كنت ماشية الصبح على الكورنيش وسمعت اتنين بيتكلموا فوقفت ...
= معلش استحملينى انا عارف انى متقل عليكى اوى .. واحده غيرك عمرها مكانت وافقت انها تفضل جمبى وانا معييش مليم فى جيبى ولسه بكون نفسى .. بس متقلقيش ان شاء الله ربنا هيكرمنى عشانك انا واثق فيه.
- متقولش كدا تانى انا هفضل جمبك طول عمرى .. وربنا يقدرنى وافضل اساعدك .
= ربنا يخليكى لياا ياارب ... انا هروح اجيب ايس كريم تيجى معايا ولا هتقعدى لحد اما اجى..
- لا هقعد روح انت ومتتأخرش عليا.
"وهنا جت فرصتى"
قربت منها وقعدت جمبها...
-بتحبيه..
= مين حضرتك يا انسة؟!
-ردى عليا بس .. بتحبيه.
= بحبه جدا..
-بس دا فقير!
=عادى انا هفضل جمبه لحد لما يبقى حاجة كويسة.
-طب والى يجيبلك الى احسن منه.
=قصدك اى!
-قصدى انى عايزة اخرجك من الفقر الى انتى فيه دا .. هجوزك إلى اغنى واحلى منه.. هيبقى معاكى عربية احدث موديل .. وفلوس كتير اوى تغنيكى عن العالم كله.
بتردد=بس انا بحبه.
-تفتكرى اى احلى الحب ولا الفلوس!
البنت والطمع مالى قلبها= الفلوس طبعاا
-كدا تعجبينى .. خدى الفلوس دى خليها معاكى لحد لما نتقابل تانى .
=بس دول كتير اوى اى دا !.
-ميكتروش عليكى .. متعى نفسك بيهم وسيبك من الفقير دا .. ميستاهلش واحده فى جمالك ولا فى حلاوتك.
=هنتقابل تانى امتى!.
-متقلقيش مسيرنا نتقابل.
"مشيت وانا بضحك بشر .. الساذجة صدقت انى هغنيها فعلا.. الطمع ملا قلبها وخلاها تخسر انسان بيحبها بجد .. متعرفش انى مجرد شهوة بغويها عن الصح وامشيها فى سكه غلط .. اد اى الانسان دا غبى .. بيمشى ورايا وميعرفش انى بورده موارد التهلكة"
"كملت طريقى لقيت بنت صغيرة بتكلم ابوهاا"
-هتجبلى يا بابا العروسة الى شوفناها فى المحل.
=حاضر يا حبيبتى انتى تؤمرى هو انا عندى كام بنوتة يعنى.
-بحبك اوى يا بابا.. انا هروح اركب المرجيحة الى هناك دى .
= روحى يا حبيبتى وانا واقف مستنيكى اهو.
"قربت منه وابتديت اتكلم معاه"
- بنتك دى!.
= اه بنتى .. فى حاجه.
- لا مفيش بس مستغربة الحقيقة .. اصل ازاى واحد فى سنك الصغير دا ومخلف البنت دى وشايل مسؤليتها.
=اصلى اتجوزت فى سن صغير وربنا رزقنا البنت دى وبعدها مراتى اتوفت ومعدش ليا فى الدنيا دى غيرها هى الى حيلتى والى هخرج بيها من الدنيا.
- بس انت مش مهتم بنفسك خالص ليه كدا .. حالك مبهدل كدا ليه!
=بنتى واخده كل وقتى وبحب اهتم بيها جدا عشان متحسش انها ناقصة فبيجى اوقات كدا بهمل نفسى عشان اهتم بيها.
- طب والى يقولك على حل يخليك تفوق لنفسك كدا ويخفف من عليك الحمل!.
= ابقى خدامه طول عمرى.
- بص يا سيدى .. شايف بنتك الامورة الى هناك دى .. هى الى مأثرة عليك كدا ومخلياك مش عارف تشم نفسك ولا تفرح بسنك وانت لسه فى عز شبابك. الحل الوحيد انك توديها الملجأ هما هيهتموا بيها اكتر .. وانت هتعرف تشوف حالك وتتجوز من تانى ومراتك الجديدة تبقى جمبك وتساعدك والحياة تحلو فى وشك.. قولت اى!.
=انتى عايزانى اضحى ببنتى!.
-انا مبقولكش ضحى ببنتك..انا خايفة عليك وعايزاك تهتم بنفسك وصحتك .. انت مش شايف نفسك بقيت عامل ازاى..كله عشان واحدة ممكن لما تكبر متفتكرش كل الى انت عملته عشانها وتسيبك لوحدك ومش بعيد ترميك انت ذات نفسك فى دار مسنين!
=بنتى انا هتعمل كدا!.
-انا بقول يمكن مقولتش اكيد.
الاب بشر =طب واى الى المفروض اعمله!
=خد الفلوس دى وروح وديها الملجأ وبعدها روح شوف حالك وإسعد نفسك محدش ضامن عمره .. وانت مينفعش تموت وانت مهموم كدا.
-طب هنتقابل تانى امتى!.
= متقلقش مسيرنا نتقابل.
