#كتير_حبيت
بعد ست سنين زواج ولدت أول طفل، يومها وأنا بغرفة المشفى وبعدني تحت تأثير البنج ، دخلت الممرضة وقالتلي وهي عّم تفحص الجرح "زوجك بيشتكي من حالة نفسية شي ؟! "
ما كنت قادرة رد عليها ولا واعية لاغلب كلامها
"زوجك عذبنا كتير ، كل شوي يدخل يقلنا "هي منيحة"، "بنزل جبلها شي من تحت !" ، "ما رح تحس بوجع صح!" ، "ما خبرتكم انها بدها ياني" ، "بدكم مساعدة بشي؟ "
"و أي ممرضة تدخل غرفة العمليات يوقفها ويقلها طمنيني الله يخليكي، لدرجة كنا بدنا ننقلك لغرفة عمليات تانية من غير ما نخبرو"
ضحكت وقالتلي" ولَك كان قاعد عم يدعي كل الوقت، ونزل أشترى حلو وشوكولا ووزع على كل حدا شافه وطلب منهم يدعولك تقومي بخير وماتحسي بألم"
"مبين عليه بيتفرج ع أفلام كتير ، قبل ما الدكتور يدخل غرفة العمليات ، مسك إيده وقله "أمانة لو صار شي انقذوها هي ومو مهم أي شي تاني"
قال الجملة هي شي خمس او سبع مرات بدقيقة ونص كأنه عّم يأكد عليها"
لما رجعت انا وياه عالبيت كان يجيب وصفات أكل من اليوتيوب ويصير يعملها ، مرة يحرق الطبخة ومرة يطلع زايد ملح او ناقص..
وكل مره يقلي "الشيف هو الغلط ، رح شوف فيديو لشيف غيره"
جاب كتاب بيحكي عن "مراعاة المرأة بعد ولادتها " ، وصار يطبق الكلام الي عم يقراه كل يوم، مع انو قرايته وثقافته ع قدو..
من كتر التعب بشغلو وبعدها شغل البيت والأكل كان يخلص تحضيرو ع وقت المغرب وبعدها يحطلي الاكل وينام ع رجلي
كنت حط إيدي بشعرو وطبطب ع راسو ، كان يبقى شايل علبة المسكن تبعي بجيبتو منشان أول ما اتوجع ما يقعد يدور عليه ..
كان حنون لدرجة كان يقعد يحفظ اسامي الادوية ووقتها ويسمعها لحالو منشان ما يخربط بأي دوا ..
كان تطبيق حرفي لجملة "ويأتيك شخصٌ على هيئة عوض، ينسيك كل الحزن الذي اكل روحك سابقاً " ❤️🌸
#أي_وهيك
