حب وانتقام "المقدمه1"
احياناً تصير اشياء فجأة مش متوقعين انها تصير اشياء حلوه واحياناً بشعه وتهدم حياتك فثانيه احياناً نختار طريق نحنا نشوفوها طريق للجنه وهيا نهايتها جهنم🔥..
في حب من طرف واحد، وفي حب مصلحه، وفي حب حقيقي.
في قصتنا موجودات هنا ال3
_________________________
سنه 2018
نضت على صوت عياط برا😨 طلعت نجري بنشوف شن في، فتحت الباب شفت الجنينه مليانه نااس وجوه اول مرا نشوفها ووجوه ليا زمااان ما شفتها ووجوه ماليا شي كنت شايفتها تضحك
شفت ماما حاضنه حناي وتبكيي وبنات عمي عالارض يتباكن ويصوتن وعماتي حالتهن ماتوتصفش 💔
مجهول: شن فيي؟ ش ش شنن صاار😨💔؟؟
_________
سنه 2017
سيف:قاعد تشوف لصورتها صاح😉😂
منير:من قال😒
سيف:المرايه لوراك تقول😂
منير لوح عليه شيشة الميه😂😂
سيف:تيلااا سرواللليييي
منير:تستاهل
سيف:توا غير شريته يراجل بنمشي نفشك بيهه مزالل
منير ناض وسيبه يمسح في سرواله اللي قريب ويطيح من كثر ماهو منزله عالموضه على اساس😂
___________
وفمدينه اخرا ~~
ارين فالسياره تشوف للمدينتها لهاا زماان ماشافتها تشوف لكل جزء فيها بحب وحماس وفرح مش مصدقه انها في ليبيا كانت بتموت وتوصل للحوش، حوش جدها او بالاحرا قريه جدها😂❤️
لان شبه قريه حواشين ملصقات فبعض كل حوش يسكن فيه واحد من عمامها واكبر واحد ليشبه للقصر حوش جدها يلتمو فيه العيله كلها
اربع حواشين فنصهن حوش الجد لهوا الخامس اول واحد لعمي الاكبر ناصر عنده راس بنيه ندى ووليدين احمد ومحمد والحوش الثاني للسيد لهوا بابا عنده ثلاث بنات ووليد أرين لهيا انا ومنى وأسيل وبعدها حوش الجد وبعدها حوش عمي خالد عنده بنتين وراس وليد دعاء وبسمه ويوسف
والحوش الرابع حوش عمي صقر هوا حاليا يسكن برا المدينه ويجي بين فتره وفتره عنده ثلاث ولاد وبنتين سيف وعبدو ومنير وساجده وابتهال
وبرضو عماتي 2 سحر وسعاد متزوجات عندهن ولاد
نرجعو للقصه...
وصلو قدام باب كبيييرر حديد فتح مسباح(البكستاني) الباب وخشت السياره نزلت ارين وقريب تمووت من الفرحه امتلا المكان بالعيله كلها فحوش الجد وبدت الزغاريط والفرحه لان السيد روح من دبي كان فيها لمده سنه وبدو يسلمو ❤️
ارين طلعت تجري ورا بيت العيله شافت باب الحديد لصغير يفتح على حديقه صغيره كلها ورود وشجر وطفولتها كلها فتحت الباب وكانت تنط من الفرحه وتشوف للورد والمكان وهيا بتموت من الفرحه مستاحشه المكان🥺❤️
————
صقر:السيد روح من دبي
فايزه(مرت صقر):اي كلمتني عمتي وقالتلي
ساجده:بابا امتا نمشو هناك رايفتلهم🥺💔
صقر:ساهل توا عندي شغل بعد ننهي شغلي نمشو
ساجده:تمام بابا
اما منير فعالم ثاني يفكر، يفكر فيها هيا بسس أرين❤️🔥
عبدو شاف للمنير
عبدو:منير
منير:......
عبدو:منيرر
منير:هاا
عبدو:وين سارح
منير:ها🙄لا شي
سيف من ورا عبدو:يفكر فالحب😉😂
منير:😒😒😒
___________
للكاتبه الليبيه :
~~wemi621~~
___________
ارين في البلكوني تشوف للحوش الاخير معتم وباين فاضي كأنه مهجور من كثر ماهو مضلم
ارين: ليش عمي صقر، يسكن برا ليش يجي من فتره لفتره ومايطولش ويروح، نحنا مشينا دبي على اساس شهر بس صارن اشغال عطلنا وقعدنا سنهه، سنه بس وستاحشت ليبيا💔❤️
قاطعت افكارها اختها الاصغر منها بسنه
اسيل:بستت
ارين :نعم
اسيل:وينك من بدري نعيطلك
ارين وهيا تشوف للحوش عمها: مستغربه كيف مسيبين حوش محلاه والعيله وومغربين ؟
اسيل:🤷♀️ ، اصلا مش مهم وقالتلك ماما وتي روحك وبري لحوش جدو اليوم بنتعشو غادي، وطلعت...
________
في حوش السلطان(الجد ملقب بالسلطان)
سليمه(مرت خالد):شفتي ارين كابره وحاليه❤️
ندى(بنت ناصر) بحسد:اي عاديه مش لدرجه😒
حليمه(مرت ناصر):تلاقيه مكياج الله اعلم كم طبقه حاطه على وجها
سليمه:لاولله واضح مش حاطه شي هيا هك من يومها
دعاء(بنت سليمه):ولا غيرانه يا ديدا😉
ندى: من نااا تخيلي مستحيلل نغار منها شن ناقصني بس😌 بعدين نا احلا منها هيا الغيرانه
دعاء:اي واضح😂
ندى:شن قصدكك😠
دعاء شي😅، ناضت وطلعت برا
أرين ماشيه جهت حوش جدها وتشوف دعاء قدامها تشيرلها هاي ابتسمت ومشتلها
دعاء: هلا هلا بالحلو
أرين: اهلين دعدع😂❤️
دعاء: خشي خشي بسرعه لان السوسه لجوا فاتحه سيرتك سكتيها ومشت تجري للحوشهم أرين ضحكت علي حركاتها العفويه وباينه كيوت😂❤️❤️❤️
خشت وانتبهت ان ندى قالبه وجها وتشوفلها من روس خشمها قررت تقهرها😈
سلمت على الكل وجت للندى بتسلم عليها وقعدت جنبها
أرين: اهلين دندن
ندى:اسمي ندى🙂
أرين: اي عارفه
ندى: اي ارين من وين جبتيه مكياجك خياليي
أرين:مش حاطه😌
ندى:هه صدقتك😏
أرين: أي شوفي بروحك
ندى مسحت وجها وفعلا مافي شي
ندى:😨😰 ممستحيللل كذب كذب دايره حاجه
ارين ارين ماتت ضحك على تعبير وجها وجت بتمسح وج ندى ندا مسكت يدها
ندى:لا
أرين: خايفه جعفر يطلع😉😂😂
ندى:😠😠😠😠😠
طلعت ارين اان بتشوف جدها
ندى:والله نوريك يا أرين نقعد كلبه كان ما مسحت بكرامتك الارض😠
يتبع....
اليوم الحلقه قصيره بس عرفتكم على الشخصيات والاحداث الاقوا بتبدا قريب وانشالله والبارت الثاني بيكون طويل انشالله❤️❤️❤️
