على الحلوه والمره

Part 4

رواية:على الحلوه والمره♥️
للكاتبة:mari_al💕
الحلقة الرابعة❤️
.
.
.
.
.
.
.
.
.
.
.
.
.
.
عصام:نور هيا نتمشو
احمد بغل:لا نور بتجي معايا بنجيبو شوية حاجات
نور:استغربت رد فعل احمد كيف اندفع ورد عليه بغل😂
احمد:هيا نور
نزار كان يشوف بصمت وعارف أن أحمد وراه حاجه🙂
احمد:نوور هو هيا
نور:اه منبيش خود نيروز
نيروز:انا مش فاضية انا والبنات عدي انتي
نور:باه😑
عدا احمد هوا ونور وعصام يتبع فيهم بعيونه
احمد:علاش مكملتيش لعب معانا من بدري
نور:شي معاش خاطري نلعب
احمد:مجاوبتيش على سؤالي من بكري
نور:اي سؤال؟؟
احمد:عمرك حبيتي
نور:...
احمد:كان متبيش تجاوبي عادي
نور:لالا عادي اي حبيت مره وحده وخطبني
احمد:كييف😳!؟؟
نور:لي انت كنت مسافر برا تقريبا
احمد:محد جابلي سيره
نور:اي
احمد:شن صار بعدها
نور عيونها تعبو دموع وقعدت تتذكر شن صار
قبل سنه:
نور كان في الكافيتيريه بتاع الكلية تراجي في نزار كانت تقرا في كتاب وقدامها قهوة فجأه قعمز قدامها منذر
تعالو نعرفكم على منذر على السريع
منذر خو صاحبت نور الانتيم نور كانت تحبه ومقايله لصاحبتها مع انها تعرف ان هوا بتاع بنات ومشاكلي بس القلب وما يهوا🤷🏻‍♀️ متخرج من كلية قانون ويخدم محامي
منذر:شجو
نور لما سمعت صوته توترت بس حاولت تبين عكس هكي
نور: اه نعم شن تبي
منذر:اسمعي بنفوت في الموضوع طول انا نبي رقمك خشيتي خاطري بصراحه
نور:انا اسفه استاذ منذر بس تبيني تعال من الباب انا منكلمش في ولاد
ناضت نور وهيا فرحانه ان منذر فكر فيها وكلمها
بعد اسبوع نور كانت تضم الان جاينها خطابه بس هيا هترفض زي كل مره🤷🏻‍♀️
لبست قونه وسوريه واسعه باللون الزيتي عدت تقدم القهوة للضيوف وانصدمت لما لقت ميار صاحبتها وامها
قدمت القهوة وقعمزت
ام منذر:ما شاء الله على بنيتي زين مختار ولدي والله
كملو هدرزه ودارو نظره شرعيه ونور وافقت وقعدت طول فترت الخطوبه يلي هيا ثلاث شهور تتواصل مع منذر وتكلمه وكان مره مره يغلط ويقوللها في حاجات مش كويسه وان يبيها تطلع معاه بس نور كانت تمشي
يوم الرمي
حوش العيلة كان زحمهه الاقارب من كل مكان جاين يحضرو عرس بنت عبد العالي نور
نور كانت لابسه البودري والفرحه مش سايعتها تراجي في اليوم هدي بالدقيقة والثانية تراجي امتى يتصل بيها منذر(خطيبها) ويقوللها خلاص بديتي حلالي تراجي امتى يروحو خوتها ويقولولها انقرت فاتحتك كانت مقعمزة فوق في دارها وبنات العيلة معاها ويدربكو وكل خمس دقايق تمشي تبرق في الشباك وتشوف لو خوتها جو ولا لا واخيرا جو السيارات بس عكس ما توقعت مفيش كلاكسات ولا العاب نارية نزلو ولاد العيلة وعلى وجههم علامات الصدمه حاولت تطمن روحها بكل الطرق بعد ماخشو سمعت صوت عياط امها والنساوين نزلت تجري
نور:خيركم منذر صارله شي شن صار فهمونيي
نعيمه عدت حضنتها وهيا تبكي:اه يبنيتي مليكش حظ ياروحي
نور:ماماااا شن صارر
جها نزار فكها من امه وخداها ورا الحوش
نزار:نور اوعديني متبكيش ولا تنزلي دمعه
نور:نزار شن في قولي
نزار:منذر هرب مع بنت تانيه
نور كأن حد صب عليها ميه سخووووونه وجهها ولا احمر وبدت الدموع تنزل بدون صوت ومن كثر الصدمه رجليها معش قدرت تشيلها واغمى عليها نزار قامها بسرعه وعدا بيها لسيارته
نزار:نيزككك بسرعه تعال اختك
نيزك جاه يجري ولعو السيارة وعدو المستشفى وطول دخلوها
بعد ربع ساعه
الدكتور:وين ولي امرها
نزار:احني دكتور
الدكتور:المريضة متعرضة لصدمه قويه وجاها انهيار عصبي قوي هتقعد اليوم تحت الملاحظه وغدوه بتطلع
عدا الدكتور ونيزك قعمز على الكرسي
نزار:شنو يلي صار شنو يلي خلاه يهرب الحقير هداااا
نيزك:تي شن عرف امي يانزار ها قلتلكم انا مش موافق من الاول لاكن بوك وراسه قلتلكم بتاع بنات وجوه اخي انتم يلي سكرتو دماغاتكم
نزار:قسما بالله ماني سااكت وهنجيب حقها
وكملو عراكات والمستشفى كلها تتفرج عليهم
ثاني يوم طلعت نور وروحوا بها
اول ماخشت استقبلتها امها وهيا تبكي ونور مفيييش اي ملامح على وجهاها
استمرت نور اسبوعين على الحال هدا لا كلام لا شرب لا طلوع من الدار
وطبعا طلعت اشاعات عليها وكل واحد يقول كلمه من عنده تعرفو عاد مجتمعنا الاغبر🤷🏻‍♀️
في الوقت الحالي:
نور:يوم قراية الفاتحه هرب مع بنت تانية
احمد:اني اسف هلبا
نور وهيا تمسح في دموعها: لا عادي
احمد:باه مفكرتيش تحبب بعده
نور: لا تبت الحق😂
احمد:واخيرا شفنا ضحكتك
نور تحشمت
احمد هياا مدي نمشو بسرعه
قعدو يتمشو ويهدرزو لين وصلو للمحل
احمد: راسك لوطه
نور:وااك باه
احمد خدا حاجته وجا لنور
احمد:تبي حاجة
نور:نبي مصاصه
احمد:طفلهه
نور:مدخلكش
خدالها حاجتها وطلعو وقعدو يتمشو لين وصلو
نزار شاد قيتار نور ويعزف عليه هكي وخلاص
نور جرت خداته منه
نزار:خيرك نعزف
نور:قصدك تلوثلنا في ودننا
نزار:باه سمعينا انتي ياسيلينا جومز
نور:سقع عليك
قعمزو كلهم ودارو دائرة ونور شدت القيثار وبدت تغني
انا كل مانويت انساك ذيك الذكره ترجعني ترا للحين انا احبك واشوفك بين حين وحين فراقك اه يافراقك كسر قلبي وعذبني وانا نثرن عليا ابقا احبك لين يوم الدين وكملت باقي الاغنية وطبعا يلي يتمايل يمين ويسار😂
ويلي بيبكي ويلي هاااايم في الصوت وكل واحد في عالم بروحه بعد لاكملت نط عصام
عصام:صوتك يهبل يا نونو
احمد برقله تبريقه متاع نونو عينك😭🤣
نيزك:نفكر نخليك تشاركي في ذافويس نور
نزار:ذافويس طيح سعد كان تعرف🙂
نيزك:غير سكرلنا فمك انا اكبر منك
نور:والمصاصه في فمها:اسكتتتت انت وياه مصح وجهكم تقررو عليا
نيروز:على اساس وصلاتك الدعوه هيا
نور:سكفمك حيوان
رنيم:بنت راه هيا مش ولد
نور:مدخلكش
اسيل:نزار هيا نتمشو
نزار:لالا فوتيني
اسيل انحرجت نور حست انها انحرجت وشدت يدها
نور:تعالي نتمشو انا وانتي
اسيل فرحت:هي
ناضو وبدو يتمشو وناض لحقهم عصام
اسيل:صوتك حلو نويره
نور:شكرا يا عمري انتي احلا
عصام:تعرفي قريب رقدت
نور:هههه اي حتى رنيم ديما ترقد وين نغني
عصام:اي شن جو كليتك
نور:بخير الحمد لله 
عصام:انا خلاص اخر سنه
نور:اي ربي يوفقك
اسيل:ماما قاعده تدورله تبي تخطبله😂
نور:معقول عصام يخطببب🤣🤣
عصام:(وبناخدك انتي اخرا)اي شن الغريب
نور :شي والله بس حسيتك صغيرون🌚
عصام:انتي يلي صغيره مش انا
نور:راك اكبر مني بسنه بس راا
عصام:واطول منك
نور:ننننني
اسيل:خدانا الوقت وبعدنا هيا نردو
نور:اي هيا
ردو للشاليهات ولقوهم راقدين في الديار نور ونرجس واسيل  وريان ورنيم ونيروز في دار
والولاد في دار
وعبد العالي ومرته في دار
وعبد الله ومرته في دار قعدو البنات شادين فوناتهم
نور كانت تنزل في ستوريات على انستا جاها طلب متابعه من عصام واحمد في نفس الوقت🙂🤣
قعدت متردده تقبلهم ولا لا قبلت طلب احمد وخلت عصام وهيا مش عارفه علاش قبلاته اساسا شوي وبعتها
احمد:نور
نور:نعم
احمد:نايضه
نور:راقده جن يرد عليك
احمد:مبردك
نور:ننني
احمد:قلتلك انزليلي
نور:كيفف
احمد:انزلي انا على الشط
نور:لالا منقدرش
احمد: تي قلتلك انزلي خير مانركب ننزلك بروحي
نورقعدت تنفخ
رنيم:خيرك
نور:احمد يبيني ننزله
رنيم:انزلي به
نور: اي تو ننزل
اسيل طول بعتت لعصام ان نور بتنزل لأحمد
نور لبست شال على التوته ونزلت
نور:نعم
احمد:غير قعمزي قبل🙂
نور قعمزت وقعدو فتره ساكتين
احمد:حلو البحر صح
نور وهيا تاخد في نفس عميق:اي
احمد: نور نبي نقولك شي
نور:قول
احمد:اسمعي انا.....
عصام:.....
احمد:😡
يتبع.....

هااااشن رأيكم في السربريزززز
زعما منذر هيكون ليه دور في الحلقات الجايه
وشن قال احمد لعصام
الحلقة الجايه هتكون افضلل حلقه بنات😂♥️
هي باياات، 😅❤️