🔥دار المتعة🔥

الفصل : 9

الجزء 41
<br><br><br>
دخلنا للدار وانا فرحانة .. مكرهتش نبقا نقصر الليل كله معاه.. ولكن فارس دغيا استأذن ودخل ينعس.. الزهر.. وحتى مي هنية كانت عيانة بزاف دخلات تنعس.. اما انا دخلت لبيتي .. لحت الطالون كل فردة فجهة.. جلست فوق ناموسيتي وحطيط رجل على رجل .. وجلست كنستحضر الذكريات اللي دازولي ليوما معاه.. قلبي يا انا .. لا يتحمل.. كيفاش كيشوف فيا وكيفاش انا كتتلفلي الهضرة معاه.. كينزل عليا الحياء.. كنموت عليك افارس.. كنموت.. نضت كنغمي وكنشطح الكلاسيك فالبيت.. حيدت التكشيطة وبديت كنشطح غا ب دوبياس.. فلحظة تقلبت وشفت فالمرايا.. بانلي جسمي.. يا ربي .. كله طبعات .. واثار ضربات.. السيكاتريس ديال الكريساج فيدي قداش.. والحرف ديال ايهاب ففخذي .. وبعض الضربات كان دايرهم ليا هو نيت باقي اثرهم لحد الان.. وشي قديم ديال خويا.. واش غانوري هاد الجسم لفارس.. اكيد غايكرهو.. علاش كلما حلمت كنفيق فجأة.. تشهيت راسي شي مرة نحلم ونبقى كنحلم بلا منفيق.. حتى الاحلام .. مبقاش ليا فيهم مكان..لبست حوايجي وغطيت راسي.. وحليت شعري.. وحيدت الماكياج.. ودخلت نتكمش فبلاصتي.. نعسي اكرام نعسي.. من الاحسن نرجع لاحلامي.، ونضحك.. باراكة عليا من الواقع.. باراكة.. فارس.. تصبح على خير حبيبي 😁 ههه
فقت الصباح وفذاكرتي شخص واحد.. وهو فارس.. نضت ناشطة ومشيت نوجدليه الفطور.. مشيت وجدتو لقيتو جاي وهاز فيدو جاكيتة وفيد اخرى صاك ديال البيسي..
فارس: صباح الخير
اكرام: صباح النور.. نعستي مزيان
فارس: بخير .. ونتي
اكرام: حتى انا..
جلسنا فطرنا وحشمانين من بعضياتنا.. شرب قهوته الصباحية اللي منوجدهالو يوميا.. شاف فالساعة ..
فارس: اووه تعطلت.. انا غانمشي.. تهلاي فراسك وفالواليدة.،
اكرام: واخا.. حتى نتا تهلا فراسك.،
اول مرة كيقولي تهلاي فراسك.. قلبي يانا..
بديت نخمل بنشاط.. ناضت مي هنية فطرات وبقات تهضر معايا.. حتى سمعنا الصونيت فالباب.. قلبي تقبط.. شكون كيدق .. ياكما ايهاب..
هنية: فتحي ابنتي..
اكرام: انا خايفة يكون ايهاب..
هنية: طلي من السرجم.. الى كان هو متحليش..
اكرام: واخا
جريت طليت من السرجم،، لقيتها بنت .. جاية وهازة معاها باليرة.، تكون زعما بنت مي هنية..
هنية: شكون ابنتي.،
اكرام: وحدة هازة باليزتها..
هنية : فتحي الباب .،
مشيت حليت.. شافت فيا البنت من فوق لتحت،، عبراتني بعينيها ودخلات جرات موراها الباليزة.. مشات سلمات على مي هنية ببرود. .. مشبت عندهم ندير الصواب
اكرام: تشربو شي خاجة.،
البنت: الا
هنية: صافي ابنتي سيري لشغالك.،
مشيت للكوزينة واكتيفيت ودني.. وبديت نسمع
هنية :شنو جاية ديري هنا
البنت : جاية نشوف فارس.. باقي ماجا من الخدمة؟
هنية: سمعي ابنتي.. معندك شغل مع فارس.. نتي مرت الراجل.. وفارس ولا غريب عليك.. بعدما طلقك..
البنت: فارس ولد عمي.. ومن حقي نتلاقاه ونشوفو..
هنية: الله يرضي على بنتي لما سيري.. ولدي تعدب بسبابك بزاف.. ومكانش ساهلة عليه يرجع يعيش من جديد.. متجيش دابا تمرضيه تاني..
البنت: انا غانجلس .. حتى يجي فارس.. وهو اللي يجري عليا..
جلسات وحدارت رجل على رجل.. وجبدات تلفونها كتلعب فيه ومدارت بحساب خالتي هنية كاع.. ناري هادي طليقتو.. علاش راجعة دابا وفهاد الوقت بالضبط.. والاهم من هادشي كله.. هي زوينة😭 .. فين نبان انا.. هي الطاية وكتعرف تلبس.. وباينة بنت الناس.. انا والو معاها .. واااع علاش علاش.. شديت شي خص كنت باغا ندير بيه شلاضة للغدا وبديت ناكل فيه بالفقصة.. كناكل ناكل ناكل.. مللي انتبهت لقيت راسي واكلاه كله.. شوية سمعت الباب تفتح،، اكيد فارس.. نضت وبقيت نطل.. بقا كيشوف فيها بصدمة.. طلبات منو يمشيو يهضرو فغرفة المكتب.. مشا معاها 😭😭 كنت كنتوقع انه غايطردها ويقوليها نسيتك.. شكون نتي ا اكرام باش يبدلها بيك ..
الجزء 42
<br><br><br>
بقيت كناكل الهوايش.. وكنتفقص ونوجد فالغدا.. فيقي صافي فيقي.. نتي هنا غا خدامة.. ومولات الدار هي هادي ورجعات لدارها.. مالكي نتي ومالهم.. كنقشر البطاطا بالفقايص وكنسب ونعاير.. الله يجعل كاميو يدوز فيك.. الله يهرس ليك ضلوعك ضلعة ضلعة ومايلقاو ما يجمعو فيك.. الله يخليك بالخلا ويجيب شي جايحة تديك.. هنية: علامن كتدعي .، اكرام: 😳والو.. انا دعيت.. هنية: من الصباح ونتي تدعي.. علامن؟ اكرام: تى واحد.. هنية: ايوا وجدتي شي غدا.. مالك موجدتي والو ليوما.، اكرام: عشرة دالدقايق يوجد.. هنية: غاتسحريه باش يوجد.. اكرام: صافي اخالتي.. هانو غايوجد دابا.. هنية: عمرك ماقلتيلي اخالتي .. اش واقع.. اكرام: سمحيلي امي.. مقصدتش.. واش سالاو هضرتهم.. هنية: ااااه.. فهمت.. معرفتش علاش جاية .. وبيني وبينك خايفة تاكل عقلو مرة اخرى.. هاديك الافعى مسمومة.. انا مكتحتارمنيش راكي شفتي.. اكرام: 😱 ممكن .. تقدر تخليه يرجع ليها.. هنية: مم .. واش هاد الموضوع مقلقك 😌 اكرام: ام .. لا غا باينة فيا محاملانيش.. تقدر تجري عليا من الدار.. هنية: الى خرجتي نتي.. حتى انا غانخرج معاك.. تهنيتي.. اكرام: لهلا يخطيك عليا امي.. هنية: فين الخص .؟! اكرام: امم لقيتو خانز.. ورميتو.. هنية: فين رميتيه.. وريلي.. غريب انا جبتو بيدي من السيد اللي كيبيعو فالكارو ديالو.. اكرام: امم لحتو من السرجم.. هنية: صافي فهمت.. الفقصة دير كتر ههه اكرام: اي فقصة 😳 هنية: ههه وجدي الغدا دغيا.. راه فارس تابعاه الخدمة.، اكرام: اه باينة هنية: اشنو قلتي.. اكرام: والو.. بقيت جالسة على نار.. حتى سمعت الباب تفتح.. نقزت من بلاصتي باش نمشي نشوف.. لقيتها خارجة فرحانة ومشات عند باليزتها وهزاتها وطلعات لفوق.. تما قلبي حرقني.. صافي تصالحو اكيد.. كنت غانبكي وعينيا غرغرو.. رجعت بانكسار لعند لغدا وبقيت كنصاوب ونحط على الطبلة.. يديا كانو فشلانين بزاف... جيت نحط واحد الطبسيل وانا نلقا فارس فالباب وداير يديه فجيابو.. الحركة اللي معروف بيها .. مقدرتش نطلع عينيا بقيت منزلاهم قدامي ومكملة شغلي.. خفت نضعف ونبكي قدامو.. ونتفضح باللي حلمت حلمة كبيرة عليا.. شفتو جر الكرسي وجلس .. وهو ساكت.. امه جات جلست حداه وانا بقيت كنحط .. حتى ساليت.. شوية لقيتها قدامي.. زدت جعرت وخبيتها فقلبي.. فارس: جلسي اناريمان.. ناريمان: معرفتونيش .. شكون هاد السيدة.. هنية: هادي بنتي.. فمثابة بنتي.. كتقوليا امي .. ناريمان: اه جبتوها من الزنقة.. فارس: ناريمان 😠 ناريمان: صافي ما قلت والو.. اكرام: بصحتكم.. استسمح غانطلع للبيت.. فارس: اكرام جلسي تتغداي.. اكرام: بصحتكم.، عيانة شوية وباغا نرتاح.. خرجت وانا نسمعو كيهضر معاها فارس: واش كان ضروري تقللي من احترامها.. هانتي حرمتي عليها الغدا.. ناريمان: بشوية عليك.، مالي اش قلت.. حتى لهاد الدرجة كتخافو على مشاعرها.. وزايدون انا ما قلت حتى حاجة عيب ولا غلط.. نتا اللي قلتيلي راه كانت فالزنقة وامك طلباتها تجلس معاكم.. زدت تفقصت كتر وطلعت للبيت وسديت الباب .. وانا نطلقها بالبكا.. حسيت الدموع كيخرجولي من الاعماق.. حسيت بالحكرة.. ومن جهة اخرى حسيت بخيبة امل اخرى.، حيت حسيت من جهة فارس بشي حاجة صادقة.. والمشاعر الزوينة كنت كنفتقدها .. ومحرومة منها.، وبقات فيا حيت تجرحات.. مشاعري اللي مابقيت كنملك فالدنيا غير.، بديت كنبكي وكنخرج فدموعي .. شفت فالمرايا.. كانو عينيا منفوخين وحومر بزاف بالبكا.. عمري حسيت بحال هاد الحرقة حتى مللي كانت حياتي كتدمر.، مكنتعلمش من اخطائي.. اكرام نتي شفتي بعيد.. شكون نتي وشكون هوما.. عندها الحق جابوك غا من الزنقة.. حمدي الله حيت رضاو يعطيوك بيت ويسكنوك بيناتهم.. هادشي وماكنتيش كتحلمي بيه.. واش كتتخيلي ان فارس بعدما عرف ان ايهاب شبع لعب فيك .. غايرضى بيك ويفكر فيوم من الايام يتزوج بيك.، غاتكوني هبيلة وكتحلمي.. اللي سميتها ناريمان واخا خانتو الا انها فنظرو نقية اكتر منك.. دخلت فالمانطة وتكمشت وفزكت المخدة بالدموع.. كنت كنحس ان شي حجرة محطوطة على قلبي.. بقيت متكية وكنبكي.، حتى سمعت الدقان فالباب.
الجزء 43
<br><br><br>
شوية تفتح الباب لقيت مي هنية دخلات.. مسحت دموعي دغيا.. وجات عندي جلسات حدايا.. هنية: مسحيها فيا ابنتي.. عارفاها جرحاتك.. اكرام: عندها الحق تقول اللي بغات امي.. هي راه مولات الدار.. هنية: هي ماشي مولات الدار .. وحيدي هاد الوساوس من بالك.. اكرام: يكفيني انك والسي فارس .. قبلتو اني نجلس معاكم ودرتو فيا الثقة.. هادشي على راسي وعينيا.. ولو بقيت كنخدمكم حياتي كاملة مغاديش نردليكم الجميل ديالكم.. هنية: السي فارس!!! دغيا قلبتيها للرسميات معاه.. ههه اكرام: هادي هي الحقيقة اللي مخاصنيش ننساها 😓 هنية: اجي ابنتي.، (عنقتها) نتي راكي بنتي اللي مولدتهاش.. وغايبقا مقامك عندي كبير.. مهما كان الحال.. رتاحيت بزاف فحضنها.. هادي هي الانسانة الوحيدة اللي كتفهمني فالدنيا.. غمضت عيني وقررت ننسى كلشي.. مهما يكون الحال.. ونعرف قيمتي.. نعترف بالجميل اللي داروه فيا.. هنية: نوضي تاكلي راه خلينالك حقك فالغدا.. اكرام: مقادراش امي .، غاننعس يمكن نوض مزيانة.، وديك الساعة ناكل.. هنية: باغا تخليني مع ديك المسمومة بوحدي.. اكرام: هاديك بنتكم.، ومغاديرليك والو.. خليني على راحتي امي عفاك.. هنية: واخا ابنتي.. كما بغيتي.. خرجات مي هنية وانا بقيت فالبيت .. منعستش طبعا ولكن بقيت كنفكر .. فداكشي اللي وقع كله.. حسيت براسي كيحرقلي.. وانا ماقادراش نرتاح.. وصل الليل . سمعت الطوموبيل ديال فارس جات.، ووصل للدار.. قررت ننعس بزز ولكن مقدرتش.. كلما سمعت شي حاجة كتخصو كنتألم.. منقدرش نمنع راسي اني نفكر فيه.. كنبغيك بكل ما تملك الكلمة من معنى.. هو الوحيد اللي حسيت اني انسانة معاه وعندي ولو قيمة بسيطة.. جات عندي مي هنية.. هنية: بنتي نوضي تتعشاي اكرام: مافيا ما ياكل امي.. والله ماعندي منين يدوز.. هنية: فارس هو اللي صيفطني..سول فيك بنفسو.. اكرام: بالصح 😳.. ااا واخا.. لا قوليلو نعسات.. هنية: ههههه واخا .. ناضت مي هنية وخرجات.. كتزيد تفقص فياوهي فاهمة اني كنغلي من جهة فارس.. وعلاش مدابزاتش معاه.. مللي جات ديك الزمرة.. زعما يكون نسا اش دارت فيه.. وباللي طيحات الدري اللي منو.. وباللي بدلاتو بواحد اخور.. اش كنقول دابا .. اوووف.. درت مخدة على راسي باش ننعس والو.. الليل كله وانا جالسة كنتقلب وعينيا محلووولين كنسدهم بزز ومكيبغيوش يتسدو.. فين تكون بايتة هاديك.. 😱عندك تكون بايتة معاه.. قفزت من بلاصتي ونضت خرجت من البيت وبقيت كنتمشى بشوية باش نشوف .. وصلت بيتو بقيت كنتصنط لا نسمع حسها لداخل.. والو السكاات.. جيت راجعة لبيتي وسديت الباب.. بقيت جالسة مفقوصة.. بقيت شي ساعة وانا جالسة كنشوف فالسقف وتكول واش بغا يجيني النعاس.. حتى سمعت الباب ديال بيتو تفتح ونزل فالدروج .. نضت بغيت نشوفو .. ياكما مشا عندها.. الوسواس وما يدير.. بقيت كنشوف ونقلب عليه بعيني.،. حتى سمعت صوت ماعرفت منين خرجلي.. فارس: واش مازال فايقة؟ اكرام: 😳 ال اه.. فارس: علاش مبغيتيش تجي تاكلي.. بقيت كنستناك.، اكرام: كتستناني انا؟ اه كنت عيانة .. فارس: ودابا وليتي لاباس ؟ اكرام: اه لاباس.. ونتا لاباس.. فارس: لا .. اكرام: تصبح على خير 😒 دخلت لبيتي وخليتو.. مبقيتش باغا نعطي امل كتر لراسي.. زيرت على عيني ونعست بزز.. صبح الصباح مبغيتش نوض نوجد الفطور لفارس خليتو.. وبقيت كنطل من السرجم.. وكنشوف حتى خرج عاد تهنيت.. جمعت بيتي .. حسيت بالجوع.. وانا نوض مشيت الكوزينة نوجد ما نفطر.. الكرش كاع ما كتحزن.. وجدت القهوة وجي حلويات وفطرت.. شافتني مي هنية وضحكات.. وانا نلقا ديك العوجة جات عندي.. ناريمان: تيقتي راسك.. وجيتي شادة لفارس فدراعو نهار العرس.. وانا نفهم.. شافتني ولا وصلوهاليه.. اكرام: فيها شي عيب.. العيب الى لصقت فيه ولا لحت عليه راسي.. انا الحمد لله هو اللي باغي نشد فيه .. وهو اللي عطاني دراعو.. وانا قبلت.. عرفتي علاش.. حبت انا كنقدر النعمة اللي كنشوف قدامي.. ماشي بحالك كنركلها.. حسيتها غانتطرطق.. واخيرا عرفت حتى انا نقصف جبهتها.. نرد عليها جواب يخليها تسد فمها ومتوليش تفتحو.. فعلا داكشي اللي وقع.. وسداتو وماعاوداتش هضرت.. جمعت المواعن وغسلتهم.. وطيبت الغدا دغيا.. قبل ما يجي فارس .. طفيت عليه.. وطلعت لبيتي.. بقات مي هنية كترغبني نبقا .. مابغبتش.. بقيت فالبيت كنضورها فدماغي.. كيجيوني شي افكار ديال ابليس فالبال.. نسممها ونتهنا.. سمعت فارس وصل.. وانا نزير على قلبي.. بديت نهز ونحط بلا منحس.. حتى سمعت الدقان فالباب.. اكيد هادي مي هنية.. جاية تطلب مني ننزل عاود.. نقزت ومشيت حليت الباب.. وانا نتصدم مللي لقيت فارس هو اللي كيدق.. اكرام: 😳.. نعام اسي فارس.
اكرام: 😳.. نعام اسي فارس.. فارس: سي فارس.!! يعني غضبانة مني.. نقدر نعرف اش درتلك..؟ اكرام: والو.. 😔 فارس: سمعيني .. ناريمان جات عندي باش نعاونها تطلق من راجلها بصفتي رجل قانون من جهة ومن جهة اخرى حيت ولد عمها.. هادشي اللي كاين لا اكتر.. اكرام: نسيتي كاع داكشي اللي دارت 😒امم بغيت نقول.. نتا تعرف .. علاش كتبررلي انا.. فارس: لا منسيتش.. ولكن نسيت اني فيوم من الايام كنت كنبغيها.. ناريمان بنت عمي وصاف فهمتي.. ماشي كتر.. اكرام: 😥 فارس: زيدي قدامي تتغداي.. وما عمرك تعاودي تغبري بلا ما تواجهي.. سمعتي.. عرفي شنو كاين عاد غضبي الى بغيتي.. خرجت من البيت قدامو بلا منحس.. ياي تأثيرو عليا كبير .. زعما علاش غايكون كيبررلي .. زعما داكشي اللي فبالي.. اوف اكرام واعدتيني انك مغاديش تبقاي تحلمي بزاف.. بوان فينال.. نزلت معاه وجلست فالطبلة بعدما جرلي الكرسي .. وبدا يحطلي قدامي.. وديك العوجة غا كتشوف بنص عين ومفقوصة.، انا زدت فيهم وبديت نضحك عندو .. غا باش نفقصها.. تغدينا وطول الوقت فارس كيشوف فيا.. والفرحة باينة فعينيه حيت نزلت نتغدا معاه.. واخا عليك غا بلاتي تشوفي..