𝚁𝚎𝚌𝚒𝚙𝚎 𝚏𝚘𝚛 𝙻𝚘𝚟𝚎 𝙸𝚗𝚐𝚛𝚎𝚍𝚒𝚎𝚗𝚝𝚜 :

𝙲𝚑𝚊𝚙𝚝𝚎𝚛 - 𝙽𝚒𝚗𝚎 [𝙵𝙸𝙽𝙰𝙻]

𝚄𝚗𝚒𝚌𝚘𝚍𝚎

အဲ့နေ့ကစပြီး ကိုယ့်တစ်တောလုံး ပန်းတွေဝေတယ်...လောကကြီးက ပန်းနုရောင်ကာလာသွင်းထားတဲ့မျက်မှန်ကတဆင့် ကြည့်ရသလိုကို နုနယ်ပျိုမျစ်လွန်းနေတယ်

☁

"ကိုကြီး..ဝက်ဝံပုံကွတ်ကီးလေးပုံဖော်ပြီးရင် စူပါမန်းပုံပါလုပ်ပေးနော်.."

"ကိုကြီးကပုံဆွဲမှမတော်တာ...ဝက်ဝံပုံတောင် မနည်းကြည့်ဆွဲထားရတာ..ကိုကြီးက အသည်းလေးပဲလုပ်တတ်တာ.."

"အသည်းပုံဆိုတော့ အချစ်မုန့်လားဟင်.."

"အချစ်မုန့်?အဲ..အချစ်မုန့်ကကိုကြီးလည်း ခုမှကြားဖူးတာ။ဘာတွေနဲ့လုပ်ရလဲ မသိဘူး။ပေါင်ပေါင်ရဲ့ကောဆိုရင်တော့ လုပ်တတ်မယ်ထင်တယ်.."

ယောက်ဖလောင်းကိုပြောနေပေမဲ့ ကိုယ့်အကြည့်ကတော့ kitchen counterကို သန့်ရှင်းရေးလုပ်နေတဲ့တိတိဆီမှာ။သူကလည်း ကိုယ်ပြောတာကိုကြားတော့ ခေါင်းကိုခပ်ဖြည်းဖြည်းခါယမ်းပြီး မနိုင်ဘူးဆိုတဲ့ပုံမျိုးပြုံးတယ်။

ခုလက်ရှိကိုယ်တို့အခြေအနေက ဘယ်ခေါင်းစဥ်အောက်မှာရှိနေလဲ ကိုယ်ကိုယ်တိုင်လည်းမသိဘူး။ကိုယ်ကအချစ်ကိုဖွင့်ဟထားပြီး တိတိကဖွင့်ပြောခံထားရတဲ့သူ။နှစ်ယောက်က ဒီအခြေအနေမှာ ရပ်တန့်နေကြတယ်။အဲ့ညကကိုယ်ဖွင့်ပြောပြီးတယ်ဆို တိတိကကိုယ့်ကိုမိနစ်ဝက်စာလောက် နေမြဲအတိုင်းနေရင်း၊ကြည့်မြဲအတိုင်း ကြည့်တယ်။ပြီးတာနဲ့ကိုယ့်ဆံပင်တွေကို ဆွဲဖွပြီး ထထိုင်တယ်။ပြီးတော့ ပြန်ကြရအောင်တဲ့။

အဲ့ညပြီးကတည်းက ကိုယ်တို့အခြေအနေက ပုံမှန်ထက်ပိုရင်းနှီးခဲ့ကြတာတော့ ငြင်းမရဘူး။ကိုယ်တို့တွေ instaမှာ အပြန်အလှန်DMတွေပို့ဖြစ်တယ်။အိပ်ရာနိုးပြီလား...၊ထမင်းစားပြီးပြီလား..၊ညနက်နေပြီ အိပ်တော့လေ...၊ဒီနေ့မိုးရွာလိမ့်မယ်ထင်တယ်...ကျောင်းကိုထီးထည့်သြားနော်..၊ဆိုတဲ့ပုံမှန်စကားဝိုင်းလေးတွေအပြင် တခါတလေဆို မြို့ထဲမှာအသစ်ဖွင့်တဲ့ဆိုင်လေးတွေကို သူမြင်ခဲ့ရင်လည်း ပုံရိုက်ပြီးပို့တတ်တယ်။ပြီးတော့ ကြည့်ဖြစ်တဲ့ရုပ်ရှင်တွေနဲ့ နားထောင်ဖြစ်တဲ့သီချင်းတွေကို အပြန်အလှန်ညွှန်းကြတယ်။တိတိနဲ့ကိုယ်ကအကြိုက်တူသလိုနဲ့ အကြိုက်မတူဘူး။ကိုယ်က ballad songsတွေကြိုက်တယ်၊ တိတိက operaတွေ၊ classicတွေကြိုက်တယ်။ဘာပဲဖြစ်ဖြစ် နှစ်မျိုးစလုံးက ခပ်အေးအေးနဲ့ အိပ်ချင်စရာကောင်းတာတော့ အမှန်ပဲလေ။ ဒီပျင်းစရာအကြောင်းအရာတွေကိုပဲ ကိုယ်တို့အပြန်အလှန်ဆွေးနွေးဖြစ်ကြတယ်။ စောစောအိပ်တော့လေလို့ပြောနေရင်းကနေ စကားအမျှင်တန်းပြီး နှစ်ယောက်သားသန်းခေါင်ကျော်သြားတဲ့တစ်ချို့ညတွေလည်းရှိတယ်။