انتِ (كتاب لكل فتاه عربيه ..❤)

طلاب 3 ثانوي ..

باقي ٤١ يوم و ٤١ أمل جديد لتحديد مصيرنا، ننسي بقي كل الوقت اللي عدا في حياتنا ونركز كويس أوي في الكلمتين دول....

دلوقتي لو كل واحد فينا وقف قدام المرايا وبص لملامح وشه كويس وركز في تفاصيله ورجع بالذاكرة لكل عمره اللي فات هيشوف إيه!!

أول حاجة هيشوفها هي أمه .....

هيشوف ست عظيمة ضحت بطاقة فوق طاقتها علشان تشوفه أحسن من غيره، ست كانت بتطوّل في سجودها مخصوص علشان بس تدعيله وتحكي لربنا عنه وتقول يارب ده إبني اللي نفسي اتباهي بيه قدام الدنيا كلها واتشرف بيه ويفضل رافع راسي.
يارب أنا من يوم ما جه للدنيا وانا عايشة بس علشانه..
تعبت أوي يارب وبقالي ١٩ سنة عايشة علشان اشوف اليوم ده..
أشوفه ناجح بس يارب...

ومن الناحية التانية أبوك...

بيتك وأمانك وضهرك القوي.
راجل شقيان وتبعان ليل ونهار في شغله علشان بس يقدر يكفي مصاريفك وعمره ما اشتكي ولا ملّ من شغله..
عمره ما اشتكي لمجرد إنه عنده أمل إنك هتنصفُه وتكون حظه الحلو اللي في الدنيا.
راجل عجيب أوي!!! بيضحي بصحته علشان يوفرلك صحة!! وبيضيع في سنين عمره علشان يرسملك سنين تكون عايش فيها بطريقة كويسة!!

أنت متخيل معاك إتنين زي دول في حياتك!!
متخيل يكون معاك جيش بيحارب الدنيا علشانك وأنت واقف مكانك بتعيط زي العيل الصغير وخايف من سنة أهلك ضيعوا علشانها سنين من عمرهم!!

طب عارف لو بصيت وراك هتشوف إيه!!!

هتشوف كل واحد راهن علي فشلك واقف بيضحك عليك وهو شايفك ضعيف وجبان وخايف تواجه خوفك وترسم مستقبلك وتفتح باب المعجزات قدام عينيك وتحقق اللي كنت بتقول عليه في يوم مستحيل.
هتشوفهم شمتانين ومستنيين وقوعك بأي طريقة.

شكسيير قال في مسرحية من مسرحياتُه:

"لما تشوف مشهد مُرعب إوعي تغمض عينيك، لإن اللي هتشوفه في خيالك أفظع بكتير من اللي ممكن تشوفه في الحقيقة، فـ الصح إنك تفتح عينك وتقرب وشك من الكواليس وتواجه خوفك، وساعتها بدل ما تشوف مشهد خوف.. هتشوف نقط وحروف.. هتشوف الحقيقة كاملة ونجاحك في أبهىٰ صورُه".

أنت ربنا ماخلقش كدة وخلاص...
أكيد ليك دور مهم في الحياة، فدور علي نفسك وحط إيدك علي قلبك وتقول أنا هقدر... طول ما ربنا جمبي أنا هقدر.

حط قدام عينيك أمك وقد إيه هتكون فرحانة وهتعيط من كرم ربنا وتحس إنك عوضتها عن سنين طوييييلة صبرت فيها علشانك.
وأبوك اللي هيمشي رافع راسه وسط الناس كلها، وقبل ما يقول اسمك، هيقول ده ابني وعوضي الحقيقي في الدنيا.. ابني اللي شرفني قدام كل الدنيا.

فـ بالله عليكوا طبطبوا علي قلوب بعض وإتمنوا الخير لبعض، أصل ماحدش هياخد رزقك!!!

وحقيقي إحنا محتاجين نلاقي الي يسمعنا ويدعمنا ولو بكلمة طيبة وطبطة ع الكتف، يونسنا وينور شيء من الضلمة دي.

ومهما كان مجموعك بص لنفسك واضحك واتباهي بتعبك، لإن كل الكليات حلوة بس اللي يبدع وينجح في مجاله هيكون أحلي.
ومافيش حاجة اسمها كليات قمة، لإن ياما ناس دخلتها وقابلها فشل زريع.

ماتبخلوش على حد بأي كلمة طيبة أو حتى ابتسامة الله يرضى عليكم، قولوا للناس الجميلة إنها جميلة بدون كسوف أو إحراج أو نفسنة، جايز الكلمة دي ترجعله ثقته بنفسه وتسنده وهو على حافة الهلاك ومش قادر يتكلم.
لو لاقيتوا حد بيعمل حاجة كويسة في ظل الضلمة دي قولولهم إنتم رائعين وبتعملوا حاجة كويسة وكملوا.

ربنا خلق لكل واحد رزقه، فمهما كان رزقك إفرح، لإن ربنا بيحبك وعاوزك في المكان ده علشان مرتبلك حاجة معينة هتنبهر بيها قدام وتعيط من كرم ربنا، وهتدوق أحلي طعم للجبر..
بس شوية صبر.

عافروا وبصوا للجانب المنور وماتفضلوش في الضلمة لوحدكم، لأن المعافرة ضد التيار لوحدنا مش هتبقى في مصلحتنا أبدًا.

وخليك متأكد إن المحاولة والدعاء والقرب من ربنا بتخلي كل المستحيل ممكن.
ودلوقتي...

لسه باقي ٤١ يوم بـ ٤١ أمل، لو كل يوم ذاكرنا كل المواد ومن كل مادة ٥ صفحات بس هنيجي آخر الشهر هنلاقي نفسنا خلصنا ١٥٠ صفحة من كل مادة، اللي هو المنهج كله تقريبًا.
وهيكون فيه وقت كمان للمراجعة بين الامتحانات.

وفي النهاية...

"تأكد أن الله لم يخلقك عبثًا وحتمًا لك دور مهم في تلك الحياة، ففتش عنه في قلبك وستجده".

"أنت مخلوق بقوة مُرعبة تحتاج فقط أن تؤمن بنفسك".

و يوم سعيدة وأتمني لكل واحد استجابة من ربنا تصلح كل اللي جواه من خراب.⁦❤️⁩

رحمه عبده...