احببته غصبا عني

الحلقة5

سكريترة: مي ديزولي موسيو مزال مكملت، مشا للبيرو كان فتح لباب ورجع تلفت ليها
فهد: قداش من مرة نقولك نموت نحيا نمرض خبار شركة وخدمتها ڤاع عندي واكي طولتيلي على لقهوة
سكريترة: ح حاضر موسيو. وراحت طرطق بطالون هداك جابتلو لقهوة ورجعت راحت، اما هو فسڨم قعدتو جبد دوصيات وبدا فلخدمة يرڨيل فشي لي خاصو يتريڨل
فهههد، فهد رجل اعمال عمرو 26 سنة عندو عدة شركات تاع هندسة وتصميم ديكورات مشهور عالميا وتحت هاد لاعمال عندو اعمال إجرامية وغير قانونية منها تهريب سلاح وادخالو وبيعو بين الدول وغيرو من الاعمال ،فهد انسان رزين وسيريو بزااف سريع لاتهاب وتقلاق نسا عندو كما لعبة يشاور بيدو يطيحو عليه كدود ،فهد انسان ميرحمش لي خالطو اما حنين مع لي قراب ليه ويحبهم ويفهمهم ويفهموه ، عايش مع امو حورية وصاحبو ولا تقدرو تقولو خوه اسلام وشريكو تان فكلش (مع لوقت نعرفو اسلام وش او يدير معاهم ) ____
.
. عند اسيل
وقت لي كملنا دخلنا ليفاليز مشينا وانا عيني مرمشتهاش نحب نعرف لبلايص نحب نشفا عليهم من دك حابة نشوف كلشي محبا حتى عفسة تغيب عليا شي 20 دقيقة وكنا وصلنا عند باطيمة بيضا كبيررة وطويلة اما باين عليها مطراز لقديم حبسنا وخرجنا طلب منا عمو سليم نهزو لي قدرنا عليه مليفاليز ورحنا كان كاين لاسانسير طلعنا للايطاج 8 او اووب غير خرجنا قابلنا باب بيض خلانا عمو سليم حنا نحلو لباب انا وريهام وباينة بلي صورنا كلش عفسة ما رطيناها حلينا لباب قابلنا هاد صالون ولكوزينة لي مقابلين بعض

يااعمري كانو لزوج صغار وتحفونين زدنا مشينا لقينا بيت كان فيها زوح سيرير وخزانة لي طابل دو نوي وزدنا خرجنا لقينا حمام مع توالات حطينا ليفاليز فلكولوار وحنا مش مصديقين يعني دك ولات عدناا دار وااوو شي ناهههي عنجد قعدنا صورنا مورها قالنا عمو سليم هيا نكملو نجيبو ليفاليز هبطنا زوج مرات جبناهم وجينا قعدنا شي 5 دقايق ندورو فدار انا وريهام حتى نطق عم سليم
سليم: مالا انا نخليكم بناتي هاوليك نميرو ديالي وهاكم نتوما لپيس بلا مدلو تحوسو وكاين خريطة على لاڤيل لهيك وردو بالكم بلا منوصي
ردينا عليه وشكرناه هو غير خرج سوطات عليا ريهام وانا مكنتش اقل فرحة منها كملنا ريحنا شوية ممبعد دخلنا لشمبرة ديالنا جوزنا على دار ڤاع نشاف مورها جبدنا لفراش وفرشنا او ولات هكا