الخيانة

بارت 3

#الخيانة
*الحلقة 3 *
#ريم_ايمن

*في المستشفى *
خالد: قولي يا دكتور هو ايه اللي حصله ؟
_الدكتور : جرعة مخدرات أوڤردوس
•خالد بإستغراب: مخدرات ؟! ازاي وهو من ساعه ما جيه من يومين وهو في حجز انفرادي واحنا عارفين بياكل ايه ويشرب ايه كويس ؟!!
_الدكتور بتفكير: مش عارف بصراحه بس غالباً هيكون حد دخله الحاجات دي .. دفع رشوة مثلاً .. بس دا غبي لو فكر يعمل كده وهو عندكم في القسم كده ..
يا إما دا اللي حصل أو ..
_خالد بيكمل بغموض: محاولة قتل
•الدكتور :تحب اكتب تقرير بالمخدرات؟
_خالد بغموض : لا .. اكتب وعكه صحيه أو اي حاجه لحد ما اشوف هعمل ايه
•الدكتور : تمام يا فندم .. هستأذن انا اشوف شغلي .. ااه انت مينفعش تدخله انهارده هو لسه في البنج .. بكره أن شاء الله تقدر تجيله ..
*خالد حرك راسه بموافقه .. وخرج من المستشفي ..

************************

*في الجامعه قاعده بسنت مع مي

_مي بضيق : فكيها بقي يا بسنت مش كده .. كلب وراح لحاله مينفعش اللي بتعمليه في نفسك كده
•بسنت ببرود :وانا بعمل ايه يعني ما انا نزلت الجامعه أهو .. عايزني اعمل ايه تاني يعني .. أتحزم وارقص ؟
_مي بضحك : ياريت والله هههههه
•بسنت بتبصلها بضيق وبتسكت .. بيقعدوا شويه وبعدين بيقرروا يمشوا ويروحوا .. بس اول ما بسنت بتقف بتمسك بطنها جامد وبيظهر عليها الألم وهي بتصرخ وبتقع علي الارض والدم بينزل من بؤها وو ....

****************************

*في القسم خالد بيزعق في العساكر بأعلي صوته بعصبيه : يعني ايه ياخد مخدرات وهو محبوس في القسم بتاعي .. يعني ايه تدخله المخدرات وهو محبوس إنفرادي اصلاً .. انا لما هعرف مين اللي عمل كده هوديه ورا الشمس .. وهعرفه .. يلا غوروا من قدامي ..

*العساكر بيخرجوا وبيقفلوا الباب ومابيفضلش غير خالد لوحده في المكتب .. بيقعد علي الكرسي بعصبيه وهو محتار في كل اللي بيحصل .. بيفتكر تقرير الطبيب الشرعي وينفخ بضيق وهو مش قادر يفهم ..
بيطلع صور الضحيه سارا ويبصلها .. وبعدين يرجع يبص لتقرير الطبيب الشرعي بضيق ..

فجأه النور بيفضل ينور ويطفي بسرعه لثواني قبل ما النور يطفي خالص والمكان يبقي ضلمة ..

خالد حس بحراره المكان بتزيد بطريقة غريبه لدرجه انه بدأ يعرق .. بدأ يحرك ايده علي المكتب بضيق وهو بيدور على موبايله عشان ينور المكان لحد ما لقيه .. بس قبل ما يفتحه النور رجع تاني ..

خالد زفر براحه قبل ما يحبس أنفاسه بخضه لما يشوف حد واقف قدامه ..

خالد بإرتباك وتساؤل وهمس : سارا ..؟!!

*****************************

*في المستشفى احمد كان بدأ يفوق .. الرؤيه كانت مشوشه وكان لسه دايخ .. ماقدرش يتحرك من مكانه أو ما حاولش اصلا ..

كان في اوضه لوحده .. الاوضه كانت ضلمة بس في نور خافت جاي من برا ..

كان بيغمض عيونه عشان يرجع ينام تاني قبل ما يحس بحركه تحت الغطا اللي هو متغطي بيه .. وتُقل في طرف السرير زي ما يكون حد قاعد ..
كان بيحاول يفتح عنيه بخوف قبل ما يحس بصوابع بتتحرك علي رجليه .. صوابع بارده وطويله ..

فتح عنيه ببطء وفعلاً شاف جسم حد تحت الغطا معاه ..
بدأ يحس بالشخص بيلمس جسمه .. احمد حاول يتحرك ماقدرش .. كان زي ما يكون حاجه مانعاه من الحركه .. كان في حالة شلل يادوب قادر يحرك عنيه بس .. !!
الشخص نام عليه تحت الغطا .. هو مش شايف الشخص عشان الغطا مداريه بس باين .. أو بمعنى أصح الست اللي معاه تحت الغطا ..
بدأ يحس بلمساتها الباردة بتتحرك في كل جسمه .. وبأنفاسها السخنه اللي بتلسعه ..
كانت بتتحرك ببطء لحد ما وصلت وبقت نايمه علي صدره .. هو متابعاها بعنيه .. خلاص الغطا بدأ يترفع وهيشوفها ..

كان جسمه غرقان مايه من عرقه الغزير .. عينيه متعلقه بيها مستنيها تظهر من تحت الغطا وفي نفس الوقت خايف ..

الغطا اترفع وظهر شعرها .. شعرها اسود طويل هو مكانش شايف آخره فين ..
هي بدأت ترفع راسها وهو قلبه دق برعب لما شاف وشها بجلدها الاسود وعيونها الصفرا اللي من غير سواد .. كانت مُبتسمة ابتسامه بينت سنانها وأنيابها الطويله البُنية ..!!

ولأول مرة تتكلم .. وبهمس قالتله وهي باصه في عيونه : بحبك يا احمد .. انت بتاعي انا بس ..

احمد كان باصصلها برعب حقيقي قبل ما هي تطلع لسانها الطويل زي الأفعي ويتلف حوالين رقبه احمد يقربه منها وهي بتفتح بؤها اللي كان بيوسع اوووي وو ....

****************************

*في مكان تاني في شارع شبه فاضي بنت بتتكلم في التليفون

البنت : انا عايزه آجي أقابله بكره ضروري
_ ..............
البنت : مليش دعوه .. اتصرف انت بس وانا هظبطك
_ ...............
البنت : حاضر هعملك اللي انت عايزه وعد بس خلصني بقي
_ .................
البنت : خلاص هستني منك رساله بالميعاد .. سلام

*يُتبع ... *

محدش يقرا في صمت انا بتعب وانا بفكر واكتب يا شريرين🙂😒

#الخيانة
#بقلمي_ريم_ايمن
#Reem_Ayman