شفرة

فوبيا

رواية " شفرة"
الحلقة الاولى بعنوان " فوبيا "

أعرفك بنفسى ..  أنا أجبن شخص ممكن تقابله فى حياتك , عندى الجرأة أنى أقول وأبين إنى جبان لكن معنديش الجرأة لمواجهة خوفى .

بخاف من أى حاجة وكل حاجة..

الأصوات العالية بتخلينى مش على بعضى.

لو بالونة فرقعت قدامى أعصابى كلها بتسيب منى , ده غير ردة  فعلى اللى  بتضحك  عليا كل اللى حواليا .

بخاف من الحشرات , الطيور وكل الحيوانات.

الخوف دايما بيجيب  معاه رفيقه ( القلق ).

والقلق بيحب الإكتئاب..

الكوكتيل ده  سببلى تقريبا حالة من الهلاوس السمعية والبصرية.

بقيت بحس أن فيه حد ملازمنى فى كل مكان ....

الدكتور النفسى قطع كلامى وقال :

أنا عايزك تهدى خالص وتعرفنى بنفسك الأول , يعنى تقولى أسمك وسنك وشغال أيه وبعدين نكمل .

قولتله :

هو لازم أقول أسمى وشغال  أيه ؟!!

الدكتور قالى :

ده الأفضل علشان أعرف الجو المحيط بيك ، متخفش من ناحية الخصوصية , أنا محتاجك بس تدخلنى فى حياتك عشان أقدر أساعدك.

قولتله  :

أنا مش مرتاح فى النومة على الشازلونج .. ممكن أقعد؟

رجع بالكرسي بتاعه لورا وقالى :

خد راحتك ومساحتك..

اتعدلت وقلتله :

أسمى حازم وسنى 25 سنة , شغال جرافيك ديزاينر , أعزب وعايش لوحدى فى بيت ورثته عن أمى الله يرحمها .

الدكتور قالى :

طيب والوالد ؟

سكت شوية وقلت :

الله يرحمه ..

قالى :

ممكن تقولى والدك ووالدتك ماتوا أزاى ؟!

قولتله :

أمى ماتت من تليف الكبد و والدى مات منتحر ..

تعابير وش الدكتور ماتغيرتش لما قولتله أن والدى مات منتحر وسألنى بشكل طبيعى :

ممكن تقولى أنتحر ليه وأزاى ؟

قولتله :

لا مش عايز أقول أو أفتكر..

الدكتور تفهم و غير الموضوع، قال :

عندك مشاكل فى الشغل ؟

قولتله :

لا مفيش مشاكل خالص .

قالى :

كنت بتقول أن عندك  هلاوس سمعية وبصرية وأنه في حد ملازمك دايما.