Storya sa Usa ka Maestro

Nganong Nag Maestro Ko?

Kahinumdum ba mo katong naa pa mo sa Elementary, unya pasuwaton mo sa inyong maestra og "My Self". Dili ba ang last paragraph ato kay about sa imong dreams o pangandoy sa kinabuhi? Imo ba kining tumanon o natuman na ba kini? Kung ako imong pasultihon, natuman na kini. Pwerteng tumana!

Ako, usa karon ka Public High School Teacher. Nagtudlo ko sulod na sa pito ka tuig. Ug ang akong subject nga gitudlo kay TLE. Nganong TLE? Kay skillful man ta. Daghan tag nahibaw-an, kaso basic lang halos tanan. Kabaw kog Welding, Electrical Installation and Maintenance, Electronics, Refrigeration and Air Conditioning, Woodworking ug Technical Drafting. Kung magkalisod, mutudlo sad kog Nail Care, Dressmaking, Poultry Production, Handicraft, Cookery, ug daghan pa.

Pero nganong nag-maestro ko?

Sa akong giingon sa unahan, sauna pasuwaton ta sa atong mga elementary teachers og "My Self", unya ang akong gisuwat didto kay, "I want to be a teacher when I grow up". siguro, tungod to sa rason nga ang una nako nga nakit-an nga nindot nga trabaho kay ang pagkamaestro, wala man ko kitag lawyer, engineer, doctor ug nurse sauna nga gamay pa ko.

Unya mas nilig-on pa jud ang akong gusto nga mag maestro katong pag Grade 4 nako kay nakakita ko sa among adviser nga naay gigunitan nga envelop nga ang sulod puros kwarta nga blue (tag 1000). Niana ko sa akong kaugalingon sauna nga dakoag sweldo ni Maam oy! Karon nga maestro nako, nakarealize ko nga basig teacher's loan to. Tsk. Pero, wa sad ko kaila og loan sauna. So, ibutang ta lang nga na scam ko.

Sauna sad, malingaw kaayo ko kadtong estudyante ko sa Flores De Mayo kay daghan kaayo og kanta-kanta sama sa Chikading-chikading, Ako si Superman, Who is that Man, It's I who Builds Community. Unya napa jud duwa-duwa sama sa Iro ug Iring, Open the Basket, Bring Me Game ug daghan pa.

Kato nga experience, maoy rason nga nisuway sad ko pagka-maestro sa Flores De Mayo katong nag-edad nakog katorse pataas. Unya, kahibaw jud ko nga nalingaw kaayo ko nga magklase sa atubangan, paminawon sa estudyante, ug malipay ko kung makatubag ang mga bata sa akong mga pangutana.

Laing rason ngnong nagmaestro ko kay tungod sa ako pud nga mga high school teachers nga idol kaayo nako. Naay maestra sauna sa Math nga idol kaayo nako moklase kay mapasayon niya ang lisod nga topic sa math, naa sad maestra sauna nga nindot kaayo modisiplina sa iyang mga estudyante, ug maestro sauna nga gwapo ug humot kaayo nga naka-ingon ko sa akong kaugalingon nga, "sundon ko ni si sir"

Pero sa tinood lang, katong gipangutana ko sa akong sponsor (usa ka pari) unsa akong kuhaon nga kurso sa college, niana jud ko nga Accounting, kay niadtong panahona, akong tan-aw sa akong kaugalingon, bright ko og math. Pero niana man si Father nga lisud daw ang Accounting, basin dili nako kaya. Unya niana siya, "Pagmaestro lang". Nitubag nalang sad ko niya nga, "Okay, Father! Mao man sad na akong first love." Tinood man sad noon to ug dala nasad sa hadlok nga basin dili ko niya paeskwelahon kung magtuman gyud ko sa akong gusto.

So, yeah! Murag first love jud nako ang teaching. Bisag daghan nakog ganahan pag highschool, ganahan sad ta ko mahimong Architech, Engineer, Flight Attendant ug Lawyer. HAHAHA 😂.

Ikaw, kumusta man ang imong pangandoy? Imo na ba kining natuman? Unsa imong first choice nga trabaho?