بتحكي قالت :
نحن متزوجين عن حب لينا خمسة سنين حياتنا ماشة سمنة على عـسل بس المشكلة ربنا م رزقنا ب اطفال نحن راضيين بالحاجة دي والحمد لله بس المجتمع واهلو م مريحننا انا وصلت ل درجة قلت ليهو يعرس فيني م عندي مشكلة بس ردو كل مرة بيكون واحد طفل ما منك انا ما عايزو على قدر م بكون موجوعة عليهو بققدر ما كلامو بخفف عني ويحتويني ويواسيني ورغم انو بكون موجوع اكتر مني انا لو قعدت احكي عنو العمر كلو م بوفي ولا ربع تعاملو وحنيتو معاي و دائما بقول لي طالما نحن سوا خلي الناس يقولو اصلاً كدا كدا ح يقولو وكان كل م اكون زعلانة او زهجانة يسوقني الملاهي يفسحني ويأكلني ايسكريم زي الطفلة كأني بتو م مرتو ودائماً بقول لي انتي طفلتي ومالية علي حياتي م محتاجين اطفال في حياتنا .. وكانت عندي دعوة ثابتة في كل صلاة *انو ربنا يرزقني الزرية الصالحة عشان افرح قلبو زي ما هو دائماً بفرح قلبي* وبعد فترة مزاجي دا اتغير فجأة وبقيت م بقدر اقعد في البيت وإلا وهو معاي حتى الشغل اخد منو اجازة عشاني بس بقى قاعد معاي المشكلة انو م بتكلم معاهو ولا اي شئ بس اكون راقدة كدا في حضنو يوم ونحن قاعدين في الصالة وقاعدة في حضنو بنحضر في فيلم الباب ضرب مشى فتحو كانت دي جارتي ف دخلها وفضلها وستأذن مننا عشان ناخد راحتنا بس لمن كان ماشي بس كنت بعاين ليهو نظام م يزح من جمبي وكدا المهم بعد فات جارتي قالت لي وشك دا مالو شاحب كدا شكلك دا ما عاجبني وقالت لي وبإبتسامة كدا وقرصتني انتي شكلك حامل وانا بي خلعة قلت ليها لا لا لا ما اظن قالت لي وهي بتضحك أسألي مجرب احسن ليك تمشي تفحصي الحمل قلت ليها انا الحمل دا مستبعداهو شديد قالت لي مافي حاجة بعيدة على ربنا والصباح اجهزي انا بجيك امشي معاك المستوصف قلت ليها خلاص موافقة لكن من غير ما اكلم راجلي عشان خايفه اعشمو ساي ويطلع مافي حمل قالت لي تمام يازولة المهم اخدت ونستا معاي وطلعت انا الليل كلو م نمت بفكر في كلامها ي ربي كلامها يكون صح وتاني قلت لي ما يكون صاح المهم وكلت امري لله ونمت...الصباح راجلي قال لي لازم اليوم امشي الشغل عشان عندي اجتماع مهم بطلع بالكتير اربع ساعات وبرجع عملت ليهو الشاي شربو وجهزت ليهو ملابسو حقت الشغل قدمتو لحدي الباب وودعني وقال لي م بتأخر اوكـِ؟ بعد طلع رتبت بيتي ولبست توبي وطلعت مشيت لي جارتي وسوقتها ومشينا اقرب مستوصف فحصت وقعدنا منتظرين النتيجة انا قاعدة ومتوترة توتر مبالغة بعد ساعة انتظار النتيجة طلعت والحمد لله طلعت حامل ياخ انا دي بكيت بكاء في الدنيا دي وبقيت شغالة الحمد لله الحمد لله بس جارتي مسكتني وقعدت تبكي معاي وبقت تقول لي اهو صبرتي ونولتي الحمد لله لمن المستوصف دا كلو قعد يعاين فينا رجعت البيت وانا بفكر كيف اكلمو ... بعد شوية كدا جا راجع من يدخل بنده علي الويتي حبيبتي وين انتِ جا لقاني في الغرفة حضني مسااااااااافة وقال لي اشتقت ليك قلت ليهو وانا اكتر مشيت جبت ليهو موية وعصير وجيت اثناء م بشرب في العصير مشيت جبت ليهو بوكس صغير كدا ختة كباية العصير وقال لي دا شنو ابتسمت وقلت ليهو افتحو ..شالو وفتحو عاين لي بإستغراب نظام دا شنو مسكت وشو بين إيديني وقلت ليهو دي جزمة البيبي حقنا الجاي في الطريق فضل يعاين لي مسافة قام وقعد وتاني قام بقى بس لافي في الغرفة تاني جا ووقف قدامي وقال لي يعني بالجد ح يبقى عندنا بيبي هزيت ليهو راسي بنعم وانا دموعي جارية فجاءة سجد سجدة شكر في الواطة وبعد داك مسكني حضني عليهو لدرجة حسيت عضامي ح تتكسر فجاءة حسيت بحاجة بتنزل في كتفي بقيت احاول الفت فيهو ولقيتو ببكي اي والله ببكي وكمان بصوت المهم مرت شهور حملي بسلام بس كنت معذباهو عذاب بس كان مستحملني عادي بصحيهو نص الليل عشان نفسي في حاجة م كل ولا مل بالعكس بتقبل طلباتي بكل حب وجاء يوم الولادة صاح كان صعب واي شئ بس لمن شفت بتي قدامي كل التعب التعبتو راح والحمد لله عندنا احلا وجن في الدنيا وماليا علينا حياتنا 💖
*اصبرو ي جماعة الصبر مفتاح الفرج*
*اللهــم سنداً تميل بنا الحياة ولا يميــل♥️🔐*
*بقلم : زولة خدورية*
