عشق الداهية

1

عشق الداهية"
الحلقة" 1..
في اسبانيا تحديدًا..مدريد..في احدى القصور الضخمة.. حيث قام احدى الوزراء بتنظيم حفل يضم اكبر العائلات و أرقاهم من الطبقة المخملية بإسبانيا..
كان وقت غروب الشمس.. البوابة الكبيرة تحلت استقبالا للضيوف..كان تقريبا كل شخص جايب معاه شريكتو و حارس شخصي.. الوزير وعائلته كانو في استقبال ضيافهم بكل سرور ومحبه..
القمره خذات بلاصة الشمس و الظلام ملى السماء.. النجوم بدات تنتشر و تاخو راحتها في ارضها..
داخل القصر: شي ماهو مسموع غير صوت الموسيقة الكلاسيكية و صوت دردشة الحاضيرين.. كل حد يشرب في كاسو و لاهي في همو..
الي تغزرلو يتبسملك.. بالطبيعة ابتسامه مزيفة..
السؤالات بدات تكثر..زعما يجي؟ اكيد مهوش جاي..موش من عوايدو يحضر في احتفالات كيف هكا!.. الوزير بنفسو استدعاه زعما مايجيش؟ هاها كي يستدعاه الملك بيدو مستحيل يضيع وقتو في احتفال كيف هكا..!
كان يسمع في كل حرف..يدعي لربي انو يجي.. هذي فرصتو الاخيرة.. لازم يقتلو اليوم قبل غدوة.. جماعتو البرا تستنى في اشارة بش يداهمو المكان و يهجمو على "الداهية" .. السؤال.. زعما يجي؟..
الكراهب ترصفت وراء بعضها.. مهمتهم الليلة حماية "الداهية" كان يعرف الي جيانو بكلو خطر.. حظورو بيدو خطر عليه و على الناس الي الداخل.. هبط من كرهبتو بخطوات راكزة.. تقدم نحو البوابة الهواء قاعد يضرب في سبلاتو السوداء.. من كثرة الريح عيونو الكحلة تغمضو.. كمل يمشي بكل هدوء.. ثلاثة رجال وراه.. والباقي البرا في حالة ما تصير حاجة.. كيما "الهجوم"..
مع دخولو صوت الدردشة قوا.. مكانوش يستناو في وصولو..مكانش مهتم بالي يتحكى.. لوج بعينيه على الوزير.. كي لمحو توجهلو.. ابتسملو الوزير ابتسامة عريضة تبين فرحتو بيه.. صافحو و وقفو مقابلين بعضهم..
في اخر القاعة..
- الكاس هذا للسيد اذاكا..الي مقابل الوزير.. باهي ؟
تكلم النادل بخوف..خوف مالمسدس الي في جنبو..
-ب..باهي..
توجه بكل رعب لناحيتو.. الطبق الي في يديه يرعش قريب يطيح..واخيرا.. واخيرا وصل.. مدلو الكاس و راسو منحني..
مد يدو.. هز الكاس و رجع تلفت للوزير.. كانت علاقتهم سطحية اما لقائاتهم كثيرة.. جاء بش يشرب مالكاس.. اما.. اما وصلو صوت من وراه.. صوت شخص يكح.. منجمش يعمل روحو مسمعش.. الصوت يوجع القلب.. كينو صوت عبد يطلع في الروح.. مدلو الكاس الي في يدو مغير حتى ما يغزر لوجهو.. مكانش يهمو شكون هو.. والا حالة صحتو..الي يهمو انو بعد ميأنبوش ضميرو على حاجة راها ومنجمش يصلحها.. "تأنيب ضمير؟".. لا علينا..
الاشارة وصلت للخارج.. نورمالمون "الداهية" شرب الكاس.. يعني شرب حاجة ترخفلو اعصابو.. تسلبلو قوتو.. تخليه بدن مغير لا عقل لا قوة.. ولا حتى روح..
البوابة الي كانو مسكرين تكسرو.. كان هجوم قوي .. الناس هربو.. اكيد بش يخلوهم يهربو.. محاجتهمش بيهم.. حاجتهم بشخص واحد.. شخص لازم نهايتو تكون اليوم قبل غدوة.. كانو موجهين اسلحتهم عليه.. موش غريب عليه موقف كيف هذا.. الكل مستغربين.. موش على اساس يكون دايخ من مفعول الدواء؟.. كان واقف بكل شموخ.. هز يدو عداها على رقبتو.. وقتها وين رجالو وصلو.. بدون اي صوت..لكن نضرة منو للتالي خلات الهاجمين يتلفتو ويراو رجالو.. صوت الرصاص كان سيد المكان.. اصوات تتسمع من بعد امتار..الي طايح اكثر من الميت..زعما هذي نهاية الداهية.؟ زعما هذا ما يسما بنهاية ما لا بداية له ؟
عادت الشمس الى مكانها و انتشرت اشعتها على كامل الارض.. لتدخل غرفة الداهية و تيقظه من نومه..
كان ممدود على بطنو.. راقد وموش حاسس بشي.. تعداو دقايق و سوايع باش حس بحرارة الشمس على ضهرو العريان.. قداه يكره الحرارة و السخانة.. كل شي لازمو يكون "بارد" كيفو.. تذكر شنوة صار البارح.. حاجة موش جديدة معندو علاه يخمم فيها اكثر ..عمل روتينو اليومي الصباحي.. وتوجه نحو المعامل بش يتفقد الخدمة.. نحكو على معامل الحديد الي في مدريد.. كان يسوق في سيارتو الي خذا برشا وقت بش يختارها من بين السيارات الي كانت في المخزن.. تلوفونو نوقز.. تلفت يلقاها تصويرة طفلة.. شكون هذي ؟ زعما متاع الاوتال الي في كندا! والا متاع روسية! الخيارات كانت كثيرة.. في الحقيقة مكانش يخمم في حتى وحده.. مكانش مهتم شكون هي والا شنوا تحب.. بكل بساطة علق عليها..وكمل طريقو..وصل قدام اول معمل وقف الكرهبة وبقا يغزر مالشباك.. هذا اول معمل ليه.. يتذكر اول ما جاء لإسبانيا.. كان قرارو .. قرارو انو يبني ثروتو وحدو موش عداوه في جدو او عايلتو .. اما مالي هو صغير كان ديما يحب يعمل كل شي وحدو.. خاتر مينجمش يفرح بحاجة موش هو تاعب وشاقي عليها..من خاتم هداهولو جدو نجم يعمل معامل.. و يتاجر بالحديد..و الفضة.. و النحاس.. والذهب.. رجع بيه مخو لذكريات بعيدة وقديمة برشا.. خدم الكرهبة ودورها للشركة..
اول ما دخل:
سيد ادهم.. الوزير طلب انو يعطيك تعويض على حفل البارح الي فسد..
سيد ادهم عندك ضيفة جات من المانيا..
سيد ادهم فما اوراق لازم تصحح عليهم..
سيد ادهم السلسلة الجديدة للمجوهرات الي بش يتباعو في دبي حاضرين ناقص كان تعطينا تأكيد..
سيد ادهم عندك اجتماع مع الخدامة بعد ساعة في المعمل3..
سيد ادهم مجلة "اعمالنا" طالبة لقاء صحفي بعد الظهر تنجم والا..
كانو يمشيو وراه ويستناو في اجابة.. هذا بخلاف الي يحاولو يوصلو صوتهم بش يسمعهم.. لازم في النهار ياخو برشا قرارات و يحاول ينضم وقتو وحدو.. بكل بساطة خاتر موش كيف غيرو.. ميعطيش ثقة في سيكريتار .. كيما سبق وعرفنا الي هو يحب يعمل كل شي وحدو..
اول ما دخل للبيرو يلقا طفلة .. بلوندة.. عاطيتو بالضهر.. هذي الضيفة؟ شكوني ؟كيفاه بش يعرفها تو هو !!
- تفضل كيفاه نجم نعاونك
- بونجورنو.. شنوا متدكرتنيش؟
يغزرلها بكل تركيز.. مهوش مركز فيها جملا كل تفكيرو فالي قالوهولو البرا.. يحضر في مخو .. لازمو ديما يكون حاضر ذهنيا..
- لا متذكرتكش ..
- انا الي تقابلنا في المانيا..
- اي و ؟
- موش وقتها عدينا احسن ليالي؟
ههه لا هذي تفدلك .. جاية من المانيا لاسبانيا بش تحكيلو على ليالي عداهم هو نزوة.. يعني معطلتو على خدمتو ولاهية تسيب في عهرها هنا ؟؟
- تنجم تخرج..
مغير حتى حرف خرجت.. تعرفو موش بش يحن..مكانش لازم تخليه في مخها الوقت هذا الكل..هو موش متذكرها حتى..
كلم الوزير.. و فهمو انو الي صار موش غلطتو.. والي موش لازم تعويض..
طلب منهم انو يجيبولو الاوراق الي بش يصححهم و معاهم سلسلة المجوهرات الجديدة.. كمل وقع عالاوراق بعد مقراها حرف حرف..
- هذي السلسلة؟
- نعم سيد
- عاودو مالاول و جديد.. نحبها تكون حاضرة في 7 ايام.. هذي خدمة بش نبعثوها لدبي ؟
خذا شهيق و زفير ميحبش يتنرفز.. مزال يستنا فيه نهار طويل ملازموش يفسدو من تو..غزر لمنقالتو ..
- اعطو موافقتكم للمجلة.. و كونو حاضرين الاجتماع بعد 5 دقايق..
خرجو و خلاوه وحدو..
بعد 20 دق.. كان خارج من غرفة الاجتماعات.. خرجو من بعدو الناس الكل.. وكل واحد شد خدمتو..
غادر الشركة متوجه دارو.. كانت في برطمان كبير في قلب مدريد .. يحضر في روحو للقاء..
عنوان المجلة:
السيد ادهم السلطاني و اعماله في العالم العربي ..!