zhr_f19

شربني الزمان هموم من كاس 
          اقسى وامر مِـنْ سِّم الثعابين 
          تجرعتـه بِصـبر مـا سمعت ناس 
          لَچن يا حـيف فضحتني النياشين 
          انا الروحي جبـل يهدمني يا فاس 
          وانا المرمـر التنحد بي سچاچين 
          لَخلي جفون عالدمعات حـراس
          واگل للعين فنـچ بعد تبچين
          ولو نارچ چبيرة وعيـب تنقـاس
          لچنها گواي بيچ شگد تحـملين 
          اذا وصلت منيتـي بگطع الأنفاس 
          واجب من يمـر شامـت تضحكين 
          مرمـر سگف روحي واصلب السـاس 
          ولا مِـنْ جام بيتي وسـاسي من طين 
          وطـبع بالروح يشبه ورگـة الـياس 
          يتكاثر عِطـرها بفرك الأيدين

لَـون لوحتك وردي الحياة الـوان 
          خّلص عمرك لَوحتك مَلت الـداكن 
          ولا ترسم جْبل ارسم نهر بي روح
          وارسم ريح بلَكي تّحرك الـساكن 
          بلكي من النهر يطفح رْكاد الـغيض 
          ويطگ زود ويهدم سدة الـ لـكن 
          وعلگ عالوجه ضحكة وأمل بالـروح 
          بزوايا العين كافي شچم حزن راكـن 
          وفك باب القفص خلي الأحلام تطـير 
          وانتَ مِـنْ الطفولة شچم حلم ساجـن 
          ووخرها  الستارة الشمس خلي تفـوت 
          ولا تخلي الجروح تبين الـباطن 
          كلها تموت صفرة الموت هم بي لـون 
          عاجبني الگطن للموت ميـهادن 
          ولاتضم فرحتك طلعها ما مـرخوص 
          ولو هذا الزمان الفرحتك فـاطن 
          وسرك لا تودعه البيِّر ما يـخفيه
          الدلو لو مَر عليه يطلع شـدافن 
          اشتري وبيع بحياتك اخسر ولاتـخاف
          المهم سوي التريدة وجازف وراهـن !