بيحكي قال:
الليلة عرس اختي ومع جيب دا وسوي دا تعب بس الحمد لله لكن قدام فرحة اختي التعب دا ولا اي شئ💜انا اصلاً زول بطبعي حنون ما برضى حاجة في اخواتي ، المهم الدعوة كانت عشاء وحفلة عند اهل العريس فمشينا بيتهم شوية كدا والعرسان وصلو والحفلة بدت ، من بين كل الناس والمعازيم لمحت لي وحدة تقريباً قاعدة جمب امها ومجموعة من الحريم الكبار ماقاعدة مع بنات من سنها دي البت الوحيدة الكانت هادية في الحفلة عمري ما انسى ملامحها سمراء سمرة ناعمة وعيونها الزي عيون المَها (الغزال) ومع انو الدنيا ليل بس لمحت عيونها البنية ولا إبتسامتها اااااخ يا ساتر بس من ضحكتها كانت آية من الجمال🤤 سبحان من خلقها خطفت قلبي من اول نظرة🤤♥️و مرت تلاتة سنة من شوفت البت دي طول السنين دي وانا بفكر فيها وفي خلال السنين دي سألت منها طلعت بت اسرة عريقة ومحترمة ولمن سألت من امها قالو لي *امها دي في حد زاتها مدرسة* يعني مرة ماشاء الله عليها المهم عرفت عيلتها وكنت على معرفة سابقة بأخوها الكبير فمشينا ليه انا وراجل اختي وواحد صحبي وصاحب اخوها مشينا ليه في محل شغلو وكلمناهو بالموضوع انو انا داير اختو على سنة الله ورسوله قال لي انا ما عندي مشكلة وانا مابلقى احسن منك بس والله إتقدم ليها عريس امبارح ولسه ما ادتنا رأيها لكن لو في نصيب ح تكون ليك ان شاء الله ، طلعت من عندو وانا محبط كلياً يعني معقول انا تلاتة سنين دايرة تكون حلالي ولمن أتشجع وامشي اخطي اول خطوة في طريق حياتنا الجديدة القى في زول متقدم ليها💔 حرفياً انا اليوم دا قضيتو م فاهم اي شئ لكن في نفس الوقت كنت حاسس بإطمئنان انها حتكون من نصيبي، المهم بعد اسبوع وانا قاعد في الشارع جنب باب بيتنا وبشرب في قهوة الصباح اتصل علي صحبي قال لي اخوها قال البت دي رفضت العريس الكان متقدم ليها انا م صدقت كباية القهوة خليتها في محلها وجريت ركبت عربيتي وطوالي على محل شغل اخوها ياخ كنت فرحان فرح من وصلنا قلت ليهو طوالي تحدد لي موعد مع اهلك عشان اجي اتقدم وانا اساساً كنت مكلم اهلي اني عايز وحدة ووريتهم هي بت منو وكدا وامي طوالي رحبت بالفكرة لانو معروفين بالإحترام المهم اخوها قال لي بطرح الفكرة على ناس البيت وبشوف رأيهم وبديك خبر ، وابوها زيو زي اي راجل سوداني بتهمو سعادة بتو سأل مني وكدا وحددو لينا موعد يوم احد وانا يوم الاتنين طوالي كنت مسافر الإمارات جاتني فرصة شغل هناك وماكنت عايز اسافر من غير ما اخطي الخطوة دي لاني كنت خايف تضيع مني ، المهم مشينا ليهم انا وامي ومعانا اختي وراجلها وصحبي المشى معاي يوم مشينا ل لأخوها مشينا وإستقبلونا احسن إستقبال وابوها ماشاء الله زول محترم وظاهر عليهو الوقار من جات وانا بس بعاين ليها ما قادر اشيل عيوني عنها واكتر حاجة جذبتني فيها خجلها اااخ وكانت جلسة تعارف بين اهلي واهلها وبعد الاسرتين اتعرفوا على بعض قالو يخلونا برانا اتا وهي عشان ناخد راحتنا في الكلام صراحة انا كنت مرتبك شوية وكنت حاسس اني اكتفيت كدا وماعايز اعرف حاجه عنها اوا أسألها اي سؤال تاني لكن هي كانت عندها راي تاني انه لازم تتكلم معاي وعندها أسألة عايزة تسألني عنها لانها هي مابتعرفني وانا بكرة كنت مسافر الامارات طوالي وصراحة دا من حقها عشان كدا قعدت معاها وكنت متوتر شديد وماقادر أتكلم لكن هي كانت شخصيتها قوية وبدت تسأل فيني وكان اول سؤال سألتني ليهو انت بتصلي؟! جاوبتها بكل ثقة اي بصلي و غايتو ما خلت سؤال م سألتني ليهو لامن حسيت انه انا قدام قاضي في المحكمة هههههههه وانا بجاوب كنت بسترق النظر لعيونها المعذباني دي واكتر سؤال كيفني منها انت استخرت ربنا قبل تجي؟ وقلت ليها ايوة الحمد لله وصراحة كدا انا كنت مبسوط من أسألتها دي لاني حسيت انها زولة عاقلة وفعلا هي من حقها تعرف كل حاجة عني لانه دا زواج ماحاجة ساهلة وشوية كدا ارتحنا لبعض اكتر ودخلنا في الونسة لدرجة لمن نادوني للعشاء قلت ليهم اعملو لي سندوتش 😂😂ياخ ضحكو فيني ضحك،،، وقالو لي قبيل ماكنت ما عايز تقعد هسي بقت سيد الونسة ههههههه جيتنا دي كانت تعارف المهم في النهاية ابوها وافق موافقة مبدئية قال الراي راي البت تاني هي قالت تاخد فترة تفكر وتستخير وتدينا خبر المهم مشينا على كدا تاني يوم جهزت حاجاتي وودعت اهلي مشيت المطار وانا في صالة المغادرة اتصلت عليها عشان اودعها ودي كانت اول مرة اسمع صوتها في التلفون وهي كانت خجلانة وبقت تتمتم في الكلام ههههه وهي كانت اخر زول انا اودعه وانا في الطيارة بس كان تفكيري فيها كيف سافرت خليتها وراي ،وبعد اسبوع ابوها اتصل علي انا قلت بالسرعة دي معناها رفضت بس الحمد لله ادوني الموافقة ،،وانا من يوم شوفتها هي بالنسبة لي حبيبتي لكن هي اخدت فترة طويلة لحدي ما اتعودت علي وحست بمشاعر الحب تجاهي وبعد اربعة شهور عملنا خطوبة رسمية ولبست دبلتي في يدها وانا ما كنت موجود في بس متابع معاهم اول ب اول وكان نفسي انا البسها دبلة الخطوبة لكن عوضناها يوم العرس ،،، تاني اخدنا زي فترة سنتين مع انها كانت صعبة علي انو تكون بعيدة مني بس كلو يهون عشانا وصراحة كانت فترة صعبة بالنسبة ليها اكتر مني لانو في مجتمعنا دا الاهل ما بوافقوا على انه فترة الخطوبة تكون طويلة وصراحة هي عانت كتير من كلام الناس لكن هي بالجد صبرت واستحملت معاي وكانت لي نعم السند وقدرت تخفف عني كتير آلام الغربة وعذابها 💗💖وفي فترة السنتين دي اثبتت لي على قدر ما هي مجنونة وعفوية وطفلة ابسط حاجة بتفرحها على قدر ماهي عاقلة وحكيمة ،، وبعد السنتين دي جاء اليوم المنتظر وكانت اسعد لحظة في حياتي لامن شوفتها وهي لابسة فستان الزفاف وشكلها مع الزفاف وهي قصيرة كانت تجنن لو علي ادسها من عيون الناس والحمد لله ربنا قدرني واعمل ليها العرس زي ماهي كانت بتحلم بعد الزفاف انتهى وخلاص طالعين من الصالة الوصايا الوصاني لها ابوها وهو عيونو مرقرقة عمري ما انساها ،،المهم عشنا اجمل ايام حياتنا مع بعض ومرت فترة اجازتي سريع وخلاص مفروض ارجع الامارات ودي كانت اصعب لحظات عمري💖 ولامن سافرت كانت بتشتكي من اعياء خفيف وبعد يومين حست بتعب شديد ومشت عملت فحوصات وكانت البشارة انها طلعت حامل واتصلت علي وهي بتبكي وبتضحك في نفس الوقت وقالت لي اجمل خبر في حياتي انه حيجينا بيبي وفي اللحظة دي كان نفسي اكون معاها ي الله واخيراً شايلة حتة مني جواها انا في اللحظة دي كنت طاير من الفرح وهسي نحنا في انتظار مولودنا الاول وعلى فكرة انا ما بناديها بإسمها خالص بناديها *بـ سكرة* الإسم دا ببسطها شديييييييد لأنو هي جات على حياتي زي السكر وحياتي ليها طعم مختلف معاها وهي اول اسم اطلقتو علي هو *مهندس الفرح* لانه انا درست هندسة وهي بتقول انا مهندس فرحتها دايماً.. وبتمنى من ربنا يسهل لي واقدر اسوقها هي ومولودنا معاي الامارات ونعيش مع بعض وما نتفارق تاني لانه بالجد غربتي من غيرهم غربتين.
*اللهم هي وللأبد*♥️💞
*كنتي بالنسبة إلـي ياصغيرتي كـ حلمـٍ بعيد المنال*
*بقلم : زولة خدورية🖊️♥️*
