ملاحظة (الفيديو والأغنية اليوم بين احمد و طيبة)
انا سكرت الراديو و قررت خلاص نسكر معاه الماضي و نعطي روحي فرصة و نعطي لاحمد فرصة مشيت استأذنت من عمتي و غيرت حوايجي و طلعت لسيارتي و قبل ما نطلع بعثت رسالة للمنتصر ان يروح بهوفي لحوشي انا واحمد و طلعت لحوش احمد وصلت و نزلت كان الحوش هادي قلت نركب فوق ع طول بس وقفني صوت فجرية
فجرية : خير يا بنتي !!
انا وقفت و رجعتلها: السلام عليكم كيف حالك اليوم عمتي؟
فجرية و هي تسبح: و عليكم السلام .. الحمدلله
انا بإحراج: آسفة والله ما شفتك الدنيا مسكتة نحسابكم طالعين
فجرية : فارس عدى يوصل في خاله و مراته وأمه للمطار ونا قاعدة هنا اوحدي واحمد مازال ما نزل من فوق
انا بتوتر: يوصلوا بالسلامة ان شاء الله خليني نشوف احمد و ننزلوا نهدرزوا معاك
فجرية وقفت : لا يا بتي خليكي مع راجلك ما في داعي تنزلوا نا توا وقت نومتي نصبي نرقد و وقت الغداء نتغدوا جميع و نحكوا لين نبطلوا
انا : ع راحتك يا عمتي
هي مشت لدارها وانا ركبت فوق فتحت الباب بدون صوت و مشيت باتجاه دار احمد القيته راقد في نوم عميق
طقيت الباب : احمد
احمد تقلب في سريره و بعدها فتح عيونه بالسيف وحط ايديه ع عيونه من قوة الضي اللي خاش من الروشن: كني نا تميت نتخايل والا كيف ؟!
انا ضحكت عليه: احم صباح الخير
احمد قعمز و ضغط ع عيونه وابتسم : طيبة امتى جيتي؟!
انا خشيت للدار وانا متحشمة: هذه وصلتي توا
احمد مسح ع شعره: البارح تميت واعي لعند الفجر هظا عليش اليوم ما نضتش بدري و نزل رجليه ع الارض ع شان يوقف
انا : نوم العوافي هيا فيق و صحصح ع شان نديرلك فطور و بعدين ننزل ندير الغذاء لوطا القيت عمتي مكسدة بروحها
احمد تنهد: اها الباقي روحوا كلهم
انا بضيق : اي قالتلي عمتي هيا نوض وانا نمشي نجهزلك فطورك
طلعت للمطبخ و احمد مشي للحمام دوش و غير لَبْس توتة كاملة حمراء في الأزرق و جاني للمطبخ ألقي فطوره واتي قعمز ع الكرسي : سلمك سواية
انا : تسلم
احمد يشوف للفطور دحي بالخضرة و توست بالجبنة و في عسل و مربى و زيتون و شاهي و قهوة و كيكة: هظا كله ليا نا بس الله يربحك نا ما نحبش نأكل اوحدي قمعزي كولي معايا
انا قعمزت: اوكي نسايرك بس لإني فطرت مع عمتي صبيت قهوة و خذيت طرف كيكة ، اي ليش روحوا من الصبح مش ع اساس قاعدين ما قالتش اختك امس ان طيارتهم الصبح