#كشف_المستور
الحلقة الرابعة
للكاتبة : سالمه الشويهدي
_____________________________________________
جت الساعة 10الصبح وكان الحوش كله نايض لأن وراهم يوم حافل من الحوسة والتجهيزات وبيطلعو هدى ونجية للسوق
هدى : فاطمة ، توا انا ماشيه للسوق افتحو الديار المسكرة اللي في الدور الثالث والثاني وسيقوهن وفرشاً الفرش المغسول وحطي في كل دار أربع فراشات وأمخاد وبطاطين وانا هنجيب معايا زيادة بطاطين جدد لأن اللي عندنا مش هيسدو فهمتي العرب بيجو قبل العرس بفترة ومعش فيه وقت
فاطمة : فهمت ياماما
هدى : خواتك وبنت عمك معاك انا ونجية بنتأخرو طيبي الغذاء لخواتك وعمك وبوك متغديين برا ماتحسبوهمش ، والمطبخ اللي في الدور الثالث مهجور ليه فترة نضفيه راك تنسي
فاطمة : اطمني والله ماني ناسية حاجة
فدوى : وقت ياماما اطلعي مش صغار نحنا وانتِ من الصبح وتحذري فينا هتلقي الحوش كيف ماتبي وأحسن باي
نجية : هيا وقت ياهدى
هدى : حي نسيت اسمعي فيه شغالتين توا بيجن بيساعدنك ولو كويسات نجيبهن للعرس لأن الأثنين الأولات سافرن
فاطمة : حاضر
طلعن الصبايا والبنات دارن جدول للحوسة
فاطمة : فاتن أنتِ امشي للمطبخ قشري البطاطا بيش نجي نقليها وندير معاها شاورما مافيش داعي للأكل الثقيل وعندنا حوسة
ياسمين وفدوى انتن تبدن في الدور الثاني ومعاكن الشغالة وانا هنركب للثالث نبدا فيه انا والثانية وتجي تساعدني فيروز لما تروح من العمل مفهوم !!
ياسمين : مفهوم ، هنساعد فدوى وننزل ندير الغداء انا أنتِ اركبي توا اصلاً وقت والظهر أذن أنتِ سقدي هنكملو
فاطمة : تمام هي
خذت فاطمة معدات التنظيف وركبت هيا والشغالة وولعت الضي كان عبارة عن غبار لأن مافيش حد يركبله بانيها محمد للبنات خاطي ديارهم كان فيه أربع غرف وحمام ومطبخ
تنهدت فاطمة : من وين هنبدا توا ، شنو أسمك
الشغاله : مريم
فاطمة : عاشت الأسامي ، توا يامريم أنتِ ابدي في الحمام وانا هنبدا في الدار الكبيرة هنلف الفرش اللي فيها ونسيقها تكوني أنتِ مكمله تمام؟
مريم : تمام
بدت مريم ومشت فاطمة للدار ولعت الضي متاعها كان فيها جلسة أرضية بدت ترفع فيها تسكر الباب بروحه وطربقت لامبة الدار بروحها
فاطمة : مش وقتها بكل فتحت الروشن ولفت الفرشة وجت بتطلع تاخد السياقة الباب مابش ينفتح قعدت تخبط ومافيش رد يامريم مرريم وينك
حي كان صار شي في البنت معقولة ماتسمعش ؟
فجأة حسيت بحد جرى ورايا وخش ورا الصالون كذبت عيوني بديت ندق علي الباب بالقوة لعند ماطلعت قطوسة سودة وقالتلي مافيش مهرب عيطت بقوة ومعش فطنت لشي الا وأنا طايحة والقطوس فوقي
