ဖြည်းဖြည်းလျှောက်ပါ [OneShot_Completed]

One Shot [Unicode]

[Unicode]

ယွီရင်ရှင်းသည် သူတို့ပထမဆုံးတွေ့ဆုံခဲ့သည့် မြင်ကွင်းကို မှတ်မိနေသေးသည်။ အဲဒီအကြောင်းကို သူတွေးသည့်အခါတိုင်း သူက အရမ်းမောက်မာပြီး နုံအကာ ကောင်းကင်နှင့်မြေကြီး​၏ ကြီးမားသည့်ထုထည်ကို သတိမပြုမိကြောင်း အမြဲခံစားရသည်။

(T/N: ကောင်းကင်နှင့်မြေကြီး​၏ ကြီးမားသည့်ထုထည်ကိုသတိမထားမိခြင်း = လူတစ်ဦး၏စွမ်းရည်ကို ပုံကြီးချဲ့ထင်မြင်ယူဆခြင်းကို ဆိုလိုသည်။ )

ထိုအချိန်က သူသည် ဓာတ်ပုံပညာရပ်တွင် ဘွဲ့မရသေးသည့် ဂျုနီယာလေးသာ ရှိသေးသည်။ သူတို့ဆံပင်ရှည်ထားရသည်ကို နှစ်သက်ကြသော ယောကျာ်းလေးအနုပညာကျောင်းသားများရှိလေသည်။ ထိုအထဲတွင် ယွီရင်ရှင်းသည်လည်း ခြွင်းချက်မဟုတ်ပေ။ သူ့တွင် ပုခုံးအထိရှည်သောဆံပင်ရှိလေသည်။ ယွီရင်ရှင်းသည် အဆောက်အအုံများကို ဓာတ်ပုံရိုက်ရသည်ကို အကြိုက်ဆုံးဖြစ်သည်။ ထို့ကြောင့် အားလပ်ရက်တိုင်းမှာ သူ့ကင်မရာကိုယူပြီး မြို့အနှံ့ခြေဦးတည့်ရာလျှောက်သွားလေသည်။

တစ်ခါက အဆောက်အဦးတစ်ခုကို ဒီဇိုင်းဆွဲခဲ့သည့် အလွန်ငယ်ရွယ်ပြီး ကျော်ကြားလှသည့် ဗိသုကာပညာရှင်တစ်ဦးရှိသည်ဟု သူကြားဖူးလေသည်။ ဗိသုကာပညာရှင်က အသက်၂၆နှစ်ပဲရှိသေးပေမယ့် ဗိသုကာပညာကို အလွန်ကျွမ်းကျင်သူဖြစ်တယ်လို့ သူတို့ပြောကြသည်။ သူသည် စီးပွားရေးအသိုင်းအဝိုင်းတွင်လည်း အထင်ကြီးခံရသူဖြစ်သည်။ ၂၁ ရာစုတွင် အပြောင်မြောက်ဆုံးသော လူငယ်ဗိသုကာပညာရှင်များထဲမှ တစ်ဦးအဖြစ် သတ်မှတ်ခံရပြီး များစွာသောလူငယ်တို့ မပိုင်ဆိုင်နိုင်သော ခေါင်းစဉ်တစ်ခုဖြစ်လေသည်။ ထို့ကြောင့် ယွီရင်ရှင်းသည် မျှော်လင့်ချက်ကြီးကြီးဖြင့် ထိုအဆောက်အဦးသို့ ရောက်လာခဲ့သည်။

အဆောက်အဦး​၏ဒီဇိုင်းသည် တကယ့်ကိုလှပပြီး ခမ်းနားထည်ဝါသောခံစားချက်ကိုပေးသည်။ ဒါပေမယ့် ယွီရင်ရှင်း​၏ နှစ်ပေါင်းများစွာ အတွေ့အကြုံအရ အဆောက်အဦးက ပိုပြီးဆွဲဆောင်မှုရှိလေလေ လက်တွေ့ကျမှု မရှိ​လေဖြစ်သည်။