مواسم الذبول..... للكاتبه زهراء ( روزايه)
سنه 2010
في النجف الاشرف ..
... انتي شعندج تفترين وحدج من محل لمحل ماعندج اهل والي شو تايهه
... لا عندي بس تيهتهم بالزياره
... هاااا مامبين عليج اليتيه اهله يروح يصيح بيهم بالسماعه يبجي يصيح شو انتي مستانسه؟؟
... انت تحقق وياي تبيعلي كعك لواشتري من غيرك
... لا ماابيعلج روحي لغيري
... ترى بفلوسي وكل مره الرجال الجبير حته ينطيني زايد بس انت من تجي حته بيع ماتبيعلي
... روحي منا رحمه لاهلج واذا اهلج متيهتهم روحي لمركز المفقودين وهم يتكفلون بالسالفه لان زحمه بنيه مثلج تفتر وحدهه من مكان لمكان وبعد لاتجين هنا اشتري من غيرنه...
.... ليش؟؟
... تعال يول زيدون عزل المحل اني طالع لبغداد فات من يمي وسويجه بيده وعزلوا المحل وماانطوني لادهينه ولا كعك بس من يجي الحجي ينطيني هذوله الشباب ماينطون نص كعكه ...
____________
بغداد ... الساعه العاشره والنصف صباحا...
ست حوراء تفتر بين الرحلات تفتش على الواجب البيتي
هذا الدرس الرابع عدنه رياضيات وعيني على الساعه الفوگ السبوره شوكت ينتهي الدوام وارجع للبيت بالي يمهه..
اليوم طلعت وهي مالهه خلك البارحه للصبح اني كاعده وياهه
حته احس راسي يريد ينفجر من السهر والتفكير هلكني واني
بعز شبابي راسي يفتر اكلت ؟! شربت؟؟! خاف احتاجت شي
لو بيدي اشيل من عمري وانطيهه بس اشوف ضحكتهه
بين هوسه البنات والمدرسه بعدهه تحاسب اندك الباب الفراشه ام وليد كالت الاداره تريد لؤلؤ!!!
اول مره تطلبني الاداره اصلا اني اجيت هالسنه لهاي المدرسه الاهليه حته المدرسات والطالبات مااعرفهم ..
طلعت من الصف جان باب الاداره مسدود هاي اداره خاصه فقط بالحسابات والوصولات بس دائما المديره كاعده بيهه لان المديره ماتنوصف من هذني القديمات الي امشيه المدرسه ميل..
دكيت الباب ودخلت كلت السلام عليكم المديره ردت السلام بنتر والكاعد يمهه مره وحده شايفته اجه بالاصطفاف الي اعرفه هو المستثمر مال المدرسه بس ميداوم هنا...
اشرلي اكعد كدامه مااعرف شكو وشنو رايدين مني ؟؟
بس الوجوه ماتبشر بخير ومبين اكو شي قطع صفنتي واني افكر شيردون مني بالاول عبالي على الفلوس او تكمله القسط!!
عدل كعدته ووجهلي سؤال ولفظ اسمي مثل الواحد يتهجىء الكلمه لؤ لؤ...
لفظه وسكت ورجع كمل كلامه بحديه وكال اجتنه شكوه عليج
قبل يومين وصارت حادثه هنا واكثر من وحده اشتكت عليج راح اسألج وجاوبيني خاف عندج وحده تضدج حته نفتهم السالفه..
