(ضحية مجتمع ضالم)

(القصة بارت واحد فقط)

*أكثر الناس حزنا*
تلك التي ترى الناس بقلبها الطيب ثم يصدمها واقع لا يشبهها 💔وماتزال روحها ترفرف بالبياض"

السلام عليكم 🌺👋

" أخواتي المتابعات حبيت اشاركم قصتي ومااريد منكم غير النصيحة اذا چنتوا اكبر أو ازغر مني بالعمر هم راح اتقبلها وبكل رحابة صدر واذا راح تنتقدون أو تعلقون تعليق سلبي هم مراح ازعل أو اضوج لأن مدام اختاريت اشارككم بيها لازم أتقبل كلشي بس ياريت متضلموني انتو هم لأن محد يحس بمعاناتي غيري لأن اني عايشة هالواقع هاذا .وأقسم باللة اي كلمة اگولها هية حقيقية ١٠٠/١٠٠وما راح أزيد حرف على الواقع العشتة والضلم الشفتة وهاي القصة قصتي اني وبقلمي وما ردت انطيها لأي كاتبة لأن محد راح يگدر يشرح كمية الضلم والقهر الشفتة .ويبقى الرأي الكم وانتو احكموا،،

(اني حنين من بغداد مواليد(٢٠٠٢) شكلي طبيعي لا جكمة ولا ملكة جمال بنية عادية طولي ١٧٠ وزني ٦٥ حنطاوية البشرة يعني شكلي مقبول والحمد لله .
توفى والدي من جان عمري ٨ سنوات تولى تربيتنا اني وخواتي اخوي الجبير صار هوة بمقام الوالد وجان مدللنة وما مقصر علينا بشي والحمد لله طبعا اني عندي هواي خواتي غيري واخوان هم بس ما احب احجي عنهم وادخل بتفاصيل وتصير معمعة عليكم .جنت اداوم مدرسة صف اول متوسط ردت اكمل دراسة بس اخوي ما قبل على ابو عادات وتقاليد والبنية ميصير تدرس وتدخل كلية والوضع مو امان ومن هاذا الكلام المالة نهاية المهم اني بچيت شوية من بطلني من المدرسة وبعدين تقبلت الوضع عادي لان ما اگدر اوگف بوجها اخاف منه لأن هوة المسؤل علينا سكتت وبقت قهرتي بگلبي .اخواتي الأكبر مني كذلك يعني يوصلن مرحلة ويبطلهن رغم هنة كلش شاطرات وجانن كلة اعفاء عام يطلعن بس هم بطلهن وبعد حكم القوي عالضعيف.ورة ما بطلت بفترة اجوي علية خطابة ناس گرايبنا .احنة جماعتنا عاداتهم البنية اذا عرفت تقرأ وتكتب خلاص لازم تبطل وتزوج وتروح لبيت زوجها لأن محد يفيدها غير زوجها حسب كلامهم.اني جان عمري بوكتها ١٣ سنة تعرفون شنو يعني ١٣ سنة يعني لا اعرف زواج لا اعرف عيال لا اعرف اطفال وخدمة.اني جنت مدللة فقط ادرس اكل انام اكعد ب١٢ الضهر.المهم اجوي الناس وطلبوا ايدي اني اكيد ما اكدر ارفض لأن اذا رفضت اخوي ميقبل وميمشي بكلامي وراح يگلي شعندج ترفضين شو انتي لا دراسة ولا شي گاعدة بالبيت وساكتة عاد ازوجي أحسلج محد أخذ رأي بوكتها ولا سألني المهم اجة الولد شفتة وشافني وصارت الخطوبة رسمية وجان هوة اكبر مني ب١١ سنة .الناس الي همة عيالي اهل زوجي چانو اضرب من اهلي يعني بين قوسين (همج) اي هيج أريد اگول من نوع الي عدهم المرة هية والحيوان (حشا ما اكول بوجهكم)ماكو فرق يعني المرة تخدم وتنضرب وتنهان وما الها كلمة وما الها رأي ولا شئ أمام الرجال اوك امنا بالله اني تقبلت الوضع كد ما حجو اهلي برأسي المرة لازم تتحمل والمرة عادي تنضرب والمرة لازم تريد الستر والمرة والمرة والمرة...إلى ما لا نهاية.يعني اني عمري ١٣ سنة سووني مرة عبالك عمرها ٤٠ سنة .المهم تزوجت وعشت وية عيالي جانو أكثر من ١٠ نفرات ببيت واحد وكلة حساب وكتاب وهذا عيب وهاذا ميصير وميجوز ومعاملتهم كلش سيئة للچنة حسبي الله ونعم الوكيل عليهم وبالنسبة لزوجي جان حالة حالهم يضربني على اقل شي رغم يدري بية زغيرة واهلي گلولة زغيرة على كيفك وياها وهوة دگ صدر وگال نحطها بعيونة هوة وأمه .بس صار كلشي عكس كلامهم.گام ميتحمل مني حچاية ويغلط علية ويسب ويفشر علية هذاك الفشار الي مينلبس علية ثوب.اني كمت ما اتحمل وصرت اروح لاهلي زعلانة واشكيلهم بس جانو يذبون الصوچ بية وأول وتالي ارجعلة .اول شكم سنة ما صار عندي اطفال بعدين الله رزقني بطفل والحمدلله سميتة (اموري)جان هوة الوحيد ونستي بالدنيا وجنت اتحمل كلشي لخاطرة وگمت ما اروح لاهلي زعلانة لان كلما اروح فوك ضيمي يلومون بية.احجي الصراحة اني احب زوجي واموت عليه يعني مثل منگول فتحت عيني عليه وعشكتة وصرت ما انام اذا مو على ايدة وچنت مدللتة دلال رغم معاملتة السيئة الي مادري ليش هيج من الله تعلقت بيه وحتى إذا يضربني كمت اني اجي اصالحة واعتذر منه رغم اني والله العلي العظيم ما غلطانة وياه بس بعد هوة آخذة طبع يضرب ويغلط ويسب واني الخيرة اجي اصالحة المهم.ماريد اشرح هواي واطولها عليكم واحجي ضلم ٦ سنوات لأن لو احچي منا لسنه مراح اخلص من الشفتة من ضلم وحچي يحز بالگلب من الزوج والعمة والحما والحمات التجي خطار وتسوي مشاكل وقال وقيل بعد معانات وبعد ما اكلت وحل . الله فرج علية وطلعت بيت وحدي يعني هم قريب عليهم بس ارحم من عشرتهم بهواي ارحم من انو تنزلين الصبح وتلگين الوجوه مگلبه عليج بدون سبب ارحم من انو ترحين خطار لهلج وتجين تلگين الحجي اشكال والوان عليج المهم .كعدت ببيتي وارتاحيت والحمد لله ابني گبال عيني يكبر وزوجي شوية تحسنت معاملتة نگول ١٠٠/٥٠ مو أكثر لأن ابو طبع ما يغير طبعة للموت . هنا عمري صار ١٧ سنة وصرت ادير بيت لوحدي وشلت مسؤلية زوج وطفل وصرت مثل ميكولون ( ام هلة ومرحبا)يعني عيالي كاموا يجوني خطار والله نسيت كلشي وما شلت بگلبي حقد عليهم رغم مرة من المرات حتى بشرفي اتهموني وسكتت وحتى ما كلت لا لزوجي ولا لاهلي ونسيت كلشي وصرت أرحب بيهم من يجون واخدمهم بماي عيني وما انام اذا ما اوفرلهم كلشي وتغمض عينهم يالة اروح انام .ورغم هاذا بقى الحچي وأستمر القال والقيل يعني كلام ينكال وكلام ما ينكال لأن تعبت واني اواجه كلشي واريد الستر بكلشي .زوجي رجع لطبعه وهم رجع يضرب ويغلط ويفشر علية وعلى اهلي واني اموت قهر واموت بچي وما احجي لأحد ولا اسكبي حتى لهلي لأن شنو الفايدة شنو الي راح يتغير اذا حچيت وخاصتا اني بعد صار عندي طفل يعني ما اگدر انفصل عنة .ويوم عن يوم گمت اضوج منة واضوج من سوالفة وحچية . الحچي لله هوة لا عندة سوالف مكسرة ولا من هذول الي يشرب ويلعب اقمار والعياذ بالله.صح هوة ميصلي ولا يصوم بس اني جنت الح علية واگلة لازم تصلي ما طول ربك رزقك بزوجة وبيت وطفل والحمد لله.فانتة لازم تسوي لربك ولو شي بسيط .رغم جان من احچي وياه بموضوع الصلاه جان ما يقبل ويصيح علية وحتى يغلط ويگلي عود من تدخلين الجنة لا تدخليني وياج.اني گلت ميخالف وبقيت الح علية لحد ما الله فدوة اروحلة هداه على الصلاة وكام يصلي بوقتها ويصوم رمضان.بس سبحانك ربي شنو الفايدة اذا هوة بعدة على ضلمه الي وجبروته.جنت اذا اسولف وياه مثلا سالفة عادية بين اي رجال ومرتة جان ميتحمل كلمه مني وگبل أيدة والضربة ولسانة والغلط اخ يابة يا لسانه جان يحجي علية حجي يعني حتى ما سامعة مثله بحياتي واني هم بشر مهما يكون ومهما احبه هم لابد يجي يوم وانفجر وبعد ما اتحمل بس بعدة ما جاي هاذا اليوم .ويوم عن يوم گام حبة يقل بگلبي من ورة معاملتة الي والله مليت وبزعت وحتى اهلي من اشكيلهم يگلولي اني السبب وشنو يعني المرة تتحمل ويگلولي اني خبلة ورعنة وما تنحملين عود هذول اهلي الله يچرم .برأيكم ليش هيج اهلي يگلولي 🤔؟اني اگلكم ليش..لأن اني من نوع الفطيرة يعني اضحك هواي واتشاقة هواي ومن جنت اروحلهم خطار ما ابين حزني ومعاناتي بالعكس جنت اضحك واسهر وتشاقة وية اخواتي من نجتمع وما ازعل من اي كلمه يجرحوني بيها واغلس واسويها بشقه وضحك وما اهتم فلذلك اتصورو اني ما عندي شخصية وما عندي احساس وبس فطيرة واضحك.اني صح گلبي طيب واسامح وما اهتم للحچي بس والله كلة يبقى بگلبي وانقهر واجمع القهر شي فوك شئ وما ابين .اذا همة اهلي اقرب الناس الي ماخذين علية نضرة اني لسان وما انحمل والله لأن اشاقة واحشش واضحك من اروحلهم خطار اتصورو اني عايشة بنعيم وعبالهم اني الي اعيل بزوجي واسوي المشاكل ما يدرون اني ضيمي بگلبي .ويوم من آلايام صارتلي مشكلة لا عالبال ولا عالخاطر من ورة شخص حسبي الله ونعم الوكيل عليه ودفع زوجي علية وخلاه يضربني بدون اي سبب ومن وضحت السالفة لزوجي اتندم وگتلة دز على على الشخص السوة المشكلة خلي يفهمنة ما قبل يدز علية.عاد اني من قهرتي اتصلت على اخوية وگتلة بالصار عاد هوة ما قبل وخابرهم وحلها وياهم بس رجع اخوي راسلني وهم ضل يحچي علية فوك ضيمي وفوك ما اني مضلومه ولا بيها ولا عليها وحتى امي تگلي انتي سبب المشكلة وانتي الخربتي بين الزلم.عود هاي امي أقرب الناس إلي😔اني مصيبتي مصيبة المشكلة محد يدري بضيم گلبي غير ربي وماريد امدح بنفسي بس والله اني ماشيل حقد على بشر وسمعت اشكال الحچي علية وسلمت امري لله.بس اني بشر مو حايط وكلها ضدي يعني زوجي وأهلة واهلي وخواتي وأخوي وكلها عباد الله ضدي وين أروح انتو اكيد هسة تگلولي لازم اكو سبب . بس اني اگلكم وحق مصيبة زينب الحوراء اني ما مسوية شي لأحد ولا مأذية أحد اني مجرد طيبة گلبي عمت علية اسامح هواي وما اعاتب وما خليت لروحي كرامة ورحت بين الرجلين يعني الجان يحجي علية وينتقدني ما اجي واعاتبة واحجي وياه واكلة يابة ليش هيج وليش هيج.لا جنت اسكت وابلع بگلبي وابقى بقهرتي والله حتى جسمي گام يوجعني من القهر وگلبي هم يجي وجع ويروح وماكو شخص احتواني وگال تعاي اشكي وگولي شنو همچ وشنو المضوجج.غير شخص واحد وهوة .(حسام) اااااخ يا حسام هاذا ضيم گلبي هاذا .هاذا هوة مصيبتي وهوة الموجع گلبي هاذا 😔