أبشرك خلصوا مابقوا عندي هواي
كل المشتريهم رخصوا بيه
أصافحهم واحس باطراف اديهم غيض
كاتل منهم ومادافع الديه
بسد بوساتهم دفنوا شكَد أنياب
واكَول يجوز جانت عن حسّن نيه
ويمر طاريّ ويذكرولي للشينات
واصد لغيبه اسمي التنوكل نيه
وانه الجنت اضل واكَف بالأستعداد
من أسمع عزيز يفوت طاريه
حسبالي العدد بي ثمرة من يزود
وعن قلة الواحد تفرق المية
بس تالي ادركت طين الكَلوب اصناف
والعِشرة الطويلة تريد نوعية
على كلًّ عِشت ماخذت بس طيت
وي ليل المجازة الماشفت ضيّه
وينه وينه اللكا بيه جاي يبيع
وين الانه مطني من هوه الريه
والزم جفني خاف من ارمش يزعلون
واتناسه لحجاية البذني محجيه
ومن لكَالي حكَـ عند مُحب ماداعيّ
اكو حكَـ برجعته يعيب راعيه
عرفتلها كَمت مازاعل اليرحون
ولا ع الباب اظل متناني ليلية
من شفت الحلم ينوخذ مو ع اللون
بعد بطلت اظم احلام وردية
الناس اختلفت وظهرك اتجيّ وين
اذا ماتلّكَه حايط تكّعد ابفيه
لهسه وماعرف عايش وياهم ليش
ويذوب الثلج بس ينجوي شويه
حتى جروحي من عدهم خذتهن شوكَـ
ابد ماحسستهم بيها من نيه
من سألوني صح كَالوا اطوّك جروح
لا كَلت لشماته انطوني عيديه
شايف من تجيك الطعنة من أحباب
هيج جروحك تحس بيها روحية
تصور تبتدي تشتاكَـ للچتال
اذا جف التطعنك بيها حنيه
المهم ... عاذرهم وكلّ البقن سهلات
انا الجرف اليسامح روچ شاطيّه
حتى مننجرح مادام همه بخير
أنا بخير يعني وكلشي مابيه
************
تعرف غلاتك لوبعد
احتاج ابينهه اكثر
يالبيك لهاني العمر
ماركزت بي من مر
يمكن إذا گتلي
اشگثر تهواني راح اتحير
الليل اعد امحبتك
بس باچر اتزود اكثر
الادري بي من تبتعد
مدري شأحس ابحيرتي
صدري حفر بي خنجر
مگطوع شريان ابهر
يندفع شباچ الجفه
وبالروح شي يتكسر
اشتاگلك ...
بس الحچي المضموم
الك يتبعثر
وبدون موج احتاجلك
بالبر واحس بيك البر
مرات ادور الجيتي
اگبالك سبب يتفسر
وتلمحني احرك الخاتم
وابدي ارتبك واتحسر
وهنا اتحس ابقيمته
البس اعله شوفك يضطر
يافكة اعيون الگلب
ياميزتي البيهه انغر
مو رايدك واتنفسك
لا يانفس شي اكبر
ياروح ماتطلع مثل
روحي التموت من اكبر
انا اعرف ابزعلك گبل
ماتزعل وياي اكدر
والنوم يتركني وقت
ماتنوي عينك تسهر
ياريت ..
كل هذا الحچي
من اگعد اگبالك يحضر
ومن التهي ابعينك بعد
تهمسلي حته اتذكر
وياك اذا ماسولفت
من الصمت لاتحذر
مرات موكل الحچي
ايلم المشاعر يگدر
انا اؤمن التهوى صدگ
تتنخه بي من تعثر
روحك عليه تتگدر
تنشف لحد مايخضر
لوبرد ملگى تشتعل
وارماد خلگك ينذر
وانته اعرف اشلون اختنگ
من نسمتك تتأخر
اگبل علي روجة عتب
واتقرب ابكون اخطر
بس هاا عتب بس للمثل
مو بالزعل تتأثر
تلگاني ناطر روجتك
فارش جرف يتعذر
بس انته ردتك من چنت
مابين الاحلام افتر
ومادامك ابحضن الجفن
چف النظر خل يگصر
اوياك ابتديت ...
ابدونك اشلون ابتدي
اشتتصور
عنك ردت مرة ابتعد
والغيظ بافكاري ابحر
وتراجعت نفس الوقت
من حرت بيش اتعطر
يخفت ضواي
وما ايضل
لوشوف الفراگ ابصر
والليل يتشمت هوه
ابخيط الشمع من يزغر
