زين: السلام عليكم
سارة: وعليكم السلام
زين: سارة؟
سارة: اه سارة ومعلش بس لاء مش ممكن
زين: شو مش ممكن؟؟
سارة: كنت رح تقول ممكن نتعرف
زين: ما كنت رح أقول !
سارة: اه اوك مصدقاك أنا
زين: إنتي حرة بس إذا فكرتي كل الشباب زي بعض لا
تتدايقي لما الشب يقول كل البنات زي بعض
سارة: انا ما قلت هيك ! بس بالله عليك شو ممكن البنت
تتصور غير هيك إذا أجا شب يكلمها خاص
زين: مثلاً يسألك إشي عن محاضرة اليوم؟
سارة: أنت معنا بالقسم !؟
زين: والله ؟ ما بتعرفيني؟ أنا معكم من الفصل الي فات يا صوحة
سارة: لا تسب أنا بس ما بحفظ الأسماء
زين: هممم لاء مش حجة لانو في مرة شفتك عند المصعد وسألتك إذا الدكتور وصل للقاعة بس انتي اعطتيني نظرة (مين انت؟وليش بتحكي معي؟)
سارة: مش ذاكرة
زين: بتحكي جد؟
سارة: أه والله حتى حاسة انك بتكذب بس ما بتهمك لاني كتييييير بنسى
زين: اه أنا يومها لاحظت إنك ما عرفتيني ولا ذاكرة إني معك بنفس القسم بس فكرتك اتدايقتي إني حكيت معك
سارة: لا اذا كان الموضوع سؤال بس ما رح اتدايق أصلاً ما الي حق اتدايق وانت مش غلطان
زين: يعني تزكرتي؟
سارة: لاء برضو، ممكن لو شفتك بالجامعة اتذكر بس بنصحك لا تحاول أنا ذاكرة ذبانية
زين: هههههه حلوة هاي ذاكرة ذبانية
سارة: اها ستحقيت اللقب بجدارة ، المهم ما قلتلي شو بدك؟
زين: نسيت
سارة: والله؟
زين: اه اه كنت بدي أسألك اليوم شو اخدتو بمحاضرة اليوم ؟ عشان هتو عرفت انو في امتحان بكرا
سارة: همم عندي شوية أسئلة بالأول
زين: تفضلي
سارة: ليش بتسألني وما بتسال صحابك؟ ولو ما في صحاب ليش ما سألت واحد غريب؟ ليش وحدة غريبة مش واحد وليش أنا بالذات؟
زين: صحابي الفاشلين غايبين وسألت بنت عشان الدكتور قال (والله البنات افهم واشطر منكم يا اغبياء! بتشوف دفتر الوحدة فيهن بيلمع لمع و مزين و كامل مش زيكم ما في عندكم لا تلخيص ولا دفتر حتى!) هههه وجهه كان احمر زي الي رح ينفجر
سارة: ههههه دكتور رفعت؟ ههههه والله بيتكلم معنا برقة وأدب والله ما توقعت يحكي هيك
زين: اه بعرف بيكون وديع مع البنات بس معنا أعوذ بالله تنين
سارة: اه اوك تطمنت انك ما بتكذب، اليوم المحاضرة من الصفحة 55 ل72 وطبعاً كان بس يقرأ من الكتاب يعنيما فاتك اشي مهم
زين: لا تضلي تحكي تكذب و متكذب أنا شو بدي بالكذب؟
سارة: معلش كنت وقحة شوي
زين: اه بس بتضحكي برضو
سارة: ها؟ شف مين بيحكي بيضحك على لقبي وعنده ذاكرة مثلو مثلي ، عالأقل أنا بحافظ على محاضراتي
زين: اه أنا مهمل و ما بحضر كل المحاضرات ولا بحل كل التكاليف مثل سعادتك يا افلاطون بس عالاقل بحكي بجاوب عالسؤال بسرعة وما بعمل قصة وتحقيق على كل اشي
سارة: انت لو جربت تعمل حساب بنت رح تعرف كمية رسائل(ممكن نتعرف) الي بتيجي للوحدة في اليوم
زين: ليش انتي كم بيجيكي؟
سارة: ولا وحدة لاني حاطة صورة انناس ومش باين اني بنت ، بس صحيح كيف عرفتني وانا مش حاطة اسمي عالحساب؟
زين: يا سارة ركزي إحنا بنفس القروب
سارة: اه صح
زين: والله وضعك صعب ، شفتي دكتور؟
سارة: لا أنا عارفة السبب ما بحتاج دكتور
زين: شو السبب؟
سارة: أختي ذاكرتها قوية كتير كتير أكيد هي الي اخدت الجزء تبعي
زين: هههههههههه فطست ولك انا فكرت عندك مشكلة صحية و حزنت عليكي هههه ما أهبلك
سارة: بشوفك ماخد راحتك سب فيا ، احترم حالك أنا لسا ما أعطيتك الاذن تاخد راحتك بالحكي
زين: والله وماخدة في حالك مقلب ،طيب يا ستي ولا يهمك هيني بدي اطفي وأشوف الصفحات الي حكيتي عنها وبكرا ان شاء الله بنتقابل
سارة: عفواً؟ وين و ليش نتقابل؟
زين: قصدي اني جاي عالجامعة يعني مش رح اغيب يييييه روقي عاد
سارة: اوك اوك يلا روح خلصني والله اقص ايدي ازا بتنجح في امتحان بكرا
زين: اسحبي يمينك لانك ما بتعرفيني
سارة: واثق جداً ، بكرا بيبان الموضوع وبنشوف مين أعلا
زين: تحدي؟
سارة: تحدي !
زين: إذا فزت؟
سارة: بطبعلك ملخصاتي كلها
زين: واااااو خلص رح ادرس ،طب شو بدك لو انتي فزتي مع انو مستحيل
سارة: هممم اه لو أنا فزت بتشتريلي الألوان الي طلبها الأستاذ للفصل الجاي
زين: نعم يختي؟ ليش ان شاء الله؟ مفكراني قاعد على بنك؟
سارة: فش تنازل والالوان مش غالية يا بخيل
زين: بتعرفي شو ؟ موافق بس عشاني متأكد اني رح افوز
سارة: أوك تمام
زين: سلام يا صوحة
سارة: سلام يا مسطول
.............
أنت تقرأ
ممكن نتعرف؟
Romanceجملة (ممكن نتعرف) مزعجة لأنها لا تخرج إلا من شخص يتظاهر بالأدب و هو يخفي نواياه المقرفة يقولها لفتاة تتظاهر بعدم الاكتراث لكنها في الحقيقة مهتمة جداً ولكن في الحقيقة اي منهما لا يعرف الاخر وكل واحد ينظر للأخر كمسكن مؤقت لمشاعر أساء توظيفها....إلا من...
