خبـايـا الـروح.

شوية كلام..

انا أول مرة أتكلم عن نفسي هناا بس حاسه لو اتكلمت هرتاح شوي حتي لو محدش فتح او حتى قرأ بس أهو طلعت اللي جوايا وخلاص...

عارفين لما تبقي عارف نهايتك هتبقى اي ومع ذلك بتعافر وبتجهد في نفسك وف طاقتك عشان توصل للنهاية دي اللي هي ولا شئ أصلا بمعنى بتهلك نفسك وتتعب روحك ع الفاضي..

طيب عارفين أن الحلم اللي أنا بحلمه من زمان مش هيبقي حقيقة وعامله نفسي هبلة ومكمله فيه، وحلم يجر حلم وفي الآخر عارفه أني مش هوصلله وبردو بهلك طاقتي ع الفاضي..

طيب عارفين لما تكون داخل تجربة جديدة وعارف أنها هتفشل ومع ذلك مصمم عليهاوعايز تجربها على حساب قلبك وأحساسك بمعنى أنك داخل تجربة وعارف أنها فاشلة عشان حاجات كتير غلط فيهاا والتجربة دي هتخسر قصادهاا مشاعرك ف أنك تحس بعد كده بأي وجع او حتى فرحة وبردو مصمم تجربهااا..

حقيقي البني آدم بيدور ع اللي بيأذيه، وعلي اللي بيجرحه ويوجع قلبه ويجري وراه، ويقول ومالو دي تجربه، وتجربه ورا التانيه وكل التجارب دي فاشلة مقابل أنك بقى عندك لامبالاة رهيبة، بقيت إنسان مش حاسس بأي شئ وكلو عندك واحد حزن زي فرحة زي غيره كلو واحد مفيش فرق...

ملخص الكلام

اول شئ الحدود..

حط حدود ف كل حاجه ف حياتك، ف كل علاقة تدخلها، في كل حاجه وصدقني هترتاح، حط حدود لنفسك أنك مش هتتخطاها ابدًا، حط حدود لأحلامك، آه حط حدود لأحلامك لأن محدش بيوصل ليها، حتى لو عملت اللي عليك واجتهدت وتعبت، الظروف اللي احنا فيها او البلد فيهاا مش هتخليك توصلله أو أصلا متشجعش ان حد يحلم أساسا، توقع فشل أحلامك عشان متتعبش لوو متحققتش..

تاني شئ التجارب..

متخوضش أي تجربة لو شاكك ولو ب 1 في المية انها هتفشل، ومتقولش اشمعناا أنا او هي جت علياا ماكلو جرب الشئ ده...تعرفو مرة حد قاللي الصح مش بالكُترة، بمعنى انه مش معني ان ناس كتير جربت حاجه يبقى الحاجة دي صح هتندم بس هتندم بعد فوات الأوان بعد ماتخسر إحساسك وتكسب اللامبالاة..

حافظ ع قلبك وصون مشاعرك وإحساسك ،لو خسرت التلاته دول أعرف أنك خسرت نفسك..

كلامي متناقض شوي بس ده لاني حقيقي في فترة معرفش أنا عايزه اي، فاقدة الشغف تجاه كل حاجه..

واللي مش عاجبه كلامي او شايف أني أخطأت ف شئ يقول وأنا هسمع وجهة نظره يمكن أنا شايفة الموضوع بطريقة غلط، وممكن أغير وجهة نظري.

-مريم نصر.