منِسمع أنو الولد بيجي وبتجي رزقتو معو ويمكِن هاد الشي اللّي بخلي الناس تجيب أطفال بهالعشوائية، بس هاد مو مُبرّر لأن إذا قدرِت تطعميه وتشرّبو وتلبسو وتنيمو ببيت مو هي الرزقة، هاد بخليه يضل عايش مو أكتر!
في كتير كائنات ممكن تجيبها وتربّيها بهي الطريقة إذا هاد بِحسِّسك بالإنجاز، يمكن تكون رِزقتو بتجي معو بس تربيتو والأمان والدعم والعاطفة ما بتجي معو!
هي بدّك تتعذّب أنت وتتحمّل مسؤوليتها وتقدّمها!
يعني إذا مو فاضي تعطِيه وقتك ما تجيبو ع الدنيا وإذا ما عندك عاطفة وإهتمام واللّي هنّي الأساس لتكوّن إنسان ما تخلّفو، وإذا ما بدّك تكون سَنَد ودعم بالفترة اللّي هو بحاجة إلك لكان كِبِر وتحمّل مسؤولية نفسو ما تخلّف!
إذا حاسِس حالك أنك مُمكِن توجِهلو حكي قاسي أو تضربو فكون أكيد أنّك عم تجعله كتلة عُقَد نفسيّة بتأثّر عليه ع كَبَر!
وبرجع بقلّك أهم شي إذا عم تجيب طفل لأنك معتبر هاد إنجاز ولترضي نفسك فأنت عملت شي إلك مو للطفل، وعملت شي عادي كل الناس بتِقدر تعملوا!
الإنجاز الحقيقي بس تعرِف تربّي صح وتطلّع إنسان ثابت مشَبَّع حُبّ وقوة وثِقة بحالو، ويعرِف يحقِّق شي يكمّل حياتو فيه بِسبَبك ساعتها هاد إنجاز!
الأطفال مو ألعاب منِتسلى فيهن ونعيشها شوي ويبقى شبهي وشبهك ونلبس نحن وياهن وننجلق فيهن على السوشيل ميديا وندمّر نفسيتهن ورا الكواليس،
تخلّص من طفولتك قبل ما تخلّف،
كل عشوائية المُجتمع ومشاكلو والفَشَل بالعلاقات والدِراسة والشغل وبالحياة كلها هو نتيجة أطفال مخلّفة أطفال 🖤
