعور اللي حسيته فيه ، وقت كانو البنات يبكو و يودعو في بعض كنت زي الاطرش في الزفة لاني قاعدة مش مستوعبة اني ممكن معاش نشوفهم .. و كأني ح نرجع نشوفهم غدوة و نرجع نقعمز في فصلنا و نشوف أبلاتي و نحضر حصصهم ، السنة هادي كنت محظوظة بفصل و ابلات انسجمت معاهم كأنهم عيلتي، 5/2 رغم قصر الوقت اللي قضيته معاهم إلا اني حسيت روحي منهم و فيهم و انه هذا مكاني و البيئة اللي تناسبني و هذا شي نادر نحسه … ان شاء الله ما نتفرقو سنة ثالثة لاني عارفة روحي بنستاحشهم ، و رغم كثر الاحداث و الاكشن اللي صار السنة هادي إلا انها كانت سنة كويسة من الجهة النفسية اما دراسياً انضغطت ضغط مش طبيعي ، اخيرا تخصصت بعد سنين من الانتظار ، و اخترت الدرب اللي ما كنتش متوقعة روحي نختاره ، ان شاء الله ما نندمش على اختياري ، بذلت جهد كبير السنة هادي و اغلب وقتي مشي و اني شادة الكتابات ، السنة الجاية ح تكون النهاية و مش قادرة نستوعب اني بنطلع من المدرسة ، خاطري نعرف شن ح تكون ردة فعل جيداء متع صف سادس لو عرفت ، نحس في روحي كأني وحدة سرحت في نص المشوار و قت روحها قريب بتوصل ، مسرع مع الوقت يجري امس كنت في الابتدائي نسأل في روحي كيف بنكمل المشوار الطويل هذا من غير مطبات و حفر، و اليوم اني في بداية النهاية بعد سنين من محاولات الاستمرار ، ربي يتمم لي على خير و ان شاء الله ننجح و نجي نحكي اهني من جديد
