الحلقة(8 )
صلوا على النبي♥.......
ألنهاردة النبي ﷺ تحديداً عنده ٢٥ سنة .. في ريعان شبابه .. أجمل مخلوق خلقه الله هو النبي صلى الله عليه وسلم ..
بدأ النبي يشتغل في التجارة بعد تعليمه على يد عمه أبو طالب ، وبدأت سمعته تنتشر في قريش ، وبدأت قريش كلها تتكلم على سيدنا محمد وعلى أخلاقه ، ومهارته في التجارة ، وأمانته وصدقه ووفاؤه لحد ما لُقِّب بين قومه بالصادق الأمين ..
السيدة خديجة كان عندها ٤٠ سنة ، وكانت جميلة جداً وغنية جداً ، وكانت أرملة وورثت زوجها أبي هالة وكان غني جداً وعيلتها أصلاً كانت غنية ، وكانت السيدة خديجة بتتاجر ، بس مش بتنزل بنفسها السوق لكن بتأجر تاجر عشان يشغل فلوسها فى السوق ، ويروح يبيع ويشتري ويجيب لها بعد كده الربح ( المكسب ) ..
فبدأت أخبار النبيِّ تنتشر لغاية ما وصلت لخديجة بنت خويلد .. فبدأ يدخل في قلب السيدة خديجة شئ من الحب إلى رسول الله ..
لدرجة إنها فكرت وقالت للغلام اللي بيشتغل معاها وكان اسمه "ميسرة " وسألته : ماذا سمعت عن محمد ؟ ..
فقال لها: إنه صادق وأمين ووفيّ وماهر في التجارة .. وقال لها كل صفاته صلى الله عليه وسلم ، وكل اللي قريش بتقوله عنه ..
فقالت : يا ميسرة أذهب إلي محمد واسأله هل يقبل أن يتاجر في أموالي ..
وفعلاً ميسرة راح للنبي و قال له : يامحمد تسألك خديجة بنت خويلد أن تُتاجر في أموالها .. فهل تقبل ؟
وافق سيدنا محمد .. ( ولم يرفض أنه يكون مسئول عن أعمال إمرأة ) ..
عشان نكون فاهمين بس يابنات ف رواية تانيه ودى أنا برجحها إن اللى طلب تجارة محمد مع خديجه هو عمه أبو طالب لانه كان بدأ يمرض والتجارة معدتش زى الأول فراح للسيده خديجه وطلب منها ان محمد يتاجر معاها وبعد كدا سئلت ميسره عن أخلاقه صلوات ربى عليه ...المهم نكمل...
فالسيدة خديجة بعتت ميسرة مع سيدنا محمد في تجارة لحدود الشام بمبلغ صغير (عايزة تعرف أخبار عنه أكتر) ..
وفعلاً سافر ميسرة مع سيدنا محمد وخلصوا التجارة بتاعتهم ، ورجع ميسرة ولاقى السيدة خديجة مستنياه ..ورجع محمد قبل ميسره وقص عليها مافعله والربح اللى ربحه وسألته ع ميسره فقال لها: خلفته ف الصحراء فقالت له عجل له للإقبال ..كانت عايزة تعرف اى اللى حصل...
فقالت : ما فعل محمد يا ميسرة ؟ ميسرة رد عليها بجملة واحدة قال : يا سيدتى لم
أرَ في حياتي مثل هذا الرجل قط كان يفعل كذا وكذا وكذا ، وقعد يحكي لها على أمانة سيدنا محمد وعلى صدقه وأخلاقه وعفته عليه الصلاة والسلام .. فبدأ يقع في قلب السيدة خديجة حب أكتر لرسول الله ..
وفى يوم دخلت على السيدة خديجة واحدة صاحبتها أسمها نفيسة بنت المنبه ، وسألتها عن أخبارها ، و بدأت السيدة خديجة تتكلم عن سيدنا محمد ، وقعدت تحكى لنفيسة عليه .. محمد راح .. محمد رجع .. محمد أمين وقوى وإنسان محترم قوى ..
فنفيسة فهمت وقدّرِت إحساس خديجة رضى الله عنها ومشاعرها الجميلة ..
وقالت لها : ....
يا خديجة تحبى أكلمهولك في الزواج منك ؟ فوافقت السيدة خديجه ..
وراحت نفيسة للنبي عليه الصلاة والسلام وقالت : يا محمد ما يمنعك من الزواج ؟ فسكت النبي وقال : ما بيدى ما أتزوج به .. ( لسه شاب فى بداية حياته ) ..
فقالت له : ما رأيك إذا تزوجت من صاحبة كفاءه وشرف ومال وجمال ؟ .. فالنبي قال : من هى ؟! قالت : خديجة ، فقال النبى : وكيف لى بذلك ( طب أعمل أيه عشان آخد خطوة ) .. فردت نفيسه وقالت : أنا أفعل ..
( اتصرفت نفيسة بكل ذكاء من غير ما تسبب إحراج لخديجة رضى الله عنها ) .. وبسرعة تجرى نفيسة و هي طايرة من الفرحة لحد
ما وصلت لخديجة وقالت : أبشري ياخديجة قَبِلَ محمد .. قَبِلَ محمد .. ففرحت السيدة خديجة فرح شديد ..
وهنا برضه ع قرأتى للقصص النبوى إن اللى فاتح محمد كان ميسره لانه كان قريب من النبى بالذات ف الفترة بتاعة التجارة اتعرف عليه اكتر ..
وغابت نفيسة فترة ( كأن يعنى السيدة خديجة محتاجة وقت تفكر ) .. وبعد فترة قالت خديجة للنبى عليه الصلاة والسلام : يا أبن العم وجدت فيك الأمانه وحسن الخلق .. وصدق الحديث فرغبت فى الزواج منك ..
ففرح النبي صلى الله عليه وسلم أوى وتم الزواج بحضور سادة قريش واعمام خديجه .. كان النبى بيحبها لدرجة إنه بعد وفاتها كان لما يجي يتكلم عن خديجة كان يقول " إنى قد رُزِقت حبها " ..
•• مرة كان النبي عليه الصلاة والسلام قاعد في البيت بعد وفاة السيدة خديجة .. وكان اتجوز السيدة عائشة .. فالباب خبط و كحد بيستأذن .. فالنبي قال : إيه ده .. كأنه صوت خديجة .. فيقول : " اللهم اجعلها هالة أخت خديجة " .. فيفتح .. وفعلاً تطلع هالة أخت خديجة ..
فيفرح النبي ويدخلها ويقعد يتكلم معاها لحد ما تمشي ..
•• ولما كانت كل القبائل جاية تبايعه على الإسلام وقت فتح مكه .. فالنبي يلاقي ست عجوزة جاية .. فالنبي وشه فرح أوي بعد ما شافها .. وراح خالع العباية اللي على ضهره وفرشها على الأرض .. وقعدت الست عليها .. وقعدوا يتكلموا سوا ساعة ..
وأول ما الست مشيت .. تيجي السيدة عائشة و تقول : يا رسول الله من هذه العجوز ؟ .. فيقول : يا عائشة هذه صاحبة خديجة ، كانت تأتينا أيام خديجة ..
قالت : وفيم كنتم تتكلمون ؟
قال : كنا نتذكر الأيام الخوالي .. أيام خديجة ..
•• ولما كان النبى يحكى عن السيدة خديجه .. كانت السيده عائشة بتغير لدرجه انها مره قالت : " أوليس فى الدنيا غير خديجه .. والله قد أبدلك الله خير منها " ..
فالنبي عليه الصلاة والسلام رد عليها وقال :
لا والله .. لقد آوتني حين طردني الناس .. وصدقتني حين كذبني الناس .. وواستني حين حرمني الناس ..
صلى الله على محمد .. صلى الله عليه وسلم....
نكمل المره جايه ان شاء الله♥
....................
#السيرة_النبوية
#بالعامية
