- مش مناسب ليكِ ومش شبهك نهائي وكمان انتِ واثقه إنكوا مش هتكونوا لبعض ف ليه معلقه نفسك بيه ماتبعدي.
: شوفتي انتي قولتي متعلقه أنا فعلا متعلقه بيه جدا وبحبه وحاولت ابعد معرفتش.
- طب وإنه مش بيحبك دا مش سبب كافي إنك تبعدي وتقسي قلبك من ناحيته إنه بيهينك ويهين كرامتك مش كفايه ليه قابله بالوضع دا.
: عشان أنا بحبه انتِ عشان مش بتحبي مش هتفهمي ومش هتحسي لأنك مجربتيش لو بتحبي حد هتقبلي بكل حاجه.
- لا طبعا مستحيل أنا مستحيل أقبل إن حد يهين كرامتي دا انا أمحيه من حياتي بسهوله جدا.
: انتِ بتقولي كدا عشان مجربتيش والله.
- طب ليه مجربتيش تحبي اللي بيحبك بجد ليه ماسكه ف دا مع إنه فيه عيوب الدنيا كلها ومش كويس ولا أهله كويسين ف غيره يتمني إنك ترضي بس عليه ليه مش بتحاولي.
: طب مانا حاولت ومعرفتش.
- لا إنتِ حاولتي وإنتِ مع اللي بتحبيه انتِ واهمه نفسك إنك حاولتي بس انتِ محاولتيش إنتِ بتحاولي ترضي ضميرك من ناحيته وخلاص طالما مش بتحبيه ومش قادره يبقي لازم تبعدي اقولك ابعدي عن الاتنين.
: مش وقت هزار.
- أنا مش بهزر بتكلم بجد.
: منين بتقولي خدي اللي بيحبك ومنين بتقولي ابعدي عن الاتنين.
- الاتنين مش مناسبين اصلا ومش عاجبيني.
: وإنتِ من امتا حاجه بتعجبك دا ف كتير بيجي يعترفلك بحبه وناس مفيهاش عيوب وإنت حجر مشاعرك مبتتحركش من ناحيه حد ومش عاجبك حد.
- مش يمكن نصيبي لسه مجاش وبعدين وقت اما النصيب يجي هتلاقيني بحب ومش هعرف حد فيكوا تاني.
: ضحكت عارفاكي تبيعي كل حاجه من أجل قره عينك اللي واجعه دماغنا بيه.
- يوما ما هيجي ويملي الفراغ ف حياتي أنا راسمه حاجات حلوه اووي ف خيالي مش عارفه هحققها ولا لاء بس عندي أمل انها تتحقق.
: كفايه أحلامي عيشي معانا ف الواقع بقا انتِ كل حياتك وأحلامك خياليه والله.
- طب ماممكن تتحقق وأقابل فتي أحلامي.
: فتي أحلامك دا موجود ف الروايات اللي هي خيال اصلا ف هتلاقيه ف أحلامك بس.
- فصيله والله إن شاء الله هلاقيه ملكيش دعوه. المهم نرجع لموضوعنا تاني.
: ها
- إنسي والله إنتِ لسه صغيره ولسه قدامك سنين كتير يمكن تقابلي الأحسن واللي يصونك واللي يحبك بجد مش لازم يعني نحب ف الوقت دا بس لما تيجي تحبي اختاري الصح عشان متندموش بعدين احنا بنختار غلط ونرجع نقول ليه حالات الطلاق غلط طب ماهو من تسرعنا ف الاختيار واننا بنختار غلط هو كل حاجه نصيب فعلا بس كمان عاوزه اقولك إن ربنا مش هيبارك ف علاقه غلط يعني الارتباط اصلا وكل الكلام دا حرام وبنغضب ربنا كمان ف طبيعي ربنا مش هيباركلنا ف حياتنا بعد كدا ولازم نقابل صعوبات ومشاكل كتير طب ليه منصونش نفسنا من الأول ونحفظ نفسنا لحد اما يجي نصيبنا.
: أنا عارفه إنه حرام بس مش قادره ابعد وهو مش هيفهم كدا هيفكر إني ببعد عشان حد تاني وهخسره.
- هو لو بيحبك دا لو بقا مع اني واثقه إنه لاء هيخاف عليكِ فعلا وهيحترم رأيك وبعدين ازاي هتبقي عارفه إن اللي بتعمليه دا حرام وإنك بتغضبي ربنا وهتكملي فيه عمرك ماهتكوني مرتاحه ونفسيتك هتبقي تعبانه ف لازم تاخدي خطوه وتبعدي.
: طب ربنا هيسامحني.
- ربنا غفور ورحمته واسعه وهيسامحك طالما استغفرتي وبعدتي عن الغلط بس مترجعيش ليه تاني.
: أكيد مش هرجع تاني وانا هحاول وهاخد خطوه قريب.
- وانا هستني خبر منك إنك بعدتي ولو احتاجتي مساعده او اي حاجه انا موجوده دايما.
: واثقه إنك دايما موجوده.
بعد فتره..
- ها أخبارك إيه.
: بخير وحاسه إني تخطيته بجد شغلت وقتي ف حاجات كتير اووي بحبها وبقيت أشغل وقتي كتير ومبقاش يجي ف بالي بالرغم من إن كان نسيانه صعب لأني مكنتش شايفه غيره بس أنا كنت فعلا عايشه ف وهم إني مقدرش أنا بس حاولت بدون وهم ونجحت وبعدت وقولتله إنه مش هتكلم وهبعد وقعد يزعق بس مفرقش معايا لأن من جوايا مقتنعه إن البعد هو الصح ودا اللي كان لازم يحصل من الأول وبجد عندك حق ف كل حاجه قولتيهالي أنا فعلا كنت غلط بس دلوقتي مرتاحه جدا ومش خايفه من حاجه ولا إني أتخذل ولا إنه ميوفيش بوعده ليا حقيقي كدا أحسن.
- يارب تثبتي ع موقفك دا بقا عشان تعبت من المعافره معاكِ
: أوعدك هثبت وهحافظ ع نفسي وع قلبي لحد أما يجي نصيبي.
- وهو دا الصح.
: فعلا شكرا لوقوفك جمبي ونصيحتك دايما ليا.
- إنتِ زي اختِ وأكتر ودا واجبي ناحيتك.
: يديمك ليا طول العمر.
- ويديمك يارب.❤
