اكو عائلة عايشة بألمانيا من أصول أيطاليا ،العائلة من أب وأم وطفل أسمه بوركي. طبعاً ابو بوركي عطال بطال يوم يشتغل و10 لا وضل يتنقل من منطقة لمنطقة بأمل يحصل شغل ويعيش مرته وأبنه الصغير،وانتقل من شمال ألمانيا لجنوبها وماكدر يحصل وظيفة تعيشه وتعيش أسرته وبدأت المشاكل بينه وبين زوجته الى أن فديوم مرته قررت تنفصل عنه وبالفعل تم الطلاق، واخذت أبنها وانتقلت لمنطقة حدودية أسمها (مرباخ) هاي منطقة صح حدودية بين ألمانيا وسويسرا بس غنية وممكن أحد يحصل وظيفة.
الام سجلت أبنها بالمدرسة بس الطفل ما جان طفل عادي بسبب المشاكل بين الأم والاب والوضع المادي التعبان وجان منبوذ بين الاصدقاء ومحد يحبه ويحترمه، فصار يتصرف تصرفات غريبة ويوكع نفسه بمواقف صعبة وخطرة بس حتى يثبت نفسه ووجوده بين زملائه ، مرة من المرات بأحد دروس السباحة طلب المعلم من الطلاب يسبحون بالمسبح عدا بوركي لان ما جان يعرف يسبح، كال بوركي للمعلم لا اني اعرف اسبح، وكوم كبل وذب روحك بالمسبح وجان راح يغرك لو ما اتلاحكو عليه وطلعوه والمعلم رزله على سوايته،ط. جان طفل جريء ويحاول يثبت نفسه بس تصرفاته بغباء وغير مدروسة مثلا يروح وياخذ خيمة وينصبها عالخط السريع وكل هالحركات يسويها حتى يلفت انتباه الناس واصدقائه اله عود هو قوي وجريء وميخوفه شي.
ضل على هاي الحالة الى ان صار عمره 17 سنة أمه سجلته بمدرسة مهنية يعني تعلمه يكون مندوب او موظف بفندق بس المعلم المسؤول عن بوركي انتبه هذا الطالب ما يفيد بشي لان جان هوايه يجذب ويسوي نفسه غني ومن عائلة عريقة ودائما ينصحة المعلم يغير من اسلوبه لان الحياة المهنية تحتاج صدق وحسن تعامل وانسان حقيقي، ولان بوركي ميفيد وياه النصايح بكل الطرق ضاج منه المعلم بالاخير وطرده من صفوفه، وكعد فترة بالبيت ضايج بعدين قرر يلكى شغلة ثانية يسويها.
ام بوركي لان من أنتقلت لهاي المدينة كامت تشتغل لمت ايدها واشترت قطعة ارض وكامت كل ميصير عندها فلوس تلمهن وتبني شي اضافي للبيت وتكبر بيه، وجانو بحاجة للفلوس علمود البناء فقرر بوركي يقدم على الشرطة وجانت هاي ببداية الثمانينات، قدم اول مرة عالشرطة رفضوه، قدم مرة ثانيه وانقبل وصار شرطي وفعلا داوم واتخصص بتربية الكلاب البوليسية (كلاب الاثر) وبدت تتغير حياته وتتحسن ومن بدت اموره تتحسن انتقل لاحد المدن الجبيرة بألمانيا وهناك أتعرف على زميلته هم عسكرية تشتغل بالشرطة واتزوجها وخلف منها 3 اولاد واستقرت حالته وكلشي تمام ومشت وياه الحياة، بس ويا الولد الثالث الاجاه اتوفت والدته العايشة بمدينة مرباخ، واتفق ويا مرته يرحون ويعيشون بمدينة مرباخ ويكملون بناء بيت امه من رواتبهم لان صار ورث اله وكالها احسن من نبقى هنا عايشين بشقة وأيجار.
وصدك راحو وبدون بالفلوس الس مجمعيها يبنون بيت بالارض مالت أمه وشوية شوية ويا القروض الاخذوهن بنو فيلا كلش راقية وكام بوركي يعوض مرته وجهاله عن الحرمان الجان هو عايش بيه من صغير ،جان يشتري اغلى الالعاب لاطفاله وجاب أحسن الاثاث لمرته وما راد يخلي عائلته تعيش مثل ما هو عاش، بس هالشي خلاه يغرك بالديون والقروض وفلس وكال لنفسه مستحيل أستسلم هنا وأرجع للفقر والعوز مرة ثانية فقرر ينفذ أول جريمة وجان بوركي ملقب (المجرم صاحب المطرقة) شلون جان بوركي ينفذ جرائمه؟
