ممكن نتعرف؟

نهاية التحدي

زين: هلا

سارة: أهلاً

زين: ذاكراني؟

سارة: تذكرتك لما رجعت بالمحادثة

زين: هههه اه بدونها كان انا لسا حد غريب

سارة: فعلياً انت حد غريب لأني لسا ما قابلتك عالواقع وفي إحتمال تكون نصاب

زين: انتي كنتي رئيسة الجمهورية و انخطفتي و تم اغتيالك قبل هيك عشان يكون عندك كل الشكوك والإتهامات؟

سارة: مزنخك، طب المهم هلحين هو الإمتحان

زين: لا قبل هالموضوع بدي اسألك، اليوم كنتي لابسة شالة موردة أصفر ؟

سارة: بسم الله ! كيف شفتني؟ بتلاحقني ولا ؟

زين: خلصيني محنا بنفس القسم وبين محاضرات الشباب والبنات الكل بيشوف بعض، يعني لا براقبك ولا بلاحقك يا رئيسة الجمهورية

سارة: بكفي تتمسخر، بس أنا ما شفتك ولا بعرف إنو محاضرتكم بعدنا، كنت افكركم بيوم تاني

زين: واااال صدمتيني صراحة

سارة: شو بدي فيكم لاراقبكم؟

زين: أنا ما براقب بس بعرف انو محاضرتكن قبلنا وبعرف كم وحدة منكن بالشكل من كتر ما بنشوف بعض، حتى في شباب خطبوا بنات من عندكم

سارة: في عنا بنات خاطبات؟ والله ما بعرف، ما بختلط بالبنات كتير

زين: ولك بكفي هبل، كلكن 19 بنت بالقسم أكيد بتعرفيهن، هناء وزينب

سارة: أه زينب هديك القصيرة الكيوت، هاي خاطبة ؟!

زين: اخخخ تعبت يا ربي

سارة: هههه عادي أنا هيك دائماً ما بنتبه كتير لمحيطي

زين: وذاكرة ذبانية

سارة: صح والذاكرة الذبانية

زين: لدرجة انك نسيتي عن شو كنتي بدك تسألي

سارة: أسأل عن شو ؟

زين: عن الإمتحان

سارة: آه آه الإمتحان، بشرني كم جبت

زين: 92

سارة: 95

زين: وت؟!

سارة: هههه واو بشوف كاتب الدرجة بكل ثقة وما عندك ذرة شك أنك فايز هههه يا خسارة يا زين والله فقسة

زين: الله يقطع شرك، جلطيني

سارة: تعيش وتنجلط، هههه والله فطست، واثق جداً

زين: ولك كيف ؟؟ كيف ام ذاكرة مضروبة مثلك تجيب هيك معدل؟ معقول الدكتور مزبطكم بالتصليح

سارة: اااا بلشنا عاد طعن في مصداقية درجتي، يا روح أمك أنا دارسة و مستحقة العلامة

زين: يعني مش حتعطيني الملخصات؟

سارة: نو

زين: الله يسامحك

سارة: آمين آمين

زين: يا الللله والله كنت متأكد إني حأفوز، ولك هاي أعلا درجة عندي

سارة: وأنا كمان هاي أعلا درجة عندي، درست عشان الألوان، زاكر الألوان صح؟

زين: ايه ؟ اي الوان؟ ما بعرف عن شو بتحكي، أصلاً أنا بعرفك؟

سارة: لا لا متفكرش حتى تتهرب، احم بتتفضل تجيبلي ألوان تحديد الزجاج الي سعر الواحد 5$

زين: لاااا بالله عليكي، والله ما كنت ناوي اشتريهن الي حتى، كنت حأشحدهن من حدا

سارة: يلا صار عندك فرصة تشتري الك لما تشتريلي

زين: طب كم لون طلب الدكتور؟

سارة: 4 بس

زين: 20$ ؟ كيف بقدر أدبر المبلغ

سارة: التزم بكلمتك

زين: لا يختي متخافيش انا قدها و قدود

سارة: ههه طب من الاول بدل ما تنوح وتعيط

زين: بس أنا لسا مش فاهم كيف جبتي الدرجة

سارة: حاجة إسمها الذاكرة المؤقتة

زين: أه هاي بالجوال

سارة: لا يغبي هاي عند الإنسان

زين: احم لو سمحتي لا تسبي أنا لسا ما أعطيتك الإذن تاخدي راحتك بالحكي

سارة: حاسة انو نبرتك فيها تعييب

زين: هيك حزرتي ههه

سارة: المهم معك لنهاية الأسبوع لتجيب الألوان

زين: بدك تفلسيني؟ الله يسامحك

سارة: آمين آمين

زين: طب يلا سلام، بشوفك الأسبوع الجاي

سارة: ليش غايب بكرا؟

زين: لا بس خفت اقلك أشوفك بكرا تروحي تشطحي وأطلع أنا المطارد

سارة: هههه لا يغبي خلص فهمت

زين: انتي الغبية، يلا سلام

سارة: سلام يا أغبى من الغبية